郭政鴻一家三口由鑽石山搭的士到觀塘。落車後郭不時整理口罩，更替前妻挽手袋，之後就在馬路邊等候過對面馬路，到中旅社辦理證件。
封面故事
郭政鴻翻兜前妻生埋女
2009年09月18日
三年前自稱失婚的 45歲郭政鴻，在《古靈精探 B》中，飾演對新、舊女友同樣難捨難離的好男人張正義。現實中，全人類認定他和滕麗名感情穩定之際，近日本刊發現他暗地裏翻兜前妻，二人共賦同居外，更育有一名九個月大的女嬰。離奇做咗老竇的郭政鴻，更在藥房買壯陽酒補身，似有添多名之意。
周三（ 16日），郭政鴻一家三口，到中旅社為女嬰申請回鄉卡，其間見記者影相，郭即李小龍上身，瞪大眼指實記者：「我唔會答你！」
癡心再次錯付，難怪滕麗名心死說：「我同佢畫清界線！」
自 06年與內地妻子李欣穎離婚後，一直宣稱單身的郭政鴻，跟當時剛與魏駿傑分手的滕麗名，因拍《野蠻奶奶大戰戈師奶》戲假情真。短短幾個月，二人被傳媒拍得親密參加婚宴及在車廂親熱互啜。至去年中，郭政鴻更被本刊斷正，到滕麗名在清水灣新居落簾短敘。雖然二人冇正式承認戀情，但情侶關係早已是公開秘密。


郭政鴻與前妻李欣穎 03年結婚，不過 06年，郭向傳媒自爆與前妻性格不合離婚。《蘋果日報》圖片
 
9月 16日︰包到冚出街
周三（ 16日）下午 2點，郭政鴻一家三口一齊離開鑽石山寓所。戴晒貨車帽和口罩的郭非常小心，拎住 BB車起勢咁行，與身後抱住女兒的前妻隔了四五個身位。

抱女嬰攞回鄉卡
正當外界一致認為郭、滕打風打唔甩，本刊卻收到消息，指郭政鴻近日被人多次目睹與一名操普通話的女人以及一手抱女嬰，在鑽石山有 23年歷史的龍蟠苑居屋同住。「郭政鴻每次出入都好小心，就算落街買嘢都要戴口罩 cap帽。試過有鄰居同佢打招呼，佢望都冇望人就粒聲唔出行咗去。至於個女人呢，可以成個禮拜留喺間屋唔出街，可能係要照顧 BB啩！」有鄰居爆料。
周三（ 16日）下午兩點，本刊發現郭政鴻和一女子及女嬰從龍蟠苑步出，乘的士到觀塘中旅社。現場所見，戴上 cap帽口罩的郭政鴻，為防身份暴露，與抱着女嬰的女子一直保持距離，不時將口罩扯高，四處張望，警戒性極高。至於與郭政鴻同行的女人，樣貌與她的前妻十分相似，相信她便是 06年，郭政鴻宣稱與她離婚的李欣穎，只是她身形比結婚時肥了一個碼。


過了馬路後，郭亦刻意與前妻和女兒保持距離。
 
到達中旅社後，郭先行到櫃枱登記攞籌，而前妻和女兒就坐下等候，其間 BB不停郁來郁去。


為了讓職員識別嬰兒身份，身為父親的郭終於親手抱起 BB到櫃枱前，不過郭卻全程戴上口罩。

女嬰名叫郭×欣
在中旅社等候辦證期間，郭政鴻明顯放鬆戒備，主動在前妻手中抱回女嬰，更高舉女嬰讓辦證職員核對身份。當時記者發現回鄉卡申請表中的申請人姓名清楚寫上郭×欣，相信女嬰是郭政鴻的女兒。
其間，記者聽到郭政鴻向職員表示希望替女兒申請快證，然後對着前妻說：「你係咪十月七日？」前妻以半鹹淡廣東話說：「係呀，十月七日！」郭對職員說：「咁唔使申請快證喇。到時攞卡，使唔使我哋兩個一齊嚟？」「你哋是但一個嚟就得嘞！」職員說。


