Geek友講場
2011年，IT界風起雲湧：雖然Android嘅全球市佔率已超越iOS，但依然有能力呼風喚雨，iPhone 4S同iPad 2繼續俾人狂搶，可惜Steve Jobs偏偏喺呢個時候離世，使前景不明。
另外，3DS同PS Vita兩大次世代手提機亦喺今年先後推出，揭開遊戲機大戰新一頁。唔同gadget都觸發起銷售戰，我哋港人買gadget時亦要同南亞排隊黨開戰，今年所有搶購炒賣潮都係由呢班南亞人造成，對我哋嘅影響，拍得住今年《時代雜誌》風雲人物：示威者對世界嘅影響，所以係今年香港嘅IT風雲人物！
《FACE》Gadget版監修人
903 DJ Donald
2011最有感覺當然係Steve Jobs離世，心痛又惋惜！少少擔心將來產品會唔會冇靈魂。不過講到心痛都係排隊黨，真心用家冇機玩，我寧願加我價都唔想益班炒家，條氣仲順啲！
展望……Nokia可以翻身、Android系統可以試吓學iGadget咁全線統一機底dock位，咁就可以出更多共用嘅配件（充電、喇叭），長遠有得鬥。不過其實乜硬件都係假，希望啲銷售手法都要進化吓，家好似返番古代咁，買乜都要排隊！
最後，但願明天會更好！新年快樂！
南亞排隊黨稱霸雙龍
講全球IT界大事，一定係教主離世，但講到本地港聞，最貼身仍離唔開炒賣同排隊。9月24日 Store落戶ifc，引來過千果粉排隊朝聖，雖然絕對係大事之一，但震撼力點都唔及11月由南亞排隊黨操控大局嘅4S，仲有暑假動漫節排figure兩條人龍！ iPhone 4S首賣日期：8/11-11/11 總人數：1,500以上南亞人比例：約40%
早3日霸頭位
由上年iPhone 4到今年4月尾iPad 2開賣，南亞排隊黨只零星出現於各大電器鋪，但隨住ifc Store搞大型4S首賣，南亞人嘅動員能力終於表露無遺。喺11月11日開賣前3日，已有先頭部隊喺ifc外邊自行搵位排隊，到開賣前1日截龍時，排最頭嘅4成，近乎清一色係南亞同菲律賓幫，就連大陸排隊黨都要屈居佢哋後面，港人更淪落到隊尾。
炒家：南亞人夠可靠
原來班南亞排隊黨係香港同大陸炒家請嚟，日薪大約$400，雖比陀地同大陸人貴，但勝在可靠。好多炒家都覺得，香港同大陸人好易問到件貨值幾錢同點樣出貨，會自己拎去賣，所以近年鍾意轉請南亞人排隊，睇嚟2012年我哋買新iPhone都要繼續同佢哋爭崩頭。
打尖搶figure
早喺4S之前，今年動漫節因有Hot Toys首賣一套三款必炒電影figure，利潤同炒4S一樣高，於是班炒家早已請嚟南亞排隊黨去會展參戰。最慘係一班本地fans用家，最早喺動漫節開幕前嗰幾日已經去到排隊等入場買其他精品，但到開幕前一日竟俾南亞人狂打尖，十幾人變幾十人，搞到佢哋勁㷫，混亂程度唔比排4S弱。好彩，真正想買嗰套figure嘅VIP會員，早喺兩星期前旺角嘅預訂會就已經排隊訂咗貨，當日好他條咁去取貨，唔使同南亞人爭，先至冇乜衝突發生。 動漫節龍日期：27/7-29/7 總人數：約1,200 南亞人比例：約50%
'11 5大熱炒 3-4月
iPad 2 原價：$3,888（16GB WiFi版）最高炒價：$8,000-$10,000 水貨3月中殺到，16GB都炒到$10,000。雖然之後水貨炒價勁插水，但4月尾行貨初推出時，16GB都一度炒到$8,000，慢慢跌價跌咗3個月，先至跌破原價炒完。
7月
Hot Toys figure 原價：$4,140一套最高炒價：$9,000一套一套蝙蝠俠、血獸、Iron Man 3隻，原價各$1,380，最高分別炒到$3,800、$3,200、$2,000，炒幅由144%至275%！
