明星靚相大分享☆

52歲的潘源良， 86年與李麗珍拍拖，其後分開，之後潘亦與妻子離婚，一直等足珍妹 20年。 07年二人終翻撻，潘源良對這段得來不易的戀情，不單緊張投入，更將女友寵得像女王。
本周二（ 22日）下午 5時，記者相約珍妹到佐敦玉器交易廣場寫字樓做訪問，拍攝她設計的最新珠寶系列，珍妹一句唔識路，潘源良即揸車送她去佐敦。
到達後潘源良體貼地對珍妹說：「我泊咗半小時錶，你每半個鐘就搵人去入錶喇。我依家未趕入廠做嘢住（主持有線《世界盃嘉年華》），會留多廿分鐘幫你入多次，你可以喺度慢慢傾。」之後潘源良一見珍妹拍檔謝建榮，即問他，朋友訂的戒指起貨未？原來他朋友的太太快將生日，潘源良乘機為女友拉客，介紹朋友訂購珍妹設計的首飾送給太太。

讚女友有天份

對於珍妹轉型，潘源良非常贊成，更賣花贊花香：「佢真係好有設計天份，我成日覺得佢嘅設計訂價太平，可以賣貴啲。」
珍妹新作是 2套共 4件的紅玉系列，將於本月 24日至 27日在會展舉行的珠寶展展出。對於是次展覽，潘源良非常緊張。早前珍妹在家中翻閱舊雜誌，看到自己為日本雜誌拍攝的旗袍相，覺得跟新設計好配合，即時問男友意見。潘源良二話不說先為女友將照片設計成海報，再為她度出新作系列名稱「美麗珍藏」，而珍妹都大讚男友好諗頭，「張海報全部由佢度橋，我相信擺喺會展一定好搶眼，佢確實幫咗我好多。」
有男友在背後做軍師，珍妹可以放心投入珠寶設計行業。珍妹拍檔謝建榮是香港玉器商會副會長，所以由珍妹設計的系列，選用的材料都屬 A貨的天然翡翠或純玉。最近珍妹更成為玉器商會會員，她說：「原來做會員唔簡單，成為會員之後，貨品隨時會被抽驗，查證是否 A貨，非常嚴格。買我嘅珠寶，可以去鑑定所攞 A貨嘅證書，客人會好放心。」

打算開樓上舖

據知珍妹 3月推出的處女作旗袍戒指至今賣出 40隻，就算與拍檔對分亦有 20多萬收入，非常和味。近日珍妹決定與拍檔大展拳腳，於灣仔皇后大道東開店，以珍妹設計作生招牌。她說：「我睇過一間 250呎嘅舖位， 3萬蚊租，不過最後間舖俾人搶咗。依家拍檔想搞樓上舖，我係一個一計數就頭痛嘅人，所以呢啲留番俾佢搞，我專責設計。」
據珍妹拍檔謝生表示，珍妹的設計深得一班玩開珠寶的金融界女強人賞識，不愁客路。珍妹說：「拍檔咁講真係打咗枝強心針，我除咗同謝生合作推出玉石首飾外，亦同其他公司傾緊合作出首飾，一間係用鑽石，另一間係用色石。因為材料唔同，唔怕有衝突，我希望可以作多元化發展。」
記者問她轉型收入如何？珍妹話：「其實都 OK，依家有分錢，每月起碼有 5位數。其實我每個月都仲會去一至兩次登台，每次唱半個鐘，收入唔錯。（唔諗拍戲？）成日都有人搵，但我唔想離開個女，依家佢進入青春反叛期，要留多啲時間俾佢。如果只係客串，又怕冇癮。總之睇劇本同導演，如果許鞍華搵我，點都會考慮。」

男友陪訪問

潘源良將珍妹照顧得無微不至，珍妹做訪問亦陪伴在側，但記者邀請二人拍照，他就耍手擰頭，猛話：「遲啲先。」攝影師只好偷偷拍下二人的傾偈照片。二人相處時，潘源良英氣十足，珍妹就含羞答答，非常合拍。