面對面
淚公主 詩雅
2010年06月23日
25歲的衛詩雅， 08年簽約英皇後，為免與歌星衛詩混淆，改名詩雅。
不管帶不帶姓，都不算一見難忘星味重的藝名；又是身高 158cm、上圍 32A，事業線短人成呎，詩雅偏偏一出道就在毫無背景後台下搶到《盛裝舞步愛作戰》女主角，兩年來連拍 5部愛情電影 3套擔正，包括剛剛上畫有大膽演出的《前度》，原因無非她那張港女少有、酷似少女漫畫主角乾淨冰涼的面孔。
「媽咪說，從小我就是一個冰造的女仔！」
父親是地盤雜工、家住上水太平村、中五學歷的詩雅， 18歲入行賣鑽石、 20歲已經一個人飛印尼賣幾百萬上落的鑽石鏈； 23歲為興趣全職入行拍戲，新片上畫民意一致認同她才是最驚艷最搶鏡的一個，她卻說有一天還是會回去做生意：「幾年前姐姐遇到交通意外，我最大夢想還是搵到錢讓父母和姐姐下半世無憂。鑽石，一有錢我就會買卡裝投資。等男人送？鑽石等於真愛？做鑽石愈耐，愈覺得呢句說話太諷刺。」
除了說起姐姐遇上車禍的往事，突然哭得化成水一樣，大部分時間，詩雅頭腦清晰目標澄明。愈近暑假，對得頭腦發熱身上布少得可憐的 o靚模物體多，我愈覺得詩雅真心，喊得沒花沒假。
賣鑽石原來很難
3萬蚊對其他人嚟講冇乜嘢，對我嚟講就係好大筆錢。
我在上水官立中學畢業，本來冇目標冇大志，陪住朋友一齊見成六福珠寶，揀返上水區鋪頭。唔為佣金多，但求就近上水太平村屋企，覺得有得行路返工放工就係莫大幸福。
唔想做一世 sales，一年後我主動要求，經理就畀我返寫字樓，開始學睇鑽石，嗰年 18歲。喺寫字樓睇鑽石嘅人起碼 4、 50， 18歲女仔好少有。喺公司遇到好多伯樂，見我年紀細，對鑽石興趣咁大，反而更希望教我更多嘢，出到去就唔係呢回事。
一個女仔，經常孭住條幾百萬上落嘅鑽石鏈一日行十幾間金行 sell。周不時有行家俾人扑頭打劫、我哋行街最緊要打醒十二分精神、貨隨時跟身、永遠唔行小街小巷、永遠唔重複同一條路線……不過最驚唔係俾人劫財，最驚係啲人唔知用咩說話打發你走。
我年紀細，又生得細細粒，攞條咁貴嘅鏈嚟賣，預咗人哋覺得唔夠說服力……唔買就話唔買囉，我唔使你有禮貌講：「唔使啦！唔該！」但都唔使好似有啲女人咁，叫我躝……
要人哋對我有信心、要師傅肯教我更多嘢，我好自然諗到應該要有番張證書。於是用儲咗好耐至儲起嘅 3萬蚊， take咗個鑽石證書課程。
爸爸十項全能
3萬蚊對其他人嚟講冇乜嘢，對我嚟講就係好大筆錢。我媽媽係家庭主婦，爸爸嘅工作細細個時我都唔識形容，淨係知佢會落地盤、會揸貨車、會裝修仲會開船識整車……總之邊度有工開佢就可以隨時變工種，喺我心目中，爸爸周身刀好叻！
人哋睇新聞成日睇到地盤雜工開工不足、屋企生活成問題，但係我同家姐、細佬三個，從來唔覺得我哋窮過人，應有都有、隔幾年仲有得旅行添！最近至聽爸爸講起，就喺我讀鑽石課程嗰段時間，加上家姐遇上嚴重車禍，屋企曾經好拮据……係就算有困難，爸爸媽媽永遠都唔會將困擾帶畀兒女……我知道家喺佢哋口中輕描淡寫嘅難關，當時對佢哋造成幾大壓力……諗起就覺得好心噏、覺得我呢個做女好冇用。
02年 4月 28日，上水粉錦公路的交通意外，造成一死五重傷，四名後座女乘客被救護員抬出的一刻，坐在電視機前看新聞的詩雅還不知道，其中一個是胞姐。《蘋果日報》圖片
意外以後，詩雅說一家人變得更親密，自己和弟弟也更懂事，高大威猛做過 model的弟弟，最近更剛剛考進懲教處工作。
那一晚，姐姐上了電視新聞
我屋企爸爸主外、媽咪主內，雖然排行第二，但係家姐細個好反叛，我覺得自己應該負好幫媽媽嘅責任，睇住細佬同成日管家姐，變咗屋企管家婆。
家姐同我差一年，嗰件事之前，我曾經以為自己好嬲佢、唔再錫佢……
喺公屋大，可能真係更容易識到更多人，嗰啲年紀，又本來就反叛，家姐唔鍾意屋企人、覺得朋友最了解佢最愛佢，經常幾日搵唔到人。