8月
BAPE Superstar 80s 原價：$1,600 最高炒價：$4,800 今年又興番炒波鞋，好似ADIDAS嘅Jeremy Scott公仔鞋、BAPE Superstar別注，仲有近排對Nike AJ XI都勁好炒，利錢高達幾千銀，難怪南亞黨染指。
10-11月
iPhone 4S 原價：$5,088（16GB）最高炒價：$6,500-$13,000 水機10月中到港，最喪連16GB都炒到$13,000，到11月中行貨開賣，炒價先回落至$6,500左右，一直keep到家。
12月
PS Vita 原價：$2,280（WiFi版）最高炒價：$4,000 日本WiFi版斷晒貨，唔少係俾人掃咗嚟香港炒，最早於本月16日到港，炒過$4,000。行貨喺上週五亞洲遊戲展開賣，WiFi版都有人炒到$3,000。
2012 繼續炒
經過兩屆動漫節都俾炒家掃晒啲貨後，Hot Toys今年所有熱門figure已大幅增產趕絕炒家，而免費送畀VIP嘅限定禮品亦都改以「捐錢有得換」方法同一般玩家雙贏，唔使再上Yahoo買炒貨，相信figure界出年可以有安樂日子過。但似乎就冇意欲打壓炒風，而且就算生產幾多貨都唔夠滿足大陸市場，所以下年iPad 3同新iPhone都一定炒硬！
2011教主駕崩
Computer蘋果電腦明明只係一個品牌，不過粉絲對產品嘅忠誠同狂熱程度，直迫宗教級，品牌創辦人Steve Jobs順理成章成為教主。一直盛傳惡疾纏身嘅Steve Jobs，於2011年8月24日宣布辭去蘋果CEO之位，事隔不足3個月，10月5日就傳出教主死訊，全球果粉痛哭，不比家北韓全民哭悼金正日激動，點可以唔揀做「Gadget界年度最爆事件」呢？
畢竟教主一生帶來許多改變世界嘅產品：iMac、iPod、iPhone、iPad；生前各對手都同佢「一死泯恩仇」——微軟Bill Gates認為同過佢共事係最大榮幸、Google首頁為教主而改、Samsung CEO都話佢打開IT產業未來。不過教主最安慰，應該係臨走前同私生女Lisa關係和好。
揭神蹟之謎《喬布斯傳》
教主語出驚人，死後推出之自傳亦有唔少爆發性言論，呢本《喬布斯傳》喺日本開賣首10日，上下兩冊合共賣出超過100萬本，成功登上亞馬遜2011年暢銷書排行榜首位，等《FACE》帶你睇5大果粉必識金句！
發動核戰
iPhone市場佔有率不斷俾Android侵佔，教主怨氣極重咁話：「耗盡蘋果在銀行中400億美元的一分一毫，把這個錯誤糾正。我會毀壞Android，因為該系統盜取了別人的東西。我甚至願意為此而發動核戰。」
笑蓋茨行善
Windows系統令蘋果電腦幾近末路，今日舊對手蓋茨專心慈善事業，教主寸爆話：「蓋茨基本上欠缺想像力，從未發明過任何東西，因此我認為他現時投身慈善事業的日子，比他在科技界的日子活得更自在。」SJ死後同佢稱兄道弟嘅Bill叔，有冇後悔？
死得瀟灑
長期面對惡疾，教主對死亡都講過感想，但都唔夠自傳呢句咁瀟灑：「死亡可能像開關掣，啪一聲你就走了。」
透露新品
臨別前，教主已經為蘋果諗好將來路向：「我希望打造一部容易使用的整合電視機，可以和你們所有電子產品及iCloud結合，是最簡單的互動介面，我最終破解了它。」
最後一句
喬布斯逝世前最後說的話為：「OH WOW ，OH WOW ，OH WOW」
2012新主領軍
以典型恤衫西褲出席iPhone發布會嘅Tim Cook，唔跟教主着三宅一生靚cutting黑樽領，講明畀你知冇驚喜。
4S零驚喜
