東京直擊！TGS 2010 遊戲展 3D 體感超真實－明星靚相大分享☆

PS Move近日抵港即賣個滿堂紅，連帶新一代體感遊戲都人氣急升，開發商自然睇準時機，由運動、賽車、格鬥以至射擊等遊戲都加入體感功能，在昨日開幕的《東京遊戲展2010》（TGS 2010），就見到人人揸住碌發光棒左Fing右Fing嘅盛況，最驚喜係體感之餘，竟然有得玩埋3D立體遊戲，畫面仲逼真到彈晒出嚟，就等小記帶大家率先投入未來遊戲新世代。

雖然Wii已玩咗體感操控四年，但隨住今年Sony PS Move及微軟Kinect的加入，才正式將體感遊戲推向巔峰，再加上PS3快將支援3D Blu-ray播放功能，帶頭為遊戲界揭開新一頁，難怪今年TGS都以「遊戲邁向新篇章」（GAME goes to a new chapter）為主題。

今年擺設8部《GT5》連線比賽，每台都有獨立軚盤、賽車椅……同埋賽車女郎陪你玩。

小記試玩3D版《GT5》，就咁睇真係幾眼花，但戴上立體眼鏡後勁有真實感。

戴上立體眼鏡後成架車凸現眼前，仲要係小記最愛嘅法拉利古董賽車。

《Gran Turismo 5》8部連線對戰

一再延期的《GT5》終於鐵定在今年11月推出，雖然喺前幾年嘅TGS上小記都有玩過，但試版始終得一兩部車揀，唔似今年將跑車數目增加至超過1,000架，連古董車、小型賽車等都有得揀，另備有20個地區及70條賽道。現場就有8部《GT5》連線對戰，當中4部竟然玩埋3D畫面，掟彎爬頭時正到同真車有得揮，吸引大批人排隊試玩。

放大圖片

各大攤位都請來性感Showgirl和Cosplayer坐鎮，謀殺龍友唔少記憶卡。

《Killzone 3》揸住遙控掃射

2011年FPS大作《Killzone 3》承繼上集故事和網上多人對戰模式，賣點一樣係高科技武器和精細戰鬥畫面，除了可坐飛行器或飛船從上方偷襲敵人外，最吸引是新增PS Move操控，拎住佢當機槍咁掃射敵人，仲要用佢做出拆彈、爬梯等過關動作，同時備有3D模式，戴住立體眼鏡喺遊戲內邊跑邊打，連小記都玩到成身汗。

右手PS Move負責瞄準目標開槍，左手用來移動和操控，不時要Fing住佢做動作過關。

《Killzone 3》加入PS Move體感操控，拎住支遙控當機槍狂掃，仲支援3D立體顯示。

《LittleBigPlanet 2》布公仔障礙賽

相隔兩年，可愛的布公仔Sackboy將會在11月《LittleBigPlanet 2》中再次同大家見面，今集同樣係控制佢越過障礙物鬥快到終點，不過加入更多關卡和Mini Game，至於上集由玩家在PSN創建的300多萬個關卡，一樣可在新Game上玩番，即場試用PS Move控制主角行來行去，發覺靈敏度和操控性不俗，啱晒一家大細玩。

《人中之龍》新章搬至PSP上玩，主角行到邊都被黑白兩道嘅人追殺，要到地下競技場殺出血路。

現場除了公布PS3版《人中之龍 OF THE END》改玩打喪屍外，仲有晒Cosplayer落力演出。

今年多咗專為iPhone和iPad開發的遊戲，想知道更多詳情，就要留意本報一連三日嘅TGS報道。

《人中之龍新章：黑豹》單挑日本黑幫

《人中之龍》出咗咁多集，新章正式登陸PSP平台，連主角都由「堂島之龍」桐生一馬，換成小伙子右京龍也，單人匹馬挑戰日本黑幫。不過遊戲還是其次，重點是SEGA已安排在10月於TBS播放電視連續劇，人氣肯定爆燈！現場還有Trailer睇到PS3版《人中之龍 OF THE END》，唔知係一集的終結，定係另一傳奇的誕生。