FACEweekly

多謝你　許廷鏗

09年參加第一屆《超級巨聲》，奪得「最強人氣獎」的許廷鏗，憑着勵志情歌，粉絲多籮籮。當然啦，「主職」唱歌、「兼職」牙醫，唱得又醫得。不經不覺 Alfred已在樂壇打滾 4年，今年尾將首度開個唱，回饋 4年間支持他的歌迷們。今天 Alfred牙醫更要多謝 4件人和事，睇吓有無你份？

謝……趙增熹同鄭欣宜

'09參加第一屆《超級巨聲》，滿以為自己鍾意聽美國 R&B歌手如 John Legend、 Beyoncé等，聽得多就易掌握 R&B點唱，先揀了方大同的 R&B歌唱，然後趙老師就即刻 ban我，最後我揀了范曉萱的《眼淚》，結果獲好評，原來「鍾意聽的唔代表自己啱唱」係真的。另外一位要多謝係欣宜，佢教曉咗我要適應娛樂圈生活，當時實習牙醫被狗仔隊跟，好躁，但佢話我知人哋都係打工，要互相容忍一下，仲有俾人跟即係有價值，從此我就抱住呢個心態，面對娛樂圈，令自己舒服好多。

謝……快閃街唱

為了宣傳個唱，早一個月前左右，開始去全港 8個不同旺區快閃唱歌。
好意外由旺角到理工大學等站都有百多人支持。最開心係 sell演唱會同時，亦可以畀我一試歌曲的現場反應，好讓我在 12月個唱，排好唱曲次序。〈面具〉、〈青春頌〉都係好有反應，但估唔到另外一首〈臨時演員〉不是主打亦好多人拍手支持。畀到我好大信心。

謝……行醫平衡


早前拍〈青春頌〉， Alfred親自拎起橫額，在旺角街頭尋「追夢想」的人。 

某時候，我會視牙醫為我的庇護所，因為替人醫牙時，要好靜心替病人處理，這個時候，心裏是最平靜的，可以好好平衡娛樂圈熱熱鬧鬧的環境。作為牙醫及歌手這兩極職業，其實頗有使命感，因為一路醫人一路唱歌，真是很不可能的事情，但這 4年得到歌迷的支持，正正教曉我，兼顧唱歌興趣不等於要放棄本身職業，亦影響了自己寫的歌如〈青春頌〉、〈重新長大〉都好 positive。

謝……廣東歌


許廷鏗「時光」演唱會日期： 2013年 12月 28-29日 8:15pm票價：$680/$350/$300（ http://www.hkticketing.com） 

一出道都令人標籤我係唱情歌為主，其實自己一直係一個「雜家」，中學時會聽廣東歌、轉讀國際學校時聽英文歌、到大學就聽台灣歌。 2014年好想有新的突破，除了曲風上會有改變，亦希望透過 12月個唱， focus在廣東歌上，始終唱英文、國語這些尾音都很圓，沒有廣東歌尾音夠倔的挑戰性。我有時甚至會去 YouTube，睇網民正面討論每份歌詞的意思，始終係我們語言，最有共鳴。


撰文：陳家豪
化妝： Khaki Yan
髮型： Milk Chan@Xenter

arrow
arrow
    全站熱搜
    創作者介紹
    創作者 stacylife 的頭像
    stacylife

    明星靚相大分享☆

    tvb4life 發表在 痞客邦 留言(0) 人氣()

    E-mail轉寄