金正日就有阿仔正恩接班，教主未升天前，亦已放下蘋果退休養病，傳位畀營運總監的庫克（Tim Cook）擔任新主。正當外界日日吹風，新領軍會送上新iPhone 5作見面禮之時，卻只帶來外形毫無新意的iPhone 4S，僅將功能升級，外形同iPhone 4一樣，被直指「不如買張4S貼紙好過」。至於力谷重點語音操控功能SIRI，睇外國人同手機對話，問人生意義，以為好吸引。點知開賣去到亞洲地區即時出事，成班日本人跟部手機雞同鴨講、香港班CHILISH都唔好得去邊，得物無所用。但又唔到你唔信邪，新機冇新意，Steve Jobs就「揀啱時間」宣布駕崩，4S即時被捧為for Steve，全球大熱賣！華爾街一眾分析員都跌晒眼鏡，低估咗SJ之死一樣可以帶動買氣。所以，iPhone 4S仍然係2011年度最震撼新手機，Android家族要拉下台，又要等多幾年。
果徒預測2012 In & Out
Mac友會「MACitizen」會長Derek Ngai估計，來年蘋果頭炮會係iPad3，iPad2於2011年2月開賣，話咁快下星期就2012年1月，果粉自然開始期待新iPad，佢話：「從 1升級到2時，iPad 2重量只減輕15%，主要因為電池仍然太重，希望iPad 3可以變得更輕更薄，吸引度一定大增。」至於Phone 5，Derek希望加無線充電、SIRI推出粵語版。
IN 龍年等iPad3
OUT iPod classic末路
講到就快被市場淘汰產品，應該都係iPod classic，始終「MP3機時代」已逐漸遠去，而iPod classic 唯一的賣點160GB 超大容量，正被 iPod touch 逐步趕上，吸引力漸減，被淘汰係遲早事。
泡菜艦隊圍蘋果
踏入後Steve Jobs時代，唔使專家預言，連睇TVB劇師奶都知gadget界會烽煙四起。HTC、Motorola都多次嘗試用Android機打iPhone，何解係得Samsung Galaxy銀河鑑隊搶灘成功？因為Samsung明白用幾多高規格雙核、3D都只能打宅男市場，轉而整色整水加入大大個靚芒、超輕超薄靚仔機身轉攻大眾化market。自從6月推出巨芒靚仔Galaxy S2以來，仲有5吋巨肺G-Note、史首4.0介面G-Nexus都做成話題，似足摩連奴隊「銀河艦隊」皇家馬德里一樣娛樂性豐富，靚仔球員、超強攻力、花邊新聞樣樣齊，一洗Android「毒男機」形象，難怪GS2全球已賣過2,000萬部，跑出有理！
左至右 型領隊Galaxy S 銷量過千萬之初代iPhone挑戰者。 超新星G Nexus 首部Android 4.0手機，2011年壓軸機王。 美男子Galaxy S2 超薄雙核機王，終能威脅iPhone 4王者地位。
2012年展望雙核OUT 四核IN
以前用iPhone原因係貪佢有apps玩，但Android Market應用程式下載量6個月來已經由10億次幾何級數飆升至100億次，直迫App Store 180億次。如今iPhone獨大不再，必須要鬥機能同外形，估計iPhone 5會玩大芒同4核心，《FACE》預想Android陣營一樣會以相同級數硬件對抗，爆發4核手機大戰。玩家除咗揀機之外，都要留意吓買邊款尿袋，因為機愈快、食電愈甘呀！
網上瘋傳2012出S3
從來網上只有iPhone3、4、5吹水新聞，家已經有人吹緊2012年第1季有4核心Galaxy S3，Android 4.0、4.65吋大芒、仲玩到1,200萬像素鏡頭！
Tablet群揪iPad 2
