明星靚相大分享☆

林志玲夥拍木村拓哉演出嘅富士電視台全新日劇《月之戀人》，第一集收視成績唔錯，有22.4％，成為收視冠軍，不過去到第二集，雖然有木村同Chiling嘅兩分鐘激吻重頭戲，收視反而下滑，得番19.2％。
收視企唔穩，聽聞觀眾嫌劇情老土，睇完頭一集加預告片，已經估到七八成劇情喎！不過點都好啦，Chiling呢次胸降日本相當成功，將班日男電到暈陀陀，上網四圍摷Chiling嘅卡娃依肉照同新聞，驚人發現原來呢位台灣女神已經35歲，班日男個個O晒嘴，話佢個樣唔似咁老，仲用「奇蹟的35歲」形容Chiling。

《月之戀人》頭兩集劇情講鄉下妹Chiling原本响傢俬廠打工，點知公司俾木村收購搞到失業，成班工人於是圍住木村架車示威，Chiling仲俾人逼到面容扭曲，後來木村嘅傢俬王國要拍廣告搵代言人，一眼睇中Chiling，於是帶佢返日本學做model，但Chiling覺得俾木村利用，於是主動獻吻同求婚，無非想報仇。

日男對Chiling大起底，仲搵到呢位台灣女神由讀書到而家嘅玉照，卡娃依呢！

Chiling高過木村係人都知，所以佢上次現身《SMAP X SMAP》節目，專登彎一彎條腰再著平底鞋遷就，但就俾日系網民話佢身為模特兒居然駝背，紅裙襯平底鞋又話冇品味，唉，真係好人難做！

好老實，木村「收視王」呢塊金漆招牌近年唔係好掂，舊年套《Mr. Brain》平均收視得20.06％，上唔返去佢舊作《HERO》平均34.2％嘅佳績，所以今次木村會唔會陀衰Chiling，好難講！

扮醜女
激嘴