Face週刊 141期內地富豪包起　林莉：我好open－明星靚相大分享☆

有「港版林志玲」之稱的 05年港姐季軍林莉，近日盛傳步同屆冠、亞軍葉翠翠和陸詩韻後塵，成功釣到內地金龜，獲對方開模特兒公司包起前途，更由青衣屋邨升呢進駐大埔豪宅比華利山，同天后謝安琪、衛蘭做鄰居。
由失蹤港姐行列轉戰模界爭上位，最近又個個星期日陪住蔡瀾周圍食出鏡，成功翻生的林莉，上週五（ 29日）對本刊表示，自己性格同眼光都比以前 open得多：「初入行嗰陣我唔會同唔識嘅人講嘢，但做咗 model之後，覺得主動啲會令自己發展好啲，比起以前，o依家我好 open！」
係囉，呢行個個都出招爭飯食，唔主動好蝕底 o架！
3月即將 30歲的林莉， 05年參加香港小姐，憑 5呎 10吋半模特兒身形成為季軍，可惜卸任後除了在劇集做吓大茄和間中在旅遊節目做布景板外，林莉被無綫當賣剩蔗， 06年約滿後索性轉行做廣告製作助理， 1萬人工。

抄 Chiling
同 Chiling（見圖）有 7、 8成似嘅林莉，雖然冇 Chiling上圍咁豐滿，但就比 5呎 9吋嘅 Chiling仲要高寸半，啱晒做超模，兩人更於本週五為浪琴表同場鍊過。

05年的港姐冠亞季，全部同內地富豪扯上關係，不過同行如敵國，問起葉翠翠同陸詩韻點睇林莉有大陸老細照起，二人就話中有骨。《忽然 1周》圖片

我冇睇過佢單新聞，或者個富豪可能係佢男友呢！真實對白

可能人哋真係有感情呢！唔好個男友有錢就話俾人包！真實對白

晒波驚青

林莉上週五（ 29日）到金鐘太古廣場的 GigaSports為本週一的泳衣騷試衫，着住兩件頭泳衣的林莉波濤洶湧，由於在場有顧客，林莉照鏡時驚青縮埋一角。

富豪屋任用

頂唔順朝九晚五悶爆生活，林莉去年忽然以 model身份再戰娛圈，四個月前由鄒世龍的 Starz People過檔到一間由內地富豪投資的新模特兒公司 VIP Management，成為公司唯一一位模特兒。
過氣港姐變女模，更被傳媒拍得有名車瑪莎拉蒂接送，既行名店又進駐比華利山豪宅。忽然富貴，難免與富豪老細扯上關係，不過林莉竟然擘大眼話與一直有聲冇畫、從未見光的富豪老細根本唔熟：「報道講嘅內地富豪，係我經理人嘅好朋友，佢知我經理人開咗 model公司簽我，就揼咗一筆錢入股當係投資。其實我哋只係見過幾次，但老闆好好人，唔喺香港都借架車畀我有需要就坐，至於比華利山，只係我經理人有嗰度門匙，我屋企又細，先上去借地方擺嘢咋！」

10 比華利山豪宅
獲公司力捧成為 top model嘅林莉，入行時與家人同住青衣公屋，現時則自稱獨居葵涌私人樓，不過早前被拍得出入老闆大埔比華利山豪宅。《壹週刊》圖片

10 2百萬跑車
以前迫慣地鐵，林莉現時出入多數會搭公司租的七人車，有時亦可叫老闆的司機揸價值二百萬的瑪莎拉蒂跑車接送，呢啲老闆去邊度搵。

05 青衣公屋
《忽然 1周》圖片

05 平民地鐵

港姐變蠢妹

逢週日晚陪住蔡瀾周圍品嘗好嘢的林莉，被網友批評唔識講嘢兼成日發問蠢問題，同多嘢講的李珊珊表現爭幾班。俾人叫問題少女，林莉就解釋其實係節目需要：「由於我哋會去試唔同嘢食，所以導演都叫我問多啲問題，等蔡生有機會向觀眾解釋嘛！」

試生磨 wasabi時大驚小怪，林莉話陣味好生，俾蔡生寸佢：「生葵梗係生 o架啦！」

網友狂寸林莉唔係發呆就係問低能問題，勝在樣靚腿又長；樣靚，蠢值得原諒。

污糟邋遢女人

經歷過撈極唔起的等運到日子，林莉自言比以前識諗，就算被指黐富豪都唔會似葉翠翠咁死撐。「做 model呢行有人會主動識老闆，又會唔收錢陪佢哋去 party，可能佢哋想搵個有錢對象，但我自己一定唔會咁做，因為我唔想將來個老公以為我係污糟邋遢嘅女人。」
誓神劈願講明唔會被人包養，林莉話自己其實係慳妹，身上最貴只係萬多元的 Prada手袋，又否認早前指佢半日狂掃十幾萬名牌。不過問到佢唔住比華利山住邊度？林莉即時啞咗，要經理人提點才話以萬五蚊租住葵涌私人樓，貪佢近青衣娘家。

忽然縮胸
林莉本週一（ 1日）幫 GigaSports行騷時以比堅尼上陣，係參選港姐以來首次泳裝出騷，但呢日見佢心口扁撻撻，同早幾日試泳衣時嘅巨咪兩個樣，有可疑喎。

同警鐘胸 Jessica C.（左）及 Rosemary（右）齊齊行騷的林莉，獲大會安排企喺古天樂隔籬，夠晒 face。

翠翠：好唔好彩

同一屆港姐三甲全部被指黐富豪釣金龜，曾經獲內地金葉子度假集團老闆黃有龍照顧的葉翠翠，問佢點睇同屆阿三都有富豪照顧，翠翠上週六就「諦諦貢」，話識富豪都可以係真愛：「我覺得我哋三個都有呢啲新聞好唔好彩，我冇睇過佢（林莉）單新聞，或者個富豪真係佢男友呢！其實我哋都好耐冇聯絡喇！」
翠翠俾趙薇橫刀撬走富貴男友，佢自嘆唔好彩，啱嘅。

認用砵仔糕

林莉影相雖然要靠托先有豐滿效果，但佢話無意因此整容或隆胸，一切最緊要自然。

影相有深坑、出騷卻變飛機場，原來林莉坦承自己冇乜身材，要用輔助工具幫手：「我上圍唔勁，好多時要靠砵仔糕幫手托一托先有啲嘢睇，嗰日試衫係有用砵仔糕，後尾發覺唔自然就冇用。我自己唔介意胸細，因為好多國際名模都未必好大胸！」咁坦白，又幾可愛喎。

做模升呢

05年港姐季軍嘅林莉， 06年合約一滿就唔續約，轉做幕後。上年再轉行做模的林莉，以港版林志玲登場，加上有內地富豪包起新聞谷一谷，單係上月收入已達 6位數字， 2月份的騷更已排到密麻麻，好過留喺無綫做二打六啦！