獻唱《天與地》街頭樂隊被趕網民︰事件印證 This city is dying
【本報訊】電視劇《天與地》中樂隊三子終能在啟德搖滾音樂節一嘗心願，合奏《年少無知》一曲，維持秩序的警員也相當投入聽歌。現實卻完全相反，有本地樂隊在銅鑼灣街頭表演此歌曲引來圍觀，卻被警方驅趕，執勤警察指：「街頭賣藝同行乞冇分別」。片段在網上流傳，不少網民慨嘆本港街頭藝術欠缺空間，在街頭表演就如歌詞一樣：「只可惜生活是一堆挫折，只可惜生命是必須妥協」。記者：盧勁業
獨立樂隊「冬密語」於本周一元旦翌日補假，在百德新街的行人專用區表演，樂隊主音方欣浩表示，曾在上址街頭表演也沒問題，約 20人圍觀，並沒阻街，對被趕感奇怪，「當時大約兩點鐘，我哋一唱《年少無知》就好多人停低睇，有途人仲攞口琴出嚟 jam歌，點知突然有警察嚟阻止，話有人投訴我哋喺度表演阻街，問我哋有冇申請牌演出」。
放大圖片 
獨立樂隊「冬密語」本周一在銅鑼灣行人專用區唱《年少無知》，即引來途人圍觀。撮自 Youtube
放大圖片 
主音方欣浩（右一）問驅趕原因，警員指：「街頭賣藝同行乞冇分別」。
警︰賣藝同行乞冇分別
方欣浩表示，警察指若沒人投訴也不會要求樂隊離開，「警員仲話其他警區佢哋唔知，但銅鑼灣就唔可以做街頭表演，又話香港有法例規定唔畀喺街頭賣藝，我哋咁樣做同行乞冇分別，聽完之後就覺得好嬲」。他不理解不同警區為何有不同處理手法，慨嘆說：「和諧唔係一百個人講同一句說話；和諧係一百個人講一百種唔同既說話，而互相尊重。希望香港可以容納更多不同聲音。」驅趕片段被上載 YouTube及在 Facebook廣泛流傳，有網民問：「這城市需要快樂……為何要打壓快樂？」不少人認為事件印證劇中名言：「 This city is dying」。有網民怒斥：「香港嘅街頭只容得下信用卡同寬頻推銷，卻容不下 jam一首歌」、「香港對待藝術的態度一日不改變，甚麼亞洲國際都會只是妄想」。前年在街頭表演被控阻街，最終被判無罪的街頭表演藝人「有趣先生」蘇春就表示，自從其案件被傳媒廣泛報道後，警方及食環署等部門已發出內部指引，「個別執法人員客氣咗，但就限於一區區，唔統一」。他感到部份前線執法人員的觀念有問題：「可能係因為中國歷史文化一直都將街頭表演同行乞扯上關係，但係就好唔尊重表演者。」警察公共關係科表示，警方當日接獲投訴指有人演奏樂器籌款造成道路阻塞，到場調查後發現並不屬實，只記下負責人身份證明文件以作記錄，有關人士其後離去。 
網民在 facebook熱談事件，網友質疑政府能容忍街頭推銷，卻容不下街頭 jam歌。
留言列表
