Geek友講場

沙雕英女皇駕到 暑假玩樂攻略

2012年07月04日 ~~ 第267期 Face

話我哋香港人殖民主義入侵大腦都好,以前事頭婆訪港,總係咁親民好玩,家吓回歸之後, 7.1除咗係上街大日子,高官來港同時換來嘅係防暴警察同水馬擋路,冇癮!
好在,今年係英女皇登基鑽禧紀念,雖然請唔到真嘅英女皇駕到,有商場為配合暑假,搵咗外國沙雕高手,喺室內打造咗一個用沙造嘅英女皇像。出面熱辣辣,去冷氣商場拜見英女皇,再去埋海洋公園新區「冰極天地」同企鵝、北極熊玩遊戲,諗起都爽!






沙藝.運動精華遊


日期:即日至 7月 31日(星期二)
時間:中午 12時至晚上 10時
地點:荃灣廣場中庭
收費:免費
查詢: 2498 8343(荃灣廣場)

即場打造女皇


英國沙皇 Paul Hoggard

拍攝當日,呢個高成 4呎的巨型沙雕仲係趕工階段,四位沙雕高手:英國的 Paul Hoggard、荷蘭的 Remy Geerts、加拿大的 Craig Mutch及墨西哥的 Calixto Molina都喺現場做最後衝刺,呢四位沙雕高手仲有個隊名叫 Sand Artist,而領軍嘅阿 Paul,原來係唯一一位沙藝家被英女皇任命於 Royal Cornwall Agricultural Show製作農莊場景。
Paul同我哋解構成個沙雕的製作過程之餘、仲分享咗少許心得:「我哋構思好草圖,會計算好每個部分幾長幾闊先落手造,而且要不斷對照草圖去造,成個沙雕先會靚。」俗語「玩泥沙」代表做事兒戲,但見 Paul佢哋雕沙過程就絕不馬虎,有晒圖則、度晒平水尺,仲用各種小工具令細位更精美,搞到記者都手痕,好想即時去沙灘學以致用呀!

雕出倫敦奧運


來自英國的 Paul Hoggard,已經唔只一次製作英女皇沙雕,今次來港再次製作,仲組合埋大笨鐘(已改名做 Elizabeth Tower)、雙層巴士同倫敦奧運火炬,明 sell奧運熱,不妨聽住 Beatles音樂去睇。


大笨鐘、奧運火炬、英女皇


雙層巴士

製作解構




1.定形
為令沙堆堅固,一開始會將沙注入木箱,不斷加水及壓實,如果想造較高嘅沙雕,就會好似圖入面咁,將木箱疊高,似足結婚蛋糕!夠實淨後就由上層開始拆板、開始製作。




2.度尺
選擇草圖後,就會開始計算不同位置的長度,好似加拿大沙藝師 Craig Mutch製作時,就不斷度尺,確保倫敦大橋合比例。




3.塑形
製作雛形時,就好似墨西哥沙藝師 Calixto Molina咁,用手堆出大概形狀。




4.雕沙
荷蘭沙藝師 Remy Geerts正利用細鏟雕出英女皇。




5.修飾
雕好成個形態,阿 Paul仲用飲管壓出火炬上的圓形花紋,好細心!

《 FACE》 Gadget版監修人 903 DJ Donald




之前睇過堆沙高手表演,估唔到有機會自己可以去學,好玩喎!不過手痕友唔好玩僭建呀!另外都好期待海洋公園嘅北極企鵝,睇電視 BBC節目已覺得好 cute!又係時候去試相機同玩餐飽!

自製沙雕海灘 lum女新法


堆沙歌 Chris

睇完大師級製作,今個夏天想學番兩度散手,去海灘晒吓新玩意,其實唔難。我哋請到香港國際沙藝會社長 Chris Shum(藝名:堆沙歌)幫手,教你整立體字同 cute爆海豚。 Chris仲話:「如果有一定雕沙基礎,整一條立體海豚,基本上 20分鐘就搞掂」,絕對易玩易學。




You are so SWEET!!


