face 週刊 127 期極秘試新look　傅穎：我裸背都得！ @ 明星靚相大分享☆

造型 1︰冬菇法拉
一戴起個冬菇假髮， Theresa就不停問人：「我似唔似盧廣仲呀？我幼稚園同小學就係咁嘅樣！」之後又勁開心咁四圍問人借黑框眼鏡。喂！你靚盧生好多，仲好鬼似露 bra法拉添！
封面
極秘試新 look　傅穎：我裸背都得！
2009年10月28日
25歲傅穎（ Theresa）早排好黑仔，先同舊公司金牌解約搞到滿城風雨，同昔日姊妹 Stephy又幾乎反晒面，好在有新碼頭星皓老細王海峰開口力撐，天無絕人之路。
難得有生機， Theresa亦決定勁玩潮 look，絕密試足 3個新 look之餘，再去學潮人玩鑲鑽，實行唔扮 o架妹再招新兵，絕地反擊戰，大膽傅穎更話：「就算要我裸背都得 o架！」嘩，女神界要執位喇！
25歲傅穎（ Theresa） 02年入金牌做「九餅」， 05年單飛不過一直俾 Stephy騎住， 07年博一博主動向公司提議扮假大眼 o架妹後，女神傅穎升呢，但亦成為好姊妹 Stephy勁敵。隨住舊老闆 Paco明升暗降，有傳唔得太子基歡心的傅穎即時冇啖好食。

陳法拉︰做乜扮我呀！設計對白

本月 10日 Theresa正式向外公布轉投星皓，當時星皓董事總經理彭淑霞傍到實，擺明得寵。《蘋果日報》圖片

秘轉形象
雖然話 Theresa扮 o架妹煞食，不過睇足兩年點都有啲悶，所以上週六（ 24日），傅穎秘密往髮型屋試 3個新造型，之後更去埋試穿近期潮人最愛的身體鑲鑽。據知新公司星皓更會將新 look放上網畀 fans投票，大玩互動新綽頭。戴上潮黑 bob短假髮的傅穎說：「會慢慢試吓多啲變化，最緊要睇吓 fans反應！當年轉 look（ o架妹），我都同個 stylist諗咗 2個月先至諗好，又參考咗好多書，有日心血來潮就同咗 Paco講，佢覺得可以就叫我做！」
上次扮 o架妹翻身，今次轉公司兼轉 look，當然要落足兩錢肉緊唔衰得。據知情人士說：「其實 Theresa後期喺公司已經冇乜人理，就算有人搵佢做嘢都幫佢推埋。嗰陣佢同公司提議啲咩，公司反應係 hea咗去就算，佢想拍戲又冇乜機會，佢想唱國語歌都係是旦同佢出咗一首，令佢好心灰意冷！」

一手為傅穎變 o架妹 look的幕後黑手，就係名髮型師兼髮型屋 IL COLPO老闆 Vince：「之前佢個金髮 look都搞咗成 5粒鐘，假髮唔可以就咁戴，要跟番面形修剪先好睇！」除咗餅女， Vince仲有幫方力申及森美等人做髮型設計。

髮型師 Vince

Bob型假髮$200、綠色大眼仔$200
雖然已經 25歲，但出名唔蒲少飲酒，加咗隻綠色大眼仔嘅傅穎望落仍然好鬼 young：「咁耐以嚟當然有人叫過我去玩，因為我完全唔鍾意蒲，點都唔會去，不過我平日都好夜瞓。」係喎，夜晚要寫 blog嘛！

同棒仔敖犬傳緋聞，咁啱大家又有套新戲《武動青春》上，難怪傅穎話：「大家只係朋友，宣傳啫！」又醒喎！

歌影雙飛
俾人打壓，對於舊公司是非傅穎唔想多講，不過講到新公司星皓就好雀躍：「入咗嚟 2個星期，我覺得真係好開心！我自己好想拍戲，唱歌會繼續，嚟近仲會有國語歌出街，其實我好多嘢都可以試，遇有啱劇本，就算要我裸背都得，上次本來拍《無野之城》，本來都有場露背戲，後尾又唔知乜事唔拍……」傅穎裸背市場大，各位老闆諗諗佢，當造福吓班電車男都好喎！

造型 2︰ Young版酒井
雖然都係金髮，不過由長髮變短，睇落有 8成似後生時嘅酒井法子喎，不過樣似好啦，學酒井吸毒就咪制呀！
酒井法子

造型 3︰電眼姣 look
一向剪開齊蔭可愛頭嘅傅穎，另一個造型就係黑色長曲髮，傅穎女人味即刻出晒嚟，傅穎話：「呢個髮型幾成熟，冇咁 o靚妹，又有另一種感覺。」
長曲假髮$200、紫色大眼仔$200

拍露背拉隊走

國產代替
傅穎本來有份拍《無野之城》，罷拍後改由一內地女演員嚴維莎頂上。

上年一套明講棒球暗講「基情」嘅電影《無野之城》，原本 Theresa都係女主角之一，不過有傳到第二日開工，傅穎助手突然拉隊走人，激怒《無》嘅老闆兼編導雲翔鬧爆傅穎舊公司金牌：「搞到班 artist變成奴隸。」上週六（ 24日）， Theresa講就話唔知發生乜事：「件事有啲印象，當時淨係知道要走，套戲係有親密同露背鏡頭，但我覺得可以接受，如果有適合劇本同導演，我都可以盡啲 o架！」
Punk玩鑲鑽
女仔鍾意 bling bling，搞完一輪新形象， Theresa再落咗銅鑼灣專幫潮人鑲鑽嘅 Dirty Laundry，仲揸住啲鑽不停喺鎖骨同腳眼上下度位，其間 Theresa不停話：「會唔會好痛 o架？鑲 2粒喺鎖骨好型，不過鑲咗成世喎，都要諗清楚先！」估唔到 Theresa都幾 punk喎！

無論你釘邊個位，視乎粒石嘅大細，大約都係收$1,500-$1,800，本地鑲鑽先驅有 rock女盧巧音，不過釘落皮膚後想除番，就要捱一刀開啲肉，想鑲鑽真係要諗清楚呀！

Theresa貪靚到死，試完腳眼再試埋鎖骨位， Theresa仲話諗過紋身：「我有諗過喺腰背度紋身，不過啲朋友話唔襯我，叫我唔好！」

盧巧音

豆豉變 5蚊銀

9餅雛形︰ 02年，由 9餅入行，未戴大眼仔嘅 Theresa（左）仲係一對豆豉眼，個樣叫清秀，仲有好大進步空間。

餅碎進化︰ 05年， Theresa（左一）仲未加假大眼同長金毛，人氣長期俾 Stephy（右一）食住。

完美女神︰餅碎發展平平， 07年 Theresa轉型，長期戴大眼仔，再以金髮 o架妹 look着三點式，搞到班電車仔狂流鼻血，「升呢」做女神。

由中文鬥到英文
今年書展 Stephy同 Theresa齊齊出書，不過 Stephy俾人狂踩中文差，至早前佢喺一電影節活動上接受報紙訪問時口快快噏咗句：「 I am very thanks them!」，結果慘俾人放上 YouTube笑，事隔一排， Theresa亦以英文打 blog，不過，就解釋冇針對：「我不時都有用英文打 blog！」有冇咁啱呀？

I am very thanks them！(真實對白)
Stephy接受英文傳媒訪問，本來答英文係好正常，可惜文法錯到小學生都不如。《蘋果日報》圖片