蘋機會：齊搶啱 Feel鐵盒版 缺貨炒貴一成
拍「狼人」響晒朵嘅曉治積曼，喺香港的確有唔少粉絲，莫講話電影票房勁收，就連最新上架嘅《鐵甲鋼拳》 Blu-ray鐵盒版，亦被炒貴一成！不過，搶唔到特別版都唔使無晒心機，事關普通版藍光一樣提供豐富 Bonus內容，其中必睇位係狼人與真實拳王冠軍較量一幕，戲院都無得睇㗎！記者：陳國輝
其他副刊影片 Bonus：拳王大戰狼人
特別收錄內容非常多，但注意大部份仍然係演員訪問、刪剪片段以及 CG製作過程，模式同以往片段無分別，吸引力一般。相反，如果你係曉治積曼 Fans，我就推介你睇「舒格．雷．倫納德：拳擊冠軍」，呢一幕你會見到狼人跟拳王學打拳嘅幕後花絮，而佢更會嘗試挑戰真正嘅拳王，結果係點當然唔使講，但作為粉絲就不妨一睇。
放大圖片 
■狼人拍攝認真，還專誠向拳王取經。
放大圖片 
■ Bonus會見到史匹堡到片場探班。
鐵盒炒至$298 MK缺貨
點解第一日出街就掃清鐵盒版？連 MK碟舖老闆亦無法解答，佢哋話，其實粉絲早於官方發放資料前，已經收晒風，並預先落訂；根據建議零售價，鐵盒版售價要$268，但喺 17號正式發售嗰日，由於每間舖大概只有二十幾隻，扣除熟客訂購數量，到咗下午已經勁缺貨，即時出現炒賣，暫時高位去到近三百先有交易，漲價近一成！打開鐵盒， Bonus內容同普通版完全一樣，無附贈 Figure亦無彩色相冊，只係多一張 DVD。但老實講，呢隻 DVD也只是電影內容，可能 Fans為方便珍藏，故寧願購買價錢稍貴嘅鐵盒版，而且買鐵盒版睇《鐵甲鋼拳》，成件事好似啱 Feel好多，貴幾十蚊，當過年豪畀佢！至於普通版 Blu-ray以及 DVD碟，則無發生搶購情況。
放大圖片 
■《鐵甲鋼拳》鐵盒裝藍光碟，包含多一張 DVD。$268（鐵盒裝）
放大圖片 
$218（普通裝）
7.1聲道拳拳到肉
就算劇情大打溫情牌，但《鐵甲鋼拳》依然提供大量炸機靚位。 Blu-ray碟支援 DTS-HD MA 7.1聲道，喺打入冠軍聯賽、與不敗神話宙斯一決高下嗰幕，固然係試重低音勁度嘅高潮所在，之前跟速度極快嘅雙城戰士對決，以及幾場不平等嘅地下拳場，都打鬥得相當精采，鐵甲人之間拳拳到肉嘅聲效，唔再係睇緊李小龍或者 Tony Jaa嗰種肉搏埋身，而係變成猛烈嘅金屬撞擊聲，每拳都好似地盤打樁機咁有勁度，比《變形金剛》又斬又射來得更震撼。
放大圖片 
■舊型號機械人突擊。
放大圖片 
■終極不敗機械人宙斯。
放大圖片 
■絕對考驗家中重低音勁度。
放大圖片 
■《迷》女角 Evangeline Lilly亦有份主演。
放大圖片 
■動作影星曉治積曼今次大玩父子情。
放大圖片 
■呢位「超惡男子」嘅必殺技，包括將軍三連擊以及奪命左勾拳。
留言列表
