面對面
致青春 陳靜
8月 8日，在微博宣布退出娛圈：「生活好累，人言可畏。」； 10月 31日，舉行八分鐘記招宣布復出：「精神脆弱，一時衝動。」
前後 84天、被譽為香港娛樂史最短引退事件，事過境遷， DaDa在影樓裏苦笑着形容它：「呢件事……真係好 X！」
個「 X」字是廣東粗話，形容人或事笨、膠、唔型到極點……可想而知，當事人有幾後悔。
DaDa今年 24歲，還記得你 24歲那年在做甚麼嗎？我記得，那年我份工打得唔開心，一於劈炮，失業三個月足足放任放肆三個月再作打算。
青春，難道不是用來放任放肆、為所欲為的嗎？大佬！又不用養家活兒供樓供車，不趁年輕劈一回炮，等幾時？
Sorry，當你份工是明星，劈炮等同引退毀約，當你剛剛升呢金像獎最佳女配角，放慢腳步等同扮嘢擺款，就不可以！
闖了禍，躲起來三個月， DaDa說自己終於懂了：「以前得到，係因為機遇，係我好彩，其實做人唔係咁簡單、成功唔簡單，我𠵱家至知，原來得到後要繼續付出，原來冇嘢難得過『堅持』。」
走紅快、拿獎快、比別人更早生厭引退、亦更早按捺不住寂寞復出……路走得快，等於成長得快、老得更快，……此致， DaDa快將要逝去的青春。
重回舊地
跟助手、髮型師從保母車上走下來， DaDa一邊跟記者打招呼、一邊拉高絲巾擋住嘴巴和鼻子：「我又聞到喇……嗰浸熟悉嘅味道。」
本集團坐落於堆填區附近，一年四季臭氣薰天、臭名遠播，五年前從 model仔做起、經常要出入本集團拍攝的 DaDa最熟悉不過：「我諗番起啱啱入行做 model嘅日子，對我嚟講樣樣都新鮮、樣樣都好玩，我對自己要求唔高、每次 modelling報酬幾多又唔執着，嗰日拍得順利、記者攝影師讚我兩句，已經可以開心好耐！」
一話當年， DaDa就眼睛鼻子發紅，開始想哭。她死活不許我拍照，把臉抬高、對着天花板深呼吸，硬是把眼淚吞回去：「我真係唔想人哋見到我成日喊、真係好怕自己未 ready做專訪、未 ready見人。」
短短五年，好好一個快樂簡單的「百果園 E神」怎麼會搞到三句唔埋兩句就含住泡眼淚？原因會讓很多𡃁模、奀星葡萄：太快走紅、太快得獎。
「真係有啲快，幾年之內發生嘅嘢太多，導演、演員讚我有觀眾緣、有天分，機會愈來愈多愈來愈好，開頭都仲係可以保持初衷，開心又冇負擔，從來冇諗過呢啲機會將會帶畀我乜嘢。慢慢，開始應接不暇，不停開工、不停見報，食多兩啖，人哋就會話我肥，唔執着外形，以前人哋話我可愛，𠵱家就變咗唔專業……我好、好難開心，個心想停，又明知呢一行冇得停，停就等於冇得撈……終於有一日爆煲。」
一夜成名
一切改變，源於那一夜， DaDa因為《低俗喜劇》裏的一角「爆炸糖」獲得金像獎「最佳女配角」：「嗰一晚本來好開心，提名已經了不起，我從來冇畀過壓力自己要攞獎，一心預咗輸畀音音姐、亦都睇好音音姐……直到聽到自己個名，我攬完音音姐後一片空白走上舞台，好想喊、好想搵番坐喺觀眾席嘅媽咪同經理人，但係又要提醒自己鎮定啲、做咗要做嘅嘢先、多謝咗套戲、多謝咗電影先。然後就係去到邊都俾人祝賀、不停影相不停飲酒慶功、電話不停響，嗰一晚我記得我好早就醉，要由朋友送我返屋企，幫我落妝、擺我上床。」
酒醒後第一個畫面， DaDa說是打開眼睛、盯着天花板，腦子裏一片混亂，電話裏一大堆未接來電：「最初我都好清醒，知道攞獎係時機問題，係好彩同套戲、同個角色撞出火花，係香港電影青黃不接，前輩想提攜新人……我都仲係我，冇變過。跟住慢慢啲嘢開始唔同，個個問我下一個目標係乜、個個都仲開心過我、比我自己更有期待，我開始覺得：係喎，下一個目標係咩呢？我唔似得以前喇，唔可以再得過且過喇！要 set個目標畀自己，就影后啦！就算唔攞獎，下次都要提名至得……呢啲，咪諗多咗囉！」
