週一（ 16日）無綫台慶頒獎禮，徐子珊拖住吳卓羲行紅地氈例牌性感，見佢眼神都真係愈嚟愈見電力，睇嚟狐仙真係幫到手。
真面目
求神問卜 邪谷桃花爭視后 徐子珊紙紮鋪拜狐仙
無綫周年小圈子《萬千星輝頒獎禮》，週一（ 16日）又舉行咗，視帝視后極盡驚喜，田蕊妮爆冷連擸兩獎，坐足全場 Cool魔張智霖輸畀冇到黃子華，總之全台努力營造緊張氣氛依嘩鬼叫。
邊個攞視后大家可能唔上心，但班姐仔身為圈內人，視后獎項關乎出騷叫價，當然分外肉緊，據知恨攞視后多年的徐子珊，早前便專程往紅磡一紙紮店拜狐狸仙谷桃化，走偏門可惜仍最終失落視后寶座，睇嚟子珊唔夠誠心喎！
有黃子華帶住，但套《 My盛 Lady》收視得 28點未高過 30點，徐子珊雖演得出色，可惜最終都係輸畀田蕊妮！
徐子珊出道 9年出名恨攞視后，今年拍住出爐視帝黃子華套《 My盛 Lady》麻麻叫座好在叫好，由最初爭視后說：「準備好心情等下年。」到最近改口風話：「身邊嘅朋友同觀眾反應都好正面！」取態明顯積極咗。
台星脫光拜
為不想今年台慶頒獎禮再度空手而回，上月（ 11月）初，有人見她在紅磡一紙紮鋪出現，據知店內有供奉狐仙的靈壇，不少善信均在此店向狐仙祈福兼還神。
上週六（ 14日），本刊到該紙紮鋪放蛇，本刊記者扮作善信稱希望可增加人緣及桃花，該店職員即說：「哦，你想拜狐狸仙呀，埋邊啦，你想拜我哋就幫你執套金銀衣紙，你心諗住想求乜嘢，再燒咗啲紙就得啦，我哋呢度好多嗰啲𡃁模嚟㗎！」之後本刊再畀徐子珊照片給該店員睇，她卻說：「徐子珊？我唔識喎，唔認得！」睇嚟子珊觀眾緣仲未夠喎！
據知 34歲徐子珊學識拜狐仙，源自今年 7月往台灣拍攝九把刀新片《我的情敵是超人》，在當地工作人員介紹下學識搵狐仙谷運，據知情人士說：「台灣嗰邊興咗拜狐仙好耐，佢哋話狐仙可以幫人谷桃花，所以特別多藝人善信，台灣人拜狐仙仲興要脫光拜，佢哋要每日淨身後脫光衣服同狐仙溝通，但係香港就好少藝人拜啦！」如今子珊再度失落視后寶座，咪再沉迷呢啲邪門嘢啦。
今年 7月，徐子珊獲九把刀睇中，拍住台灣男神柯震東和林依晨開新戲做女二，亦在台灣學識拜狐仙。 
隱世狐竇 
徐子珊幫襯的狐仙佛壇位於紅磡星湖街，店鋪細細只約一百呎，店內設有一神壇，提供賣衣紙拜神問卜一條龍服務。 
店內中年女職員說好多𡃁模都有嚟拜，但係乜名就噏唔出，甚至連徐子珊都話唔認得。
林千博師傅：規矩人定啫
林千博 
拜狐仙除咗有人會每日裸拜外，仲會隨身戴住狐牌，增加狐仙效力。
中港台女爭拜
台灣興拜狐仙，但其實除咗台灣妹外，中港亦有不少藝人有拜狐仙習慣，其中有傳章子怡亦係善信之一。
台灣妹 蕭薔
44歲大美人蕭薔，曾到當地狐仙廟拜神兼改名，對此她承認：「我是為了身體健康啦，藝名還是叫蕭薔！」
強國女 章子怡
有傳章子怡亦是狐仙信眾，更有傳她走紅後，在內地起了幾間狐仙廟來供奉。
港女 張暖雅
曾流出床照「向西女」張暖雅，去年亦曾被發現在太子的狐仙廟參拜，當時她說：「朋友介紹咪拜囉，都覺得機會多咗，發展順利咗。」
亞視幫贏晒
頒獎嘉賓黃秋生一講出田蕊妮個名，大塊田即時爆喊，仲喺台上高呼：「多謝我老公！」之後仲攞埋「最受歡迎女角色」獎項，嘉欣 BB又食白果。 
大塊田喺台上多謝老公，杜汶澤又即時喺 Instagram轉發恭喜老婆，兩公婆一條心。 
「最佳女配角」亦係由亞視出身的江美儀奪得，唔知下年會唔會輪到余詠珊嘅有線幫勢力抬頭呢？不過余詠珊當年其實都係喺亞視搞《今日睇真 D》響朵，都係亞視幫。
谷收視犧牲 Cool魔
張智霖得番個「最受歡迎電視男角色」，上台攞獎時明顯唔老黎，仲有骨話：「係咪 TVB唔鍾意我……當你需要佢嘅時候，佢會及時出現，呢啲叫義氣仔女！」 
即玩電話一聽到視帝唔係自己， Chilam即時低頭玩電話，連扮高興都費事。 
鎮宇黑面 
鄭裕玲即時致電身在上海的黃子華宣布佢得獎，臨時到場的吳鎮宇即刻面都黑埋。
無聊做乜好？
成個頒獎禮成 2粒半鐘，有提名有獎攞都算，難為其餘姐仔成晚陪坐，又寒又凍呀陰功！
四大 chok影
都話成 2粒半鐘冇嘢做，咪惟有自拍再 po上網囉，係呀，花旦亦係港女，都係鍾意 chok住影相啫！
江美儀 當 Niki透明
江美儀攞完最佳女配角，行過第一排花旦位時個個輪住拍掌恭賀，之後江美儀跟同屬亞視幫嘅田蕊妮攬攬，其實當時周麗淇都有伸出友誼之手，但可惜江美儀當睇唔到，連視后都喺台上話唔記得佢個名， Niki好𤓓！
杏兒 撩鼻屎
雖然話視后都有鼻屎好正常，不過大庭廣眾又有幾百支鏡頭影住，杏兒都仍然唔理撩咗先，其實等陣又或者去廁所先撩會唔會好啲呢？
馬賽 面黑黑
啱啱傳完同性緋聞嘅馬賽都有着到鬼咁性感出席，不過佢就顯得唔多投入啦，個表情話畀人聽：「其實我唔想坐喺度囉！」
留言列表
