宅女羽翹被騙 IS F密室狂呼
相約樂壇新人羽翹（ Ava）訪問前，對佢實在唔多熟識，上網搜尋佢嘅成名作──「 YouTube教化妝」，咦，有啲 o架味，身材高䠷均勻，即刻打算整架辣跑佢嘆吓，點知經理人堅稱佢係乖乖公主型，好，一於借架外表斯文，卻暗藏 423匹馬力辣偈嘅 Lexus IS F呃吓呢位宅男女神，結果？懵宅女當自己坐緊過山車，由上車叫到落車！記者：許維雅攝影：林栢鈞服裝： http://Puxzycat.com提供髮型： Jayyeung@Hair Corner化妝： Lisa.C
其他副刊影片 四座位啱啱好 放大圖片 
■幾鍾意流線感頗強嘅側鏡，加埋 F標記突顯身份。
入得娛樂圈，總想大紅大紫，樣靚身形好嘅 Ava又識作曲填詞，應該大有本錢，但佢偏偏大唱反調，「喺呢一行，即使你好畀心機做，都未必有成果，無謂畀太大壓力，最緊要享受過程。」門面說話？咁又未必！細細個已經學彈琴跳舞，喺 YouTube睇佢教人化妝嗰堆化妝護膚品，你就知佢背後有個小康之家支持，唔憂柴唔憂米嗰隻。自認係宅女，懶出街，最大嗜好係煲劇、對住部電腦，對車幾乎一無所知係意料之內嘅事，幸好，仲講得出自己鍾意嘅車款，「我鍾意福士甲蟲，車形夠可愛， MINI Cooper都 OK，但第時買車一定揀白色。」 Ava呢個儍大姐更自嘲自己左右不分、手腳唔協調，所以唔多敢揸車怕累人，不過就覺得有架車可以載屋企人周圍去會好開心。「有人講過男人買車係睇外形睇性能，女人買車就係買張凳，所以鍾意特別多凳嘅七人車，我都認同，不過我覺得四個位啱啱好。」咦，懵唔晒喎，四座位嘅凌志豪跑 IS F唔知會唔會因此得佢歡心？
放大圖片 
■ 19"炭灰色輪圈配合 Brembo活塞卡鉗，造出唔少搶耳嘅甩尾聲。
放大圖片 
■略嫌車尾燈形狀普通，扁尖番啲襯番頭燈會較好。
放大圖片 
■ IS F個樣幾斯文都好，其四出式尾喉其實已經出賣咗佢。
放大圖片 
■俾 Ava試着引擎，佢大讚有快感，終於明白點解男人咁鍾意車。
第一次興奮尖叫 放大圖片 
■錶板嘅藍光指示針喺着車時會轉一個圈。
備有 5公升 V8引擎嘅 IS F屬市場罕有車款，二手價都要 80幾萬嘅豪華房跑車在側， Ava未見特別興奮，全因 IS F嘅低調外形完全掩蓋佢 423匹馬力嘅驚人威力。為咗等 Ava親身接觸辣車嘅魅力，逐步進逼計劃開始，先叫佢坐上司機位感受一下，「嘩！咁多掣，好複雜呀，前面呢幾嚿嘢好似揸飛機咁，好驚呀！」再示範畀佢睇點開引擎，「嘩！（大叫 1秒）好驚呀！咦，呢下聲好似幾有快感，唔怪得男人咁鍾意揸車啦，嗰種操控慾都有幾大滿足感喎。唔怪得啲男人成日叫啲車做老婆啦！」叫得咁興奮，當然唔好畀佢停，叫代理哥哥載佢遊一轉，「嘩呀呀（驚叫聲無停過），估唔到佢咁勁呀！我覺得自己好似坐緊過山車，好好玩！哈哈哈！」 0至 100km/h只需 4.9秒，再有 8速+/-波箱協助下，嗰種爆發力強行迫使我哋啲背脊貼晒落張凳度，其實我都想叫埋一份。 Ava嘅第一次就咁畀咗代理哥哥，我講跑車之旅呀。
放大圖片 
■閃閃發光嘅白碳纖中控台為內櫳生色不小。
放大圖片 
■豪跑最大好處就係有馬力唔會無咗個尾箱。
放大圖片 
放大圖片 
Lexus IS F規格
引擎： 4,968cc V8馬力： 423hp/6,600rpm扭力： 51.5kgm/5,200rpm傳動： 8前速 SPDS半自動波箱，後驅年份： 08年 行車里數約 1,000km二手價：$869,000（當年售價：$1,200,000）查詢：富利堡（ 2877 6700） 
■自言手腳唔協調、見掣就驚嘅 Ava首次接觸 IS F，安於做乘客玩自拍。
留言列表