耷頭走人
完成辦理手續後，郭政鴻抱住女兒先行離開中旅社。
 
遞 B速逃
記者上前訪問，郭立即將女兒遞俾前妻，搞到 BB件衫扯起，之後，他更一支箭颷入商場中，與妻女各行各路。
 
滕麗名前男友魏駿傑去年初被揭與 20歲學生妹在重慶結婚。當時滕亦故作大方話會去飲。

郭狂躁唔認女
郭政鴻辦完手續，三人欲離開之際，記者上前訪問，兩人錯愕即時彈開。向來態度友善的郭政鴻忽然李小龍上身，邊行邊厲着記者。
記：郭政鴻，呢個 BB好得意喎！係你 o架！
郭（驚青嚇窒）：唔係……呢個係我……我……我屋企人個女嚟 o架。
郭隨即將 BB遞給前妻，急速走入商場內，表現慌張失措。記者緊隨其後繼續追問。
記：有街坊見到你哋一家三口住喺龍蟠苑喎？
郭：唔係……
記：佢係咪你前妻？
郭：唔係……
記：咁你同滕麗名依家係咩關係呀？
郭：我由始至終冇認過同佢一齊！
記：咁你依家係單身定結咗婚？
郭：我唔會答你！
記：我哋知道小朋友申請回鄉卡要父母陪同 o架喎，你係咪佢嗲哋？
郭（狂躁地指實記者）：點解會咁樣 o架，好過分，你哋唔可以咁樣。
記：個 BB女姓郭嗰喎！
郭：我屋企人嚟，唔係我，唔關我事。
記：結婚生仔係開心事，點解唔公開？
郭：唔關我事！你要理解一樣嘢，呢個唔係我嘅，我乜嘢都唔會講。
郭之後急速跳上的士離去。
另一邊廂，郭的前妻在等的士時將太陽帽拉到低無可低。記者問她有關小孩身份和是否與郭政鴻復合等問題，她刻意提高聲線，猛說：「唔係，唔係，唔係！」之後，一手抱 B一手挽住 BB車，狼狽乘的士離去。


被郭拋下唔理，前妻只好獨力一手抱住女兒，一手托住 BB車上的士。
 
郭卻雙手空空等的士，並對記者唔認剛才為女兒辦回鄉卡。

壯陽酒催谷
一直竭力不想妻女曝光的郭政鴻，平時極少機會一家三口現身，今次因女兒申請回鄉卡，需由父母陪同，郭政鴻隱藏多時的秘密才得以面世。本刊連日在其寓所等候，發現三人即使住在同一屋簷下，郭政鴻和前妻只會在不同時間出現。當郭不在家時，前妻便會帶 BB到附近公園玩耍；相反，郭政鴻平日到附近商場飲茶，亦只會一支公嘆足兩個鐘。
上周六（ 12日），記者目睹郭政鴻在飲完茶後，到附近藥材舖，直入舖內擺放藥酒的位置。記者以顧客身份在旁聽到郭政鴻指着其中一瓶寫着「三鞭回春酒」問職員：「呢枝幾錢？」店員回答他：「$2,600。」他說：「有冇細樽啲，幾錢？（$1,800！）俾樽細嘅我！」付錢後郭徑自拿着回春酒返家。
根據店員說，郭政鴻是該舖熟客仔。「佢成日嚟幫襯，不過買三鞭酒就係第一次。（啲酒有咩功效？）咁梗係用嚟壯陽啦，仲可以醫腎虧。每晚飲一小杯，老虎都可以打死幾隻呀！」已有一女的郭政鴻，似乎想嗱嗱聲追多名喎！


9月 12日︰孤獨飲茶
上周六（ 12日），約下午三時，郭一支公離開寓所，到隔籬的荷里活廣場的聯邦大酒樓嘆茶兩小時。
 
填飽肚後，郭就到商場的藥房幫襯，一支箭行入擺藥酒的貨架，相當熟路。之後更買了一酲價值 1,800元的三鞭回春酒。
 
買三鞭酒壯陽
郭政鴻買的三鞭回春酒，主治陽萎及早洩，能調節體內賀爾蒙之分泌，成分有鹿尾巴、海狗鞭、梅花鞭及曲鞭等。
 
買完大補酒，郭就去了百佳超級廣場買餸。其間到魚檔揀魚時，職員建議他買約一斤的海斑，他立即耍手擰頭說：「一斤邊食得晒！」


 
飲咗補酒至咁精壯咋！（設計對白）

Blog露分手玄機
以郭政鴻手抱的 9個月大女兒年紀推算，估計他和前妻行埋已年半。「郭政鴻一向好少提私人嘢，就算同阿滕拍拖都從來唔高調。因為佢喺呢行捱咗廿幾年，到呢幾年先彈起，好大程度係因為佢同阿滕拍拖之後，形象好咗，啲人受吖嘛！」知情人士說。
七月初，滕麗名在自己的 Blog中，一篇名為「他」的文章中自爆失戀。當中提到「今天我的感情世界重回一片空白，我依然等待他的出現……我只希望跟他的世界有裏沒有背叛、出賣和欺騙，只有信任、分享和愛護……」字裏行間顯示與郭政鴻感情出現問題。記者曾經就此問過郭政鴻，他即時為自己解話：「佢係咪講以前嘅歷史呀？個個就以為係我，其實係誤會，冇分手……好朋友、好同事點會分手。可能係佢拍完《掌上明珠》，某程度上覺得好失落好空虛。總之我會諗辦法番佢開心。」雖然郭政鴻努力修補和滕麗名的關係，但二人分手已是無可避免的事實。


