蝦餃仔高燒工作狂媽咪冇影老公攤牌迫陳慧琳 KELLY 收山快週刊 616 期－明星靚相大分享☆

分身乏術被外界冠以女強人稱號，但Kelly話仲學緊點兼顧事業與家庭！

喊聲震天遺傳了媽咪的聲底，蝦餃仔喊起上中氣十足，本來坐度的Alex都要即刻彈起抱住佢。（攝影：莊健鑫）

星級醫生為蝦餃仔睇病周笑顏醫生，乃本港兒科名醫，於多份報章有專欄，來頭極猛。

話咁快「蝦餃仔」劉昇（Chace）經已10個月大，識得嗌Ba、Ma；而自榮升母親後，陳慧琳（Kelly）更以女強人姿態示人，輕鬆兼顧家庭與事業。

但實情Kelly工作忙碌，實在難以做個百分百盡責母親。5月25日（週二）記者發現Kelly老公劉建浩（Alex）帶發高燒兼腸胃炎的蝦餃仔睇醫生，全程囝囝喊爆，Alex愁爆，Kelly卻未見蹤影。據知，對於老婆工作至上的態度，令Alex不滿，兩公婆吵過多次，有人遲早攤牌希望Kelly放棄事業專心做湊仔婆。

去年一索得男為劉家繼後香燈，令Kelly成為風頭躉，弊在唔係好呢！皆因其修身速度之快，生完唔夠一個星期已回復苗條身形，惹來「代母」疑雲。

為洗脫嫌疑，Kelly不單多番公開澄清，強調全因聽從醫生吩咐才能創造神話，又三番四次展示母子情深，出名硬淨的她每當談到蝦餃仔必喊，更講明到外地工作最多只逗留兩、三日，仿如患上黐餃症。

Blog晒溫馨

5月27日（週四）Kelly將行動升級，於網誌大晒10個月大的蝦餃相，只見Kelly盡顯慈母一面，抱住蝦餃仔傾偈、玩玩具，而囝囝亦遺傳了媽咪的優良基因，生得趣緻可愛，不時露出燦爛笑容，甚具明星相，不比鋒芝雙B輸蝕。

而Kelly更網誌中寫道，「佢而家10個月大喇，重26磅。BB最鍾意周圍爬來爬去，所以要貼身睇實佢。尋日佢第一次係（）度講『BA』、『MA』，之後仲講好多，好似發表偉論咁。」

蝦餃大喊

口話要睇實蝦餃仔，但實情BB急病睇醫生咁大件事，Kelly都可以冇影，上載相片兩日前的5月25日（週二），本刊發現Alex在工人陪同下抱住蝦餃仔現身中環中建大廈的「醫匯818」診所，搵兒科名醫周笑顏醫生求醫。

同樣係蝦餃仔，但當日佢同Blog樣有好大分別，不單冇笑容，更喊最少廿分鐘，護士探熱佢喊，Alex累極坐度，佢又喊，大聲到成間診所都聽到佢「歌聲」，中氣十足拍得住Kelly。

老竇愁爆

睇見愛兒因病不斷扭計的慘情樣，做老竇點會唔心痛，為讓蝦餃仔舒服，Alex罰企成粒鐘，不斷輕搔囝囝背脊，又抱他睇花花碌碌的壁報板分散注意力，可惜效果欠奉。

不過當見完醫生，Alex仲愁過囝囝，神色變得凝重，塊面仲黑黑，到藥時，護士好緊張咁吩咐Alex：「呢家佢有發燒同腸胃炎，記得唔好俾佢亂食，等覆診個報告出，再決定佢使唔使入院。」最諷刺的是，最近Kelly接受訪問時才自稱是蝦餃仔的「飲食部」，乜咁唔小心呀！