簽新經理人欣宜陳淑芬各行各路壹週刊 1063期－明星靚相大分享☆

08年2月，肥姐離世，臨終前將欣宜的經理人合約簽予陳淑芬（陳太），託好友代為照顧，不過，「無王管」的欣宜愈大愈反叛，經常玩失踪唔聽話，令雙方關係決裂。
陳太管唔掂，於是將欣宜的唱片及經理人合約，一次過轉讓給新唱片公司「星煥國際」，兩人從此各行各路。

減肥等上位
近日成功創下一百三十磅體重新低的欣宜，工作態度更加積極，原來她一直有個心願，希望有朝一日做女主角，給媽咪肥姐有所交代。
「欣宜知道要做女主角，走肥妹路線係好難，所以佢好積極減肥；咪以為減肥好容易，欣宜本身肥底，要好有恒心先得，而家佢食嘢好節制，計卡路里仲好叻，唔會隨便嘥quota！」欣宜身邊人說。
希望在事業上尋求突破的欣宜，近日卻與經理人陳淑芬感情破裂，陳太已放棄幫她傾洽工作，就連經理人合約，亦安排欣宜改簽新公司星煥國際。
「欣宜今次簽約係陳太安排，最初以為只係簽約出碟，原來連經理人合約都簽埋俾我哋，以後欣宜嘅工作都係我哋呢邊負責，不過，佢係新人由零開始，好多嘢都唔急得！」星煥國際一名工作人員說。
肥姐○八年二月因膽管癌去世，臨終前安排欣宜簽約陳太的天星娛樂，為期兩年，陳太更一度派兒子陳家豪做貼身助手跟出跟入，可見她對欣宜非常重視，儼如哎吔阿媽。

自己話晒事
不過，已經廿三歲的欣宜卻十分自我，對陳太的說話，亦當耳邊風。「可能喺外國讀書，欣宜好有主見，唔係你話乜佢就做乜！以前肥姐喝佢一聲，欣宜已經好驚，而家陳太話佢，佢會唔高興，仲會駁嘴添！」知情者說。
陳太採取放棄態度，全因為欣宜愈來愈反叛，唔聽話玩失踪近乎失控，即使欣宜跟兒子家豪仍保持朋友關係，但陳太對欣宜，已經徹底失望！
「因為受肥姐所託，陳太對欣宜好緊張，好似早排佢掛住拍拖，又將同條仔嘅嘴相放上Facebook，陳太嬲到鬧咗佢一餐，之後欣宜又將唧胸相放上微博，陳太都有話佢，欣宜梗係聽唔入耳，仲响背後同人講，好怕同長輩溝通。
「陳太最怕係欣宜學壞，所以連識朋友都要管，先排欣宜成日黐住洪天明同《畢打》Marco去蒲，但陳太就覺得蘭桂坊呢啲地方都係少去好，欣宜嫌佢囉唆，唔想俾人管住晒，仲唔聽佢電話，陳太梗嬲啦！」知情者說。
以後各行各路，陳太認為對二十三歲的欣宜毋須負上任何責任，只覺得有負好友肥姐所託。六月初一肥姐生忌當天，陳太便專誠到寶福山拜祭好友，更帶同欣宜簽約新公司的剪報到場，向肥姐交代一切。
「嗰日欣宜無跟陳太去拜肥姐，佢同記者講想喺屋企靜靜思念媽咪，其實係唔想同陳太見面有磨擦，所以先唔去！」
雖然雙方再無合約束縛，但陳太仍以監護人身份，與肥姐五家姐姜沈尾霞，共同持有欣宜現居的物業嘉禾苑，而肥姐留給欣宜的遺產，亦由二人監管。

各有千秋
欣宜轉投的「星煥國際」由在唱片業相當資深的何哲圖（Herman）揸fit。八十年代開始，Herman差不多做勻全香港十多間唱片公司，經驗絕對豐富。至於在行內有四十年經驗的陳淑芬，當日一手捧紅梅艷芳、張國榮及張學友等巨星，亦堪稱巨星之母。