有堆沙歌教路, model真係 20分鐘堆咗條海豚出嚟。

立體心心製法




Step 1
先用沙堆出立體心形, Chris提醒得閒要退後一兩步,睇吓形狀有無走樣或者不合比例。 Model經 Chris指導,成功堆出靚靚立體心。


Step 2
整好雛形,要令沙雕睇落平滑,可以廢物利用,以錫紙質地的包裝袋幫沙雕做磨沙。


Step 3
想要心形形狀更突出,可用剷子在邊緣勾出線條。


Step 4
利用尖頭細剷在心形上先刻字,再慢慢雕深筆觸, Chris話呢吓好睇玩家藝術感夠唔夠。


Step 5
雕好字,就利用飲管吹走多餘的沙,大功告成!


完成!

小貼士




無論係外國高手的大型沙雕,定 model試堆的細細個心形,都要得閒淋水,保持沙嘅濕度,鞏固沙雕形態。

Model覺得點?




睇落好似好容易,但係雕字個部分,真係好講技巧,一大力咗少少,即時變到好核突,又要重新執過。

咪走雞


除咗大師作品,現場仲有兩個以回歸為主題嘅沙雕作品,咪走漏眼。


高成 3米嘅金紫荊上面,仲雕有唔同運動項目,提你奧運就快到!


由香港小學生設計的沙雕,用海豚、波浪的圖案,表達對香港環保問題的關注,好有意義。

人像沙雕工作坊


喺商場消費滿$2,000(憑單一即日機印發票及相符之電子貨幣付款存根)就可以免費報名參加工作坊,即場向 Chris學整沙雕。
課程日期: 7月 29日、 8月 5日及 8月 12日
時間: 2pm及 4pm(每堂 1.5小時)
名額:先到先得
查詢: 2498 8343(荃灣廣場)

迪士尼新區.灰熊殺到


玩完沙,可以去迪士尼樂園「行石山」!灰熊山谷係迪士尼 3個擴展園區入面,佔地最大 1個。主打遊樂設施「灰熊山極速礦車」極之巴閉,會穿越成個園區,礦車飛入礦山之餘,又會突然喺地底穿出地面,唔係一味得個高字。而且礦車唔只向前高速飛,仲有 3分 1時間係倒後行,絕對全城獨有,好期待!
開幕日期: 7月 14日(星期六)
迪士尼門票:成人$399/3-11歲小童$285/65歲以上長者$100
查詢:迪士尼( 1830 830)


灰熊山谷位於歷險世界旁邊俾好多大樹遮實,未開幕好難見到園內環境。(圖片來源:迪士尼 facebook專頁)


(圖片來源:迪士尼 facebook專頁)

上網偷師


其實阿 Paul好想發揚沙雕呢項運動,佢仲建議香港讀者可以上佢官網睇,入面個 Kids Corner會 step by step咁教你點雕架《反斗車王》出嚟。




Paul Hoggard以前都雕過英女皇全身沙像,抱住貓頭鷹嘅就係希臘女神雅典娜。


今次來港團隊嘅官網有好多作品睇。 http://www.sandartist.com

成功爭取 香港有企鵝


學完沙雕去沙灘玩沙流晒汗,夏天咁熱梗要搵消暑節目,海洋公園就特登喺 7月開放新園區「冰極天地」畀各位唞暑。來自北極、南極嘅極地動物將會同大家近距離接觸,唔使等民建聯爭取都可以喺香港睇到企鵝仔喇!除咗睇動物,仲會有雪橇為主題嘅過山車,動靜佳宜,啱晒一家大細放暑假。

得意小企鵝




喺冰極天地嘅企鵝共分為南跳岩企鵝、巴布亞企鵝同國王企鵝。圖中嘅國王企鵝為企鵝家族中體形第二大種族。

英偉白雪鴞




又名雪貓頭鷹,哈利波特隻寵物嘿美就係雪鴞,展翅時翼長有 125至 165公分,唔只得個 cute,仲相當英偉。

霸氣北海獅




全球最大體形海獅科動物,低沉叫聲夠晒霸氣。佢間屋仲有個玻璃天花窗,用以觀賞其潛水姿態,唔係僭建㗎!