有晚一家人睇電視，新聞簡報做緊一單新牌仔私家車失控撞樹交通意外，男乘客當場死亡，司機同後座四個女仔逐個俾抬出嚟時，個個成身血披頭散髮遮住樣，阿媽話：「點解呢個咁似你家姐？」
可能真係血濃於水，我當時鬧媽咪亂講，但夜晚就極少可咁醒瞓，聽住半夜電話響、聽住阿媽喺電話問：「係咪頭先新聞報嗰單交通意外……」
在《前度》中的大膽演出備受讚賞：「好多人以為我係因為太性感搞到有情緒問題，其實我係怕做得唔夠盡、唔夠好！」
16歲已經做緊 part time model的詩雅， 9年前雜誌工作已經不少，還有個「縮水紀香」朵。
一個意外，改變了一家人……
我自問早熟、又俾阿媽話好難喊得出，阿爸阿媽已經震晒，我當時仲好鎮定叫佢哋唔好驚：「我同你哋去醫院……」但去到醫院，睇住十足電影畫面，成群醫生護士圍住一張病床忙、瞓喺中間成身血、件衫剪爛晒俾人急救緊嗰個就係我家姐，接着我崩潰、接着阿媽要攬番我驚我暈，跟住醫生話：「佢可能過唔到今晚……你哋去同佢講啲嘢，畀啲鼓勵佢……」……隔咗咁多年，我諗起呢件事都仲覺得好驚好驚。
我哋全家行埋去家姐床邊，俾人急救緊嘅家姐原來有意識，佢擘大眼第一句說話係望住媽咪話：「對唔住！」喺我心目中，家姐從來都好曳好唔生性，我估唔到佢第一句說話係「對唔住」，我諗喺意外發生嗰一刻，佢就覺得欠咗媽咪一句「對唔住」。
結果家姐盆骨碎咗、啲腸打晒結，瞓咗一個月 ICU、整整一個月周不時聽到醫院打電話嚟又話唔得或者要施手術。佢出咗 ICU，再住咗一年醫院，有啲創傷跟佢一世，有長短腳要着一邊特製嘅鞋……有時人生就係要經歷呢啲巨變至會成長，唔只家姐生性咗、同媽咪親密咗，全家都更親密。我都希望有一日成功做到商界女強人，照顧父母、可以讓家姐下半世唔使憂。
簽約英皇處女作，是與洪卓立擔正的《很想和你在一起》，絕對是港產片少有的青春偶像文藝片。
直到家，我照住上水屋企、照搭火車、巴士返工，使錢一樣咁慳。
等開工太冇安全感
中學時期我做過吓 model賺外快，不過從來冇發明星夢，入行做鑽石嗰幾年，完全同呢行劃清界線。
兩年前我正做緊間猶太人珠寶公司，前度 model agency（ Jamcast）打畀我，叫我去試吓 casting《四葉草》，當年每個星期返四日半工，純屬工餘時間多去撞吓彩，估唔到又會揀咗我做女主角。
轉行唔係因為虛榮，係真正覺得做戲呢件事有趣，為免兩頭唔到岸，我索性辭咗鑽石份工，同入行前已經識嘅 Mani簽約。直到家，我照住上水屋企、照搭火車、巴士返工，使錢一樣咁慳。人哋幾富貴、住幾豪着幾靚，我從來唔介意。虛榮心視乎你生活喺咩圈子，身邊群埋啲咩人，我唔理出邊嘅人信唔信，喺我身邊嘅同事都唔係嗰啲人，我自然都唔係。
唔好覺得我小事化大，拍戲露背都搞到情緒失控，實情係壓力係來自前途，我係真心鍾意拍戲先至決定入行，我係擔心今次做得夠唔夠好、下一套戲幾時搵我呢……等開工實在令人太冇安全感。
08年工餘試鏡成功，成為《盛裝舞步愛作戰》第一女主角，詩雅（後中）因為拍戲太好玩，放棄了當時在猶太人公司賣鑽石月薪過 2萬的正職，當時跑出的卻是趙碩之（左一）。
放棄 5年鑽石經驗簽約英皇，詩雅說完全是因為經理人 Mani：「因為信任……入行前已經識 Mani，我相信佢安排嘅一定對我最好！」《蘋果日報》圖片
鑽石恆久遠？
「做咁耐鑽石，最貴賣嗰粒係值 3千萬嘅藍鑽……浪漫？你以為啦，反而係經常有人要放粒石攞番嚟拆，我喺拆開粒石度見到刻咗『 Love You Forever』嘅字樣……有幾愛呢？又話永遠，轉頭咪又係攞番嚟賣……幾諷刺。」
詩雅說，自己拍過四次拖，最唔話得是 4年前主動放棄的初戀男友，拍拖時常常燉一盅湯再另外煲一大煲，讓愛中湯的詩雅喝個夠；就算分手 4年，這個現任大廚的前度，還當正自己半邊仔，常常煮大堆好菜孝敬伯母：「人就係身在福中不知福……」
只愛保值不保愛情的鑽石，看不上眼最長情的「中湯」，詩雅要小心， 20年後攬住啲石和 cash過世。
留言列表