Android同iOS之戰，由手機打到去tablet，除咗Samsung，其他大廠都喺2011年出過打正旗號要做iPad 2殺手嘅tablet。當中聲勢最浩大梗係Android 3.0機群，不過由全球唔少銷售調查見到，佢哋嘅實際銷量其實唔算好突出，反而出機冇耐就夭折嘅WebOS機HP TouchPad，因割價至US$99.99清貨，引發全球搶購潮，嗰段時間好賣過iPad 2都唔出奇，臨死前終於重擊到iPad 2！
HP TouchPad臨死爆seed 引發廉政行動
HP收購Palm後，將Palm OS改良成WebOS生產TouchPad，點知出機48日後就宣布放棄連tablet在內嘅硬件業務，令TouchPad立即certified。香港16GB行機以$780跳樓價清倉，但好多人都因買唔到而上網鬧爆，更有人懷疑HP員工吞晒啲機去炒，揚言要去廉署舉報。不過近月有傳聞指HP可能會繼續生產普通電腦，會唔會摺埋仲係一個謎。
教主跌眼鏡細芒tablet冇死
上年尾教主狠批過7吋tablet會死，2011年初大廠轉晒出10吋機款，人人以為教主真係靈。點知下半年更新嘅Android 3.2，完全支援番7吋或更細吋數芒，令7吋Android tablet復興，教主死先佢地都未死！
IT專家方健僑專利官司持續
今年同各大廠商互相控告對方抄襲同侵犯專利嘅官司，全球夾埋大小不下幾十場，Galaxy Tab仲搞到禁售，戰果互有勝負。方健僑認為呢啲官司戰會延續到2012，「Google收購Motorola，就係睇中Mo記持有嘅多項手機專利。有咗呢啲架生，Google就可以告番轉頭。」
次世代手提機大戰
Wii、PS3、XBox360、NDS、PSP，好聽就五強鼎立，難聽就幾年冇新機，今年悶局終於由兩款次世代手提機打破！人算不如天算，喺3D熱極速冷卻、日本海嘯影響購物慾兩大外在因素影響下，一向手提無敵手嘅任天堂，年首推出3DS喺冇對手下出閘脫腳，加上遊戲陣容唔吸引，如《街霸》、《Winning》等都係扮3D移植作，終在8月減價求售；苦苦力捧至Sony四核新手提PlayStation Vita推出前，竟又俾佢彈番上嚟，喺日本大熱賣，欲知鹿死誰手，還看下年分解。
3DS出閘甩轆
以裸眼3D機能掛帥嘅3DS今年2月26日開賣，1個月後於歐美發售，首賣成績輝煌，不過開賣不久即遇日本世紀海嘯，加上遊戲陣容疲弱，銷量急劇放緩。任天堂大刀闊斧喺8月宣布大幅度減價10,000日圓（約1,000港元），明言係賣一部蝕一部，對於一部推出半年未夠嘅主機實屬罕見，此舉令任天堂股價大跌5%，唔少人已視3DS為任記失敗之作。
PSV四核挑機
另一邊廂，PlayStation於6月公布PSP後續機PlayStation Vita，四核心強勁機能畀到玩家唔少憧憬，加上創新前後觸芒操作法，全球一致睇好佢年尾打敗3DS。誰不知3DS喺12月頭卻翻生成功，憑住《Monster Hunter 3G》創出3DS game一週最佳銷量、月內賣過百萬之偉績，加上《孖寶3D》、《孖寶賽車 7》非常好賣，一場本來讓3球必win大戰，忽然變成55波！
好在PSV 12月17日日本開賣亦做出大賣32萬靚數，雖未如3DS首賣數量亮眼，但比起PSP已大有進步。呢場仗家冇一邊有絕對優勢，雙方喺2011只會更加落本出勁game，玩家有福！
Game界五大蝦碌
今年遊戲界特別多蝦碌事發生，不過唔緊要，胡杏兒都拎視后，昨日之囧也可成明日之花，一齊回顧囧事展望將來。
PSN遭入侵 停工2個月
2011年4月20日，PSN遭黑客入侵，77萬個註冊客戶受影響，恐有信用咭資料外洩之虞。Sony即刻停止PSN服務搶修，足足到6月先重新啟動。
英國暴動 Sony貨搶手