突然息影，懷孕、黐猛人、與施念慈不和傳聞立即滿天飛。三個月後 DaDa開記招道歉兼宣布復出，不過就不設提問環節。 
「引退」三個月， DaDa去過澳洲、亦遊過泰國，身形暴脹：「我諗過去讀書，又想好好放鬆食吓玩吓，結果，其實好悶、好想開工。」《蘋果日報》圖片 
出道三年、年僅 24歲就勇奪金像獎「最佳女配角」，從此以後想法變得不一樣：「好似有啲嘢要捍衞，唔可以令身邊人失望，我開始同以前唔同，唔再開心。」
08年出道做𡃁模，因為與陳柏宇合拍的飲品廣告成為「百果園 E神」：「工作應該好似細個一樣，唔好帶住太多慾求，要珍惜同享受嘅其實係過程。」 
去年曾經在電影《喜愛夜蒲》中與前男友王宗堯連場激戰，今年卻因為引退違約得罪《夜蒲》系列導演錢國偉，《夜蒲 3》因此易角大失預算，有報道指 DaDa接過百萬賠償令。
回到原點
不僅僅是成名來得太快，導火線還有，八十多歲的祖母因病去世。 DaDa在香港出世，父母常常吵到拆天，鄰居報警要警察上門調解。四歲半時父母離異，姐姐被判給父親， DaDa則被判給母親。因為母親要經營美容生意分身不暇， DaDa先被送到上海外婆家寄居兩年，再被安置到祖母家幾年， DaDa曾經說過，被祖母當正仇人、一直被視為眼中釘。
「食飯成日唔畀我食、好嘢話要留畀家姐同爹哋，過年個個孫有利是，得我冇。佢成日都話：『係呀，我係唔錫你㗎！』因為佢當我係媽咪嗰邊啲人。嗰陣時得媽咪錫我，但係嫲嫲唔鍾意媽咪，每個星期得星期日可以見媽咪，佢哋嗌交，都會唔畀我見，由得我隔住個鐵閘又喊又嘈。屋企冇得見，就惟有等返學小息約媽咪，佢會喺操場隔住個欄杆塞錢、塞嘢食，或者係啲髮夾同小玩意畀我，我喊到死，媽咪就叫我乖啲……忍多陣……佢好快就會接我走……成個童年，我都冇得到過嫲嫲寵愛，但係見到佢周身病、又糖尿又老人癡呆，有時去醫院探佢，竟然開心到捉住我隻手唔放……真係冇辦法再嬲佢。到佢過身嗰日，都要開工見唔到佢最後一面，我開始覺得好驚。諗番起當初入行，我唔係想搵多啲錢，畀屋企人好啲生活咩？咁點解可以好耐冇陪媽咪傾過偈？點解家姐個女出世兩年，我都係見得三面？點解連嫲嫲最後一面都見唔到呢？童年再辛苦，我都識得自得其樂，點解到大個，再冇辦法氹自己開心呢？有一日，佢哋有咩事，我賺再多錢都補唔番！」
引退的三個月， DaDa偷偷躲到澳洲朋友家，盡情吃、盡情玩，玩夠食醉，終於覺悶：「真係冇嘢做，我先至發覺自己原來好享受工作；避咗經理人好耐，我先至知原來逃避冇用，要攞出嚟講事情才會解決；到真係停落嚟諗將來，我先至知其實自己好幸運，做人唔係有天分、靠好運就算，真正喜歡一個行業，要學識堅持。」
父母自小離異、寄居祖母家卻被視為眼中釘：「細個日子仲難過，但係我反而比家姐樂觀，從來都唔會怪爹哋媽咪。」 
成名為 DaDa帶來的除了壓力和情緒病，還有三層物業， DaDa出道第一年已經買下 80萬新界唐樓、兩年前一口氣在深水埗掃入兩個單位，細細個就做業主。
貴咗？
見過 DaDa三次，第一面是𡃁模年代；第二面是《低俗喜劇》時的影圈新貴；第三面則是榮獲金像獎後再搞出個引退風波，說實話，三個階段身份截然不同， DaDa本人其實沒有變，一樣有點肉地、思緒有點混亂，想說甚麼就說甚麼，不小心會爆個粗，拍照訪問卻聽話聽教，討人喜歡、讓人覺得親切。
唯一不同的，是得獎以後的訪問，經理人公司要求記者預先準備問題，叫人嚇一嚇窒：「國際巨星咩？一攞獎就貴咗？」
這就是娛樂圈，變的未必是藝人本身，而是身邊的人、和旁觀者衡量她的那把尺。
撰文：朱小博
攝影：范仲良
化妝： Kayte Fung
髮型： Kenneth Ho@BEIJING HAIR CULTURE
形象： Bryan@the Flaming
服裝： Kanalily、 Polly Shop
留言列表
