Lavina Carol寫真觸礁

書展寫真戰倒數五十一日，兩大「咪神」周秀娜與Jessica C.如箭在弦，至於被睇好成為第三勢力的「浸大E神」楊梓瑤，卻極有可能臨門「撻Q」；而去年成為寫真奇葩的「E奶」鍾蕙芝，因與經理人鬧翻被雪，注定與楊梓瑤「雙E為命」。

原本走勢不俗的楊梓瑤，其寫真集面臨難產困局。

有辦你睇，周秀娜自去年登上寫真女王後之吃香程度，後起之模對這寶座又怎不虎視眈眈？被視為力足挑戰周秀娜和JC的「浸大E神」楊梓瑤（Carol），在距離七月廿一日書展開幕不足兩個月之際，其寫真的準備工作卻近乎零。

之前有傳Carol到墾丁或澳門取景拍寫真，卻只聞樓梯響，外間盛傳其公司遲遲未肯為她的寫真動筆簽約，連攝影師、場地、服裝等基本需要亦未傾妥，其寫真隨時「爛尾」。她的經理人亦直認出書有難度：「真係有少少擔心，因為好多細節未傾好，不過已有Sponsor（贊助）。」

楊梓瑤從無挑戰周秀娜之野心。

保持E級戰鬥力

本報致電Carol，問她若出書「撻Q」會否感可惜？她說：「都唔會嘅，因為我都有其他嘢做，我五月中先考完試，嗰陣已一直傾緊，但要七月出書真係幾趕，我收到風周秀娜佢哋都影晒，如果出得成，我應該係最遲嗰個，但時間真係好Tight。」問是否被周秀娜和JC嚇怕？她說：「我一向與世無爭，佢哋有Model經驗，周秀娜又有咁多fans，我只係新人爭唔到。」雖然寫真隨時胎死腹中，但Carol為保持E級上圍的戰鬥力，自爆每日舉啞鈴Firm胸：「我依家日日都舉，伸直九十度咁舉，又會跑步做運動，但一定要戴運動Bra，唔戴會墮。」

早前勁吹到日本拍攝寫真的鍾蕙芝（Lavina），一早已經被舊拍檔胡心諾（Rainbow）飛起拍攝寫真。有指Lavina早前與攝影師會面時，遲到早退，與經理人Admond關係愈搞愈僵，終被放入雪櫃，不過她否認該傳聞。

去年人氣高企的鍾蕙芝，近期曝光率急降。

嫌太多加工玉器

問到寫真是否擱置？Lavina說：「其實係我自己決定，公司亦冇話唔畀我出，佢哋都想以利益為前提嘛！不過我覺得自己上年已出過，加上今年寫真風氣唔天然，我係天然玉器啫，其他玉器都好似加工！」對於推Job問題，她說：「我以私人理由推過幾個工作，自己都覺得可惜，但我同Admond關係都OK。」

對於Lavina被雪的消息，Admond說：「我哋幫佢搵咗攝影師好耐，都傾唔掂，惟有尊重佢，但我重申冇雪佢。」

Carol

年齡：21歲

三圍：34E、24、34

身高：163cm

學歷：浸會人文學系副學士

Lavina

年齡：21歲

三圍：34E、25、36

身高：166cm

學歷：理大廣告設計系副學士

Rainbow交情唔深冇感覺

胡心諾（Rainbow）和Lavina去年拍住上推出寫真集，今年Lavina淪為棄將，Rainbow則「升呢」做大師姐，率領五位嫩模合組Donut推出《夏之日記》寫真集。對於Lavina冇得出寫真，Rainbow淡然說：「冇乜特別感覺，可能佢唔出都有其他發展。之前孖住工作都係應客戶要求，私底下冇拗撬，但亦好少一齊出街。」

之前Rainbow與Lavina拍住上，原來私下交情不深。

問到Lavina是否扭計？Rainbow說：「唔知，我覺得佢份人幾有主見，對工作要求高，但性格就倔強咗啲。」而Donut的寫真集將於六月九日推出，Rainbow興奮地說：「我哋應該係今年最早出寫真集嘅女仔，咁多個女仔各有特色，唔怕貨比貨。」

剎那光輝無以為繼

長江後浪推前浪，一代o靚模勝舊模，去年有份參戰書展的Kama、Melody及Monique於今年就不會有新作。去年寫真戰打入三甲熱賣的Kama，今年人氣大幅減退，而且早前發胖了不少的她出席活動時更被指有整容之嫌，現時她只會間中出席活動，最近她在網誌上表示去了泰國旅行。

至於去年與Yumi並肩作戰的Melody，一場「非禮疑案」曾令她脫穎而出，不過近期已鮮有曝光，據其經理人表示，她目前沒有特別工作，只修讀課程自我增值。

而因吸毒案件後「避世」的Monique，有傳她正在內地讀書。