2011年8月倫敦暴動，有暴徒街頭強搶少年PSP，Sony配送中心亦被縱火。最離奇係目擊者話見到暴徒偷咗幾十部Wii走。
膝蓋中箭 成game界潮語
《Elderscoll 5 Skyrim》被多個遊戲網評為年度最佳RPG，遊戲入面每個守衞都會講出台詞「我在膝蓋中箭之前都是像你一樣的冒險者...」，「Arrow in the Knee」一度成為網絡潮語。
Game界紅人 日野社長「乳首暴走」
Level 5社長日野晃博以《雷頓教授》走紅，但2011就出晒事，主理《Gundam AGE》爆出高達史上收視新低，年中喺Twitter多次post火星文怪字留言，原來係誤將手機放喺胸口個袋所致，網民恥笑為「乳首暴走」（乳頭），邪到咁，好心去拜吓四面佛啦！
《毀滅公爵》廢到自毀
歷時14年先完成嘅《Duke Nukam Forever》，做咁耐仍然係「糞game」一隻，被多個game網選為全年最失望遊戲、網民狂踩，宣傳公司The Redner Group於Twitter公開反駁指game迷太苛刻，最終被開發商2K炒魷。
2012遊戲紅人預言 SCEH董事項明生：「今年香港一定得」
躍升為SCEH首位華人董事嘅James項明生，2011年夠晒搶鏡，點睇來年game界發展？佢話：「今年係AGS10周年，SCE全球CEO Andrew House首次到場，暗示香港市場日益重要，今次PSV已早過歐洲2個月發售，相信2012年，更多新遊戲都會率先喺香港發售。」早排參選做特首選委嘅James，笑言若候選人唐英年上任，一定要兌現承諾多加投資創意工業，希望香港有更多原創遊戲。
XBox360女波士Anna：「360繼續體感」
傳聞中XBox360後繼機亦已經有相當開發度，可惜我哋暫時未能喺Microsoft香港有限公司消費及零售業務部Head of Marketing周瑞娜口中套料，佢表示XBox360無掣體感系統Kinect非常成功，感恩節期間創下80萬銷量佳績，全年勁賣1,000萬部，來年單靠Kinect都有排玩：「Kinect幫XBox360打入家庭用家市場，我哋搵古天樂做代言人，目標係谷到Kinect更入屋。家傾緊同時裝零售店合作，搞玩Kinect試衫；此外仲開發緊Kinect Windows版本，希望同學校合作，畀小朋友製作Kinect應用軟件。」
網民力量新定位
以前一講起網友，多數都係負面話題，唔係起人底、就係出賣朋友呢類行為，呢類風頭人物就好似Andy Warhol話齋，名氣只得15分鐘，仲要次次都物極必反，最終反被網民起底，身敗名裂。不過今年網上討論區開始出現較多正能量，比如近日捧紅TVB遺珠《天與地》，證明高登仔其實好有品味；網友仲利用創意搵飯食：好似神獸咭、仲有林氏兄弟等網片導演，推動創作，值得嘉許。
網友掘財路
一向創意無限嘅高登友，除咗有「向西村上春樹」等名作家，靠甜古出書發圍，又有高登友出小丑神精品掘金。不過講到至有創意，必選由高登會員「糊手然塗」出嘅高登神獸咭。呢位網友勁玩食字，將大量俗語同網上術語變成神獸，配埋勁貼題嘅神級改圖，一出即勁hit。結果於8月推出《高登神獸戰》咭牌game，惡搞升呢成《三國殺》之流嘅產品。
煲水謠言「盲剷Line」
3月日本地震兼爆核電廠，阿婆阿嫂盲搶鹽勁俾網民開恥笑區，但轉個頭又有唔少所謂「智能手機用家」，發出極低能嘅低智能流言煲水整死日本即時聊天app「Line」。呢個app可算命途坎坷，突然喺fb興起人人搶住裝，隔一陣傳出玩app會收SMS錢謠言（已證實為流料），搞到全城瘋狂剷app，仲一度將個app拉下架。呢件gadget界笑話，網民認為可恥程度與食鹽可以防輻射的超低級錯誤相等，譽為「盲剷Line」事件！
