面對面
變型牙醫 許廷鏗
話說三幾年前第一次見到「將軍澳吳尊」，他的身份一半是《巨聲》風頭躉、一半是港大牙科學生，我曾經睇死：有朝一日《巨聲》落幕，或者牙科畢業，要麼放棄做歌手、要麼放棄做牙醫，肯定有一瓣半途而廢。
結果許廷鏗讓我大跌眼鏡，這些年來他既是歌手：下個月尾將舉行首個賣票個人演唱會，也是牙醫：執業一年多，歌手工作再忙，也保證每個星期返診所睇症。對別人來說，娛樂圈的通告大過天，對許廷鏗來說，病人的預約亦不遑多讓，約好了診症，拍攝、訪問、錄音、綵排一樣要推。
於是我想到了這張相片，從牙科病人的視角看許廷鏗：前一刻他站在舞台上萬人擁戴；這一刻，洗盡鉛華卻依然青靚白淨服務我一個……那感覺，應該都幾養眼、幾有優越感。
許廷鏗亦承認，拍張照、唱首歌就能淨袋幾萬銀，娛樂圈的錢，的確要比做牙醫、收幾百塊對住滿口牙血逐隻清洗容易得多，不過亦正是因為這樣，牙醫牌不能丟：「娛樂圈五光十色，去到邊都俾人吹捧俾人包圍，人容易變得太自我。做牙醫，我至可以將 focus由自己轉移去病人身上，做歌手定做人都好，我需要平衡。」
書比別人讀得多，畢業後更是兼顧兩個身份，過着兩種差天共地的生活，見得多自然長得快，難怪 25歲的許廷鏗，長大了、成熟了、亦變型了。
賣票與睇症
處男個唱《許廷鏗時光演唱會》主題及歌單自己親自包辦，不過疑似抄襲西片的海報，就應該唔關歌手事。
09年甫參加《超級巨聲》，許廷鏗就因為聲色藝俱全又是牙科學生，風頭一時無兩。四年後，後勁依然凌厲，是歷屆巨聲幫舉行個人售票演唱會的第一人。下月 28日在 Star Hall舉行的《許廷鏗時光演唱會》剛剛宣布售票熱烈，加多 29日一場。
第一次賣票、第一次可以知道自己唱歌到底值幾多錢，感覺就好似做牙醫第一次睇症。以前讀緊牙科學校其實都有睇客，但係嗰陣時啲客係特登付平價畀學生睇症，同出嚟執業兩回事，真金白銀、戰戰兢兢，一路睇一路震、一路打眼色畀個姑娘：「我咁講啱唔啱？」
唱片公司星煥與無綫旗下星夢合併，賣碟成績向來驕人的許廷鏗被捧成新公司一哥：「唱咗三四年歌咋，一咩哥呀？咪玩我啦！」鄭俊弘未出碟添喎。
唱咗呢四年歌，俾人話係星煥一哥……唔好玩啦！得嗰三四年，咩一哥呢？好多人睇我哋，係上上落落、紅與唔紅，我好得意，反而見到，係身邊有咁多鍾意唱歌而又渾身才華嘅人，佢哋冇渠道又冇平台，連行都入唔到。其實我哋擁有緊嘅，到底有冇珍惜？有冇感恩呢？
因為各種原因，我呢個演唱會主題係「時光」，就係想大家學識珍惜。今年 Sita（陳僖儀）同一個長輩相繼離開，我出入殯儀館幾次。前幾個月，契媽又喺過關時暈倒，可能喺羅湖出事，第一晚喺深圳留醫第二晚至送返香港，唔知係唔係延遲醫治，一直冇醒過。睇住出出入入嘅親戚朋友同契媽講嘢：「喂，你應承咗我做乜做物，快啲醒啦……」我醒起，係喎，我都應承咗佢食飯、幫佢整牙，有幾多嘢，平時擁有時係老馮，但係無常到突然間消失？我係牙醫，家姐都係醫生，但係有啲嘢，你就係愛莫能助、無能為力。
讀完五年牙醫，去年底在叔父位於慈雲山的牙醫診所正式執業，許廷鏗說一邊做歌星一邊做牙醫，為了找到平衡。
巨聲與巨星
09年參加《巨聲》，因為睇得又唱得被稱為「將軍澳吳尊」風頭一時無兩：「本來都飄飄然，但係收過公司 warning letter、出嚟見過世面，就知自己渺小。」
卸了妝、換掉歌衫，許廷鏗說他披上醫生袍、戴起口罩就是牙醫。有時候在診所裏低頭苦幹，做完一個大叫「 next」，然後會出現一個怕怕醜醜、行路鵪鶉的少女病人，別人睇牙時條件反射緊閉雙眼，她卻任何時候瞪大雙眼保持與牙醫先生四目交投，這個時候，許廷鏗就知道：「這個肯定是 fans。」