同佢畫清界線！
 
寫 blog爆分手
滕麗名於 7月 2日，在 blog上以「他」為題，宣告單身，卻沒有交代分手真相。


 
自 06年傳緋聞後，郭政鴻同滕麗名每次出席公開場合，都不避忌公開耍花槍及晒幸福。去年《桌球天王》拜神儀式，滕表示撞鬼，郭更親熱攬住她話幫佢壓驚！《蘋果日報》圖片

滕：點嬲人哋都唔會痛！
就郭政鴻翻兜前妻及有一名女兒之事，記者訪問滕麗名，她在電話中以佛偈暗示已和郭政鴻一刀兩斷。她說：「我以前冇話過同佢喺埋一齊，依家更加唔會話喺埋一齊啦……我同佢已經畫清界線啦！總之緣份嘅嘢，你愈緊張，就愈得唔到。你唔緊張咩，佢愈飛埋嚟！我唔會要求人俾咩我，因為咁樣會好辛苦。（你哋點解會分手，係咪因為第三者？）我依家讀緊《心經》，佛家有一種叫求不得之苦，即係話就算你點嬲一個人，人哋唔會痛。咁不如放開啲，大家都會好過啲！」
滕麗名和魏俊傑的九年情，最後敗給國產小花，如今歷史再度重演，郭政鴻與廣州小姐冠軍名銜的前妻復合， 33歲滕麗名肯定好 hurt！


9月 16日︰聞舊愛有 B即撇
下午 3時，化上淡妝的滕麗名離開清水灣寓所，問她知否郭政鴻與前妻復合及秘密生 B女一事，她一概笑而不答。為盡快避開記者，她從乘客位上車。
 
上車後，滕麗名即變臉，並坐回司機位，更飛車極速離去，撇甩記者的追蹤。

前妻大起底


郭政鴻前妻李欣穎，原名李麗，今年 35歲。出生於北京，是北京中國戲曲學院表演系的高材生。 95年，李隻身到廣州參加有廣州小姐之稱的「美在花城」大賽獲得冠軍，她獲勝後說：「我是在舞台上長大的。」可惜她拍過數部電視劇後就退出幕前， 99年在朋友介紹下認識郭政鴻， 03年結婚。據知她現於演藝學院中國戲劇系授教。
捱咗 23年　靠緋聞上位
今年 45歲的郭政鴻， 83年入無綫做龍虎舞師，當年月薪三萬，非常風光。兩年後參加《第四屆新秀歌唱比賽》（冠軍為杜德偉），可惜未能入決賽，不過，卻因而被導演睇中，演出電影《豬仔出更》。自此郭轉行做演員，更成為無綫藝員進修班學員。郭加入無綫 23年，起初是三、四線演員，自拍《野蠻奶奶大戰戈師奶》與滕麗明撻着後，人氣急升，更躍升為二線男主角，劇集一部接一部。

拍劇撻着
06年尾，與滕麗名拍《野》劇，其乸型設計師角色十分出位，他與剛和男友魏駿傑分手的滕麗明撻着，戲假情真。

Blog爆戀情
08年 3月，郭政鴻與滕麗名拍住拖面貼面出席戲劇組總監梁家樹大女婚宴，冷不提防被阿姐在 blog上公開照片，才令戀情曝光。

香閨短敍
08年 4月，本刊拍到兩人前後腳，在女方的村屋短敍，全屋更落晒窗簾。同月，又被傳媒拍到兩人在車廂又喊又咀，女方欲拒還迎，之後滕更送男友返歸。

真情熱咀
同年 10月，兩人在新劇《桌球天王》中飾演情侶，阿滕不但為郭政鴻搽太陽油，兩人更奉旨拍咀戲。

大耍花槍
09年 2月，兩人同上《獎門人》，被志偉公然催婚，滕麗名雖口硬拒認拍拖，但卻不避嫌為男方抹去臉上忌廉。

諗計箍煲
今年 7月，滕麗名突然在 blog上自爆分手，郭政鴻笑笑口話︰「冇分手，好朋友、好同事點會分手。」更表示有責任為她處理情緒問題︰「佢話點就點……實會諗辦法令佢開心。」


拍劇撻着


 
Blog爆戀情


 
香閨短敍


 
真情熱咀

拍檔唔知︰郭政鴻有 B
郭政鴻突然有 B比《古靈精探 B》劇情更峰迴路轉，難怪同劇演員都懵然不知。

劉玉翠：擔心滕滕
「平時同佢（郭）食飯都有吹吓水，但未熟到講私人嘢。佢與前妻復合同有 BB都係一件開心事，但我就擔心滕滕多啲，之前同佢合作《師奶股神》，嗰時話佢同郭政鴻拍拖，見佢都好開心，依家佢點算呀！」

胡定欣：佢未離婚咩？
「我冇見過有女性嚟探過佢班呀。吓！佢有個 B？乜佢唔係離咗婚咩？我真係乜都唔知，不過佢係一個好勤力嘅男人！」

羅敏莊：我就選擇坦白
「政鴻同我哋講佢冇拍拖 o架喎，仲話自己守身如玉，係花仔。個 BB有幾大呀？同前妻復合都係好事，佢係好人嚟嘅，每人都有唔同處事方式，我就選擇坦白。」

娛樂八掛大放送★ 為食譜識飲識食街★ 任逍遙旅行萬里路 ★
科技電玩一線通 ★ 寵物地帶 ★ 潮流男女打扮★ 健康之道★ 財經投資★ 五行玄學八卦風水★ 娛樂猛片放送站★
明星靚相大分享(4月刊)★ 明星靚相大分享(5月刊)★