熱煲《天與地》
無綫倉底劇《天與地》大玩食人主題，極之破格。可惜師奶唔buy，搞到收視慘淡，得廿幾點。好彩有班網友日日撐，話好睇到天上有地下無，所以即使得廿幾點，都成功逃過腰斬命運。網友解釋《天與地》收視唔好，係因為新一代喜歡上網睇電視，去到TVB睇劇網MyTV.com一睇，fans留言的確比其他劇集更長更有point，佢哋仲夾埋一齊反擊啲無理勁踩《天》嘅網民，其中一段寸班C9太霸道，一年咁多套劇，畀幾套主題較深澀都要狠插，可見香港網民唔係一味憤青，都講道理。
必識5大網絡紅人國際影星羅樂林
一向做開甘草嘅TVB藝人羅樂林，2011年4月6日俾網友發現，於同一日不同劇集內死足5次，成為網路熱話之外，仲傳到外國，得到英國、美國、甚至冰島媒體報道，升呢成國際影星。
聲級藝人杜汶澤
電影《3D肉蒲團》被網友勁插，4月20日，YouTube有段《杜X澤聲音演譯3D肉蒲事後感》聲帶流出，由阿澤讀出高登仔激動感言，爆笑度極高，被網民瘋傳，但就辣㷫該片老闆蕭定一，搞到要道歉。
海綿寶寶翻唱
自今年7月網民瘋傳廣告音樂首《唸你》MV，由於風格太復古，唱法與表情均極之誇張，引來網民強力恥笑。而主角劉子千亦慘變萬能key，惡搞片段不斷湧現，翻唱者包括海綿寶寶、初音、唐三藏等。
苦幹幹出禍
玩具大王蔡志明個細仔蔡加讚（Karson），6月時接受週刊訪問，大字標題叫人「成功需苦幹」，但文內出現極多次父親、daddy字眼，網民恥笑佢係「成功需父幹」，該照片更成功上位成萬能key圖。
頭文字B搞上庭
YouTube突然流出一段名為「頭文字B」片段，見到BB站在父親大髀上揸大膽車，結果被網民大鬧父母「腦殘」，更得網友合力發功推上報，更成功將呢對父母繩之於法。
2012將現網絡廿三條高登CEO狠踩
有網絡廿三條之稱的《2011年版權（修訂）條例草案》，分分鐘於2012年落實，網友惡搞分分鐘被指侵權，二次創作被扼殺，高登CEO林祖舜都要出聲！
二次創作係表達意見的一種方法，假如受到限制的話肯定會對言論自由及創作有很大的打擊。我係抱較悲觀態度，而我最擔心係此例會影響有創意的朋友，因為怕犯法而不去創作。假如因為呢條條例，影響到二次創作風氣不再，咁幾年後至再修訂免責，已經冇晒意義！ ####
南亞排隊黨
神啊∼賜我4S∼∼
南亞排隊黨不分男女老嫩，至少喺ifc外邊天橋露宿1日1夜，仲要冒住去完廁所可能歸唔到隊嘅危險先買到4S，其實啲錢唔易賺。
炒家等到自己請嗰個南亞人買機時，就畀疊金牛過佢找數。每人限買5部，當日每部16GB賺$1,500，扣除人工，一名排隊黨至少幫炒家賺$5,500！
不過都有大陸炒家請錯貪心嘅非洲幫，知道4S炒價後就想要貨唔想要錢，搞到炒家要報警求助。
最近Samsung反而搵棟篤笑印度人Vivek拍港版GALAXY Nexus廣告，寸買4S要排隊，擺明玩嘢！
每人限買一套figure，貨價$4,140，當場交畀炒家，轉手最高可賣到$9,000，減埋排隊黨人工，炒家淨袋$4,400，有4S咁好執。
今年南亞排隊黨仲踩到潮流界，就連Nike同adidas限量版波鞋，都俾佢哋攻陷埋，港人買乜都咁難！
11月尾信和game鋪預訂Vita時，有大班南亞人排隊。但去到AGS時炒價已回落，且每人限買1部冇肉食，排隊黨冇晒影。
連AKB48嘅明星相都炒得起，大約每張由$24炒到$125，下年雅加達隊JKT48出道，南亞人會唔會炒埋一份，同90後搶前田敦子寫真照呢？
先達大拆Lo哥唔好講iPhone 5，我睇就連4S都至少炒到下年第1季。雖然傳緊大陸最快下個月就有得賣，但同i4一樣，唔夠貨實繼續炒。