牙醫呢份工，開頭選讀，係想安安定定有個搵食專長。做落之後，我搵到成功感，亦都明白，自己有幾需要佢。做娛樂圈同牙科反差好大，娛樂圈嘅成功，嚟得快走得快，嚟嘅時候鋪天蓋地好墟冚，真係好容易腳步浮浮飄飄然。初期參賽，唔係得我一個，成班巨聲都有氣燄。試過一路行一路唱，嘈住去到化妝間，俾人投訴收過 warning letter；巨聲錄影，明明我嘅 fans最多，但係出到去做嘢，個個星都大粒過我，是但一個啲牌都多過我，真係好容易覺得失落；做歌手，個個人圍住我轉，吹捧我、服務我，當去到邊都係焦點時，人會好容易變得過分自我……睇牙唔同，冇得平地一聲雷，就係牙逐隻牙整、逐隻牙洗，一隻一隻腳踏實地，最好，係全副心機 focus喺病人身上，唔到我分心。我真係好需要平衡，需要一份實在感。
家庭環境優越、品學兼優，仲要係運動健將，代表過香港足球隊參加過東亞盃賽事：「其實我冇樣叻，自細都被哥哥嘅光環蓋過。」
其實，我都唔係大家想像中，由細到大都係焦點、都有優越感。屋企四兄弟姊妹，我有兩個家姐、一個阿哥，從小阿哥就靚仔過我、叻仔過我，同佢一齊，我就永遠被忽視。讀名校（金鐘名校聖約瑟及港大牙科），你估我叻咩？都係阿哥係校友，又品學兼優踢埋校隊，入聖約瑟定港大都係靠佢 line up。曾經，我好想贏佢，日練夜練操羽毛球，點知，佢幾個月唔打，一樣一落場就鍊贏我……點先？畀你玩晒好唔好？
𠵱家，我總算有嘢叻過佢（唱歌），但係我都開始明白，原來永遠俾人捧得高高在上嘅感覺，並唔係想像中咁好。
同性與密友
有一張帥臉，有牙醫和唱歌兩個專業技能，有做生意的爸爸，從小衣食無憂，還有分別在港大讀法律和醫科的哥哥姐姐庇護，出道第一年就出三張唱片、兩張賣得金唱片、六首歌登上流行榜冠軍……優越如許廷鏗，亦有摔跤的時候。 11年底，許廷鏗曾經因為喝醉酒與同性友人在公園擁吻，登上雜誌封面。
我諗我自細喺溫室長大，又係四兄弟姊妹最細一個，下下都有屋企人出面，一唔掂最興嗌投降、舉手叫媽咪就乜都搞得掂，兩年前嗰次封面，係我咁大個人第一次自己面對、自己解決一件事。
屋企人識咗我廿幾年，點會唔知我係咩人，我嘅性向佢哋冇疑慮過，但係其他親戚朋友有。我覺得最難受係，做消防員會見到死屍、做牙醫會成日對住牙血，做藝人自然會對負面新聞，我明呢個遊戲規則，但係當時要難為屋企人陪我承受壓力、幫我到處解圍。
曾經被拍過與女性友人當街互相餵食分甘同味：「嗰個係女同學，其實我真正女朋友喺參加《巨聲》中期就分咗手。」 
當時我一路準備畢業考試、一路籌備第二張唱片。功課壓力大，經過第一隻碟嘅成功，第二次出碟亦都覺得迷失。愈迷失，我愈想麻醉自己，唔理場合地點，成日為醉而醉好怕清醒，一心諗住我咪係個牙科學生之嘛，有乜所謂喎……結果會搞到咁大件事。
知道俾人影到嗰晚，真係好擔心，驚自己以後都冇得唱歌，就咁玩完……結果，新聞原來日新月異好快被蓋過，好似做人一樣，做錯過，假以時日，就會接受呢段歷史。等於我啱啱入巨聲收過 warning letter一樣，錯過，下次咪唔好再犯囉！
攣與直
醉酒與同性密友舉動親熱、一入行又被性向成疑的前輩張敬軒特別關照，對於性取向，許廷鏗說：「屋企人識我廿幾年，最清楚我係咩人。」
有關攣與直的問題，許廷鏗沒有直接答：「我本來有女朋友，去到巨聲中期至分手。我本來係佢一個嘅，變咗要同其他女仔分享，佢接受唔到我身份嘅改變，搞到分手。打後呢幾年，同每個人傾偈都帶住防線，好似好假咁，又點會動心呢？最近我睇咗嗰條片，《肯陪我挨麥記的女人》……其實我最嚮往呢種小甜蜜，呢行做咗咁耐，有咩靚女未見過？有咩好嘢未食過啫？」
有關攣與直的問題，事實上我也沒有直接問。問心嗰句，不管受訪者怎麼答，其實每個人心裏有自己選擇相信的那套。
留言列表