飄逸北極狐




冬天時,北極狐會長出雪白靚毛,成為雪地保護色。春夏氣候時則披着一身青灰色毛,故有青狐別名。

傻氣斑海豹




斑海豹外表傻更更,但實情識得聽護理員叫自己個名,算係好聰明嘅動物。斑海豹每年都會換毛,好似換一套新衫咁,傻得嚟又幾貪靚。

5萬呎北極區




冰極天地面積 5萬 2千呎,溫度保持於攝氏 15度,係斑海豹、海象、北海獅、雪鴞嘅安樂窩。其中北極狐獨佔雪狐居。於冰極隧道則可欣賞海象及斑海豹嘅泳姿,又可深入洞穴,與北海獅作近距離接觸。

南極奇觀




總面積近 23,000平方呎,可從不同角度認識企鵝及其生活習慣,有如親身走入南極探險。

極地時速




以雪橇為概念嘅過山車,以時速 35公里橫越整個冰極天地,速度唔快,勝在一家大細啱玩。

海洋公園冰極天地


開幕日期: 7月中(待定)
門票:成人$280/ 3-11歲小童$140
查詢:海洋公園( 3923 2323)

潮熊波鞋展


運動員嘅搵食架生就係運動鞋,中國跨欄王劉翔當然係着跑鞋啦,但講到最有收藏同欣賞價值,始終係美國 NBA夢幻隊批經典籃球鞋。新城市廣場搵咗波鞋界最強收藏達人 Horace Leung,展出佢嘅 20年極品收藏,由 1992年, Michael Jordan領甲夢幻隊揚威巴塞奧運開始,到應屆 NBA冠軍 LBJ戰鞋都有齊。女仔同小朋友亦唔怕悶,因為大會講到 Eric So(蘇勳)設計場地,打造 4個 1.5米高的巨型 Sporty Bear Figurines, Eric話:「全場都波鞋,非鞋癡都真係會悶,又唔親民,所以我決定用幾種奧運項目,設計咗 4隻可愛小熊,希望到場嘅女士同小朋友見到咁可愛嘅熊,忍唔住埋去影張相!」


Mr.U就一身 23號籃球戰衣,不過 MJ打奧運好似係着 9號㗎!


入口有跨欄熊 Mr.C同乒乓熊 Mr.H,果然係波鞋展,前者連鞋底幾粒金色釘都造埋, Eric So夠細心!


由 20年前經典到今屆新 Dream Team戰鞋都有齊。


收藏達人阿 H( Horace Leung)帶咗勁多珍藏到場,你睇佢背後個 23字,真係展出咗全系列 AJ波鞋!而 H手上呢對就係《回到未來2》入面對自動伸縮未來 Nike,炒到成 6萬港紙㗎!

三獅足球熊




剛剛完咗歐國盃,奧運足球一樣吸引, Mr. E一身米字旗波衫,龍門後幅牆仲有其他國家版本。

New Town Plaza x Eric So最熊運動會作品展


日期:即日至 8月 8日(星期三)
時間:中午 12時至晚上 10時
地點:沙田新城市廣場 3期 1樓天幕長廊
查詢:沙田新城市廣場
( 2684 9175)

黃波賀奧運




細個睇英文故事書,成日見到呢隻笑口噬噬嘅黃波波。原來佢係來自英國,叫 Mr. Men,為咗賀倫敦奧運,仲帶埋班 friend喺奧海城坐鎮!見到佢戴住英國帽加埋個招牌笑容,未到奧運已經好興奮!

Mr. Men& Little Miss倫敦活力之旅


嫌沙雕個雙層巴士顏色太單調,呢邊架坐滿 Mr. Men班 friend的大巴士, sharp到暈!

日期:即日至 8月 10日(星期五)
時間:早上 10時至晚上 10時
地點:奧海城 2期主題中庭
查詢:奧海城( 2740 4108)

撰文:鄺浿鏇、司徒港燊
攝影:彭自維、傅新發、黃家活
模特兒: Jumbo、 Vivian@M Spy、 Eunice@Jamcast、 Linkin@GME

    stacylife 發表在 痞客邦 留言(0) 人氣()