Steve Jobs
同日主頁轉成Steve Jobs 1955-2011圖片，紀念教主去世。
等咁耐，香港間蘋果專門店於2011年9月24日正式開幕，但事隔不足十日，就傳出教主死訊，本地果粉着住件開幕紅tee，於店外痛哭。《蘋果日報》圖片
Tim Cook
SIRI可將言語變成指令，由電子秘書為你搵料，其實唔係原創技術，而係買斷一款app store軟件收為己用之契仔。
即使擺明零新意，iPhone 4S依然炒價高企，呢啲咪SJ神蹟囉！
網上流傳極多日本人試SIRI失敗的片段，下面字幕意思係「講乜春啊呢條友」，笑死！
到家都冇乜iPad3風吹出，如果真係出到好似網友設計呢張概念圖咁靚，炒上3萬冇難度。
當年出第一代iPad，外形被狠批冇新意，睇番呢張惡搞圖，本來2012 Steve Jobs會出部超巨型iBoard，2014就出地氈iMat，估錯晒！
Derek Ngai
從來只有iPhone殼會放出嚟賣，但Galaxy S2成為新一代殼王，家落先達等手機鋪都見到一大堆S2殼。
Galaxy係Samsung Android機代號，大中細體積、高中低價位都見佢身影，近日又以5吋Galaxy Note打開新市場。
Galaxy S賣千萬部，加上S2二千萬部，Samsung話Galaxy系列佔全球智能手機市場23.8%，比蘋果嘅14.6%多出接近一成。
S2用家Tracy S2超薄機身更深得女人心，用家Tracy讚：「用咗iPhone4成年，試玩過朋友部雙核機後決定轉用S2，貪佢夠快夠靚，相反4S外形唔變仲一街都係，覺得Android陣營有機款揀可以表現用家個性。」
TouchPad水貨初到港時曾賣過$5,000，但個幾月後，行貨就以$780清貨，之後又俾人炒番上$2,000，係本年度最傳奇嘅tablet。
7" PlayBook BlackBerry都將自家手機OS演進成tablet OS，生產出呢部PlayBook，可惜打破唔到只得小眾受落嘅命運。 •BlackBerry Tablet OS •4月推出
7" HTC Flyer 比Galaxy Note更早玩筆控，更因HTC老闆入主TVB關係，經常喺節目中亮相。 •Android 2.3 •5月推出
5.5"×2 Sony Tablet P 首創5.5"雙芒加摺合機身設計，成部NDS咁款，水貨已經抵港，行貨定於下年1月開售。 •Android 3.2 •10月推出
每逢有新機出日本一定有排隊黨買機，3DS首賣成績唔錯，日本國內賣出36萬，美國及歐洲分別賣出44萬同30萬。
自踏入2011年後半年，任天堂股價不斷下滑，分析員更認為任天堂冇可能靠3DS力挽狂瀾。
PS Vita 開賣後成績理想，但卻接連出現無故hang機報告，英國BBC都有報道Sony謝罪嘅消息。
任天堂公布有芒大手掣新機Wii U，預計明年中推出，SCE又會唔會有新家用機PS4呢？
古天樂賣廣告打Kinect，好在冇出現「撚太撚」呢類奇怪國語對白。
我小丑神會繼續照住你哋！
《高登神獸戰》設計跟足原作，仲有埋遊戲玩法，好認真。
高登神獸咭面世後，就引來美麗華抄橋，移植落宣傳片。
日本製聊天app Line比起WhatsApp玩法更多，可以send得意sticker，即時令女user為之瘋狂。
多得呢段喺facebook瘋傳的謠言，搞到全城一夜間狂剷「Line」。
《天與地》故事頗似影射Beyond，4個主角玩band，其中一個早逝，令好多20尾、30頭網友極有親切感。
去到TVB睇劇網MyTV果然好多人留言讚《天》，但也不乏無理勁插之人。
留言列表