何哲圖
入行三十多年的Herman，八十年代在華納唱片任General Manager，當時正值樂壇盛世，林憶蓮及葉蒨文等均是華納爆紅歌手。後來他轉到EMI任職Manager Director，當年旗下有彭羚、楊采妮、張信哲和巫啟賢等。直到九十年代末期唱片市道轉差，多間唱片公司出現大地震，九七至○四年間，Herman曾短暫任職英皇、BMG、BMA、環球等公司。○四年加入東亞唱片做CEO，拉攏許志安及何韻詩等加盟。○八年轉投Neway成為董事總經理，旗下歌手有關心妍、鄭融及鍾嘉欣等。今年中加盟星煥國際任CEO，旗下有陳法拉、關心妍及欣宜。

陳淑芬
八一年陳淑芬任職華星娛樂，提議跟無綫聯合舉辦第一屆「新秀」，當年冠軍梅艷芳便由她一手提拔。同一時間，陳太認識了當時半紅不黑的張國榮，八三年為他推出《風繼續吹》一曲爆紅，之後的專輯《MONICA》更令哥哥成為樂壇巨星，之後更轉攻影壇，接拍《阿飛正傳》、《霸王別姬》、《胭脂扣》等。
八六年陳太離開華星，哥哥跟她過檔到天星娛樂，直至○三年離世。到九十年代，陳太跟張學友合作，九七年破天荒在紅館舉行四十三場音樂劇《雪狼湖》，之後再巡迴公演，合共演出了五十多場，近年學友舉行過百場巡迴演唱會，亦是陳太一手策劃。

劉家昌放手
肥姐離世前，曾在病榻託孤請劉家昌照顧欣宜，但肥姐離世後，陳淑芬派出兒子貼身照顧欣宜，又私下為她接工作，完全當劉家昌透明，欣宜更成為兩人的磨心。為了愛徒欣宜前途着想，劉家昌始終沒有與陳太爭出面，更轉口風說：「錄音部分我可以做，陳淑芬做經理人，她願意配合就好完美，陳太對香港比較熟悉。（合約問題呢？）我們沒有合約，只是受肥姐所託，我會盡力！」有指當時Sony Music欲與欣宜簽七年長約，但欣宜及陳太認為時間太長而拒絕。

陳淑芬安排欣宜簽新公司「星煥國際」，Grand Opening記者會上，陳太亦有現身，但當天所見，二人感情已大不如前。

本週一（19/7），欣宜出席海港城活動，當日新老闆Herman專誠到場探班，令欣宜喜出望外。

欣宜在端午節出生，今年生日，她在微博上載08年生日當天，在舊居basement流淚的照片，媽咪離她而去，欣宜似乎仍未釋懷。

2010年
今年肥姐生忌（農曆六月初一），陳太與兒子家豪一同到寶福山拜祭故友，陳太亦藉機向肥姐交代欣宜去向，但當天欣宜卻未有同行。（《蘋果日報》圖片）

2009年
欣宜向來孝順媽咪，一年前便由陳太陪同，在肥姐生忌到寶福山致祭。（《蘋果日報》圖片）

18/7
減肥有成績，欣宜著住工人短褲，展示成果，但她仍打算瘦多十磅。

欣宜與兩位中學同學食完飯，送二人搭港鐵，鍾意影相的她，其間不停幫同學拍照。

在外國讀書的欣宜，早已養成外國人的習慣，一日三杯咖啡。

遺產受監管，收入不多的欣宜，無司機無菲傭，出入只搭的士，算是最大開支。

父親鄭少秋，因為已經有另一頭家，加上怕老婆，對欣宜零照顧。

肥姐患病期間，陳太經常陪伴照顧，臨終前更將愛女交她代為照顧。