大病初癒的林文慧，身形無乜走樣，但為養好身體，已絕跡夜場。
梁漢文急籌醫藥費 梁漢文老婆林文慧乳癌
近年憑 Big Four翻身的 Edmond梁漢文，事業運始終不及其餘三兄弟，去年十月老婆林文慧（ Karen）更被診斷患上乳癌，幸好發現得早，但為阻止癌細胞蔓延， Edmond馬上安排太太做切除乳房腫瘤組織手術，並接受電療療程。
老婆病重， Edmond積極面對，細心照顧太太陪她接受治療，近日已完成所有療程，但未來五年仍要不時監察身體狀況。
由於醫藥費不菲， Big Four三子為力撐好兄弟，除不停搞巡迴騷，蘇永康更引薦 Edmond加入任賢齊公司，安排狂接內地酒吧騷賺錢，希望俾太太一個更穩定生活環境，一齊共度難關。
本刊向梁漢文求證老婆患乳癌一事， Edmond一再強調：「呢件事我無回應嘞！」
梁漢文的四十歲妻子 Karen林文慧，去年十月被診斷患上乳癌，幸好發現得早，只屬乳癌初期，經醫生建議後， Karen即時入養和醫院進行切除乳房腫瘤組織手術，手術後再接受電療療程，現時已經康復。不過，仍要定時覆診，接受為期五年的監察期。
「 Edmond好錫太太，知道寶寶（ Karen暱稱）有 breast cancer（乳癌）， Edmond都好難過，加上寶寶情緒唔穩定，但 Edmond身為男人點都要撐住，可能佢性格本身比較樂觀，可以好積極面對，每次都陪太太做電療，又同寶寶一齊參加癌病基金會活動，同其他癌症病人交流，互相扶持。」
除了老公背後力撐， Karen好姊妹徐濠縈更介紹她睇城中名醫。
「阿徐同寶寶好 friend，即刻介紹咗個乳癌權威醫生俾寶寶，好在個病發現得早，只係初期，不過為咗預防復發，手術之後，仲要做一段時間電療，嗰段時間對病人嚟講係最辛苦。」知情者說。
帶病力撐
去年十二月，黃浩爆有藝人在他旗下餐廳公然吸毒，被影射的徐濠縈，在十二月十二日召開記者會反擊黃浩，當日更搵齊有份出席飯局的藝人現身記者會，當時正在接受電療的 Karen為撐好姊妹，一臉倦容帶病出席。
「阿徐同黃浩單新聞爆出嗰段時間，啱啱開始做電療，身體比較虛弱，但為咗撐老友，寶寶自己主動話要嚟，當時佢塊面明顯浮浮腫腫，著好多衫個樣又落晒形，班朋友見到佢副病樣都有啲擔心，但唔係個個知佢發生乜嘢事。」
去年十二月，徐濠縈與何超儀召開記者會反擊黃浩， Edmond老婆 Karen現身撐老友，帶病的她面容憔悴。
模特兒出身的 Karen，平日打扮潮爆，因化療身體差，要著厚褸保暖。
本月初，梁漢文與太太林文慧到 IFC行街，在戲院兜了一圈，揀唔啱心水電影，最後一同離開。
生仔有希望
雖然全球罹患乳癌的女性人數不斷上升，但其實乳癌比一般癌症，較容易早期發現，一般女性當發現胸部有硬塊，只要及早對症下藥，康復機會相當之高。近年臨床治療發現，乳癌的十年存活率平均達百分之六十，而據家庭醫生關嘉美表示，如果能在早期做手術割除癌細胞組織，康復後完全唔會影響生育及餵人奶，除非腫瘤有攻擊性，或發現得遲，要接受化療或長期食藥控制病情則例外。
Karen（箭嘴）與好姊妹徐濠縈， 11年孖住出席時裝活動，更一起擺提腿甫士影相。
今年農曆年，剛加盟小齊公司的 Edmond，與公司兄弟姊妹齊齊拍賀年照。
保守秘密
事實上， Edmond一眾兄弟大半年來一直守口如瓶，未有向外透露 Karen病情，只有幾個親密好友得知事件。「寶寶有病件事，班兄弟好口密，其餘 Big Four三兄弟，好擔心梁炳應付唔到醫藥費，嗰時梁炳就嚟約滿金牌，又未有新動向，真係好徬徨。」
當年掌管金牌大風的黃柏高被降職，即使 Edmond由新老闆出手留人續約，但公司裡面立立亂，令 Edmond事業更加停滯不前，白白浪費三年光陰。
「阿公（蘇永康暱稱）見 Edmond咁樣，於是引薦佢加入小齊（任賢齊）嘅大岳娛樂，今年二月先簽約，小齊公司喺內地人脈好廣，呢段時間，幫 Edmond接咗好多酒吧騷賺錢，等佢唔使憂心太太嘅醫藥費，仲可以儲多個錢傍身。」
Eason跟梁漢文十分老友，得知 Edmond老婆患病， Eason不時作出開解。
7月 29日， Edmond與老豆一齊睇曼聯對傑志，捧偶像場，可以令他放鬆一吓心情。
組成 Big Four，四子發展再現𥌓光，梁漢文收入亦大增。
六月雷頌德音樂會， Edmond與千嬅合唱，老婆未見現身支持。
大起大跌
梁漢文 89年新秀出道，事業一直載浮載沉。 03年憑《七友》橫掃多個樂壇歌曲大獎，可惜後勁不繼。其實梁漢文入行後遇過唔少低潮期， 01年試過因欠七萬元供款，價值 136萬的保時捷 dream car被財務公司拖走，同年華星唱片執笠，一度轉為擔任蘇永康演唱會的樂隊領班。
直至近年他和許志安、蘇永康、張衞健組成 Big Four，多次舉行演唱會及世界巡迴，人氣開始回升之餘，今年二月更簽約任賢齊的大岳娛樂。現時與太太租住羅便臣道單位的梁漢文， 97年以 565萬買入的九龍塘新餘村物業，持貨至 08年以 650萬賣出，之後未有再買賣物業，是 Big Four四子中，唯一一個無磚頭揸手。
暫停生仔計劃
Edmond與太太拍拖十年，○八年十二月拉埋天窗，二人一直非常恩愛，喜歡小朋友的 Edmond，一一年更透露太太開始調理身體，打算積極造人；但世事難料，自去年患上乳癌，因為電療和藥物影響，亦被迫將生育計劃押後。
「 Edmond好體貼寶寶，佢唔想寶寶有心理負擔，依家會話生兒育女嘅事隨緣啦！佢唔心急，等個天安排喎！」二人的身邊好友說。
入行二十多年，梁漢文即使事業運一般，但今次太太患病，令 Edmond更加關懷癌症病人，月前便親自設計兩款保溫杯，為乳癌基金籌款。
「今次件事， Edmond體會到有好多乳癌病人需要幫助，佢希望作為藝人，可以出一分力幫到人。上個月，佢拉埋許安、蘇康出席《關•乳•愛 Breast Concern Action》啟動儀式，想更多人關注呢個基金，幫助有需要嘅人。」
本週二（ 30/7）， Edmond與老婆一同到九展睇世界拳王終極賽，面對記者鏡頭， Karen刻意用手袋遮胸。
03年，梁漢文憑《七友》闖上事業高峰，在頒獎禮擸走不少獎項。
本週一（ 29/7）傍晚，梁漢文到士丹利街 lL COILPO整頭髮，將車泊在路邊不久即被抄牌，十分黑仔。
留言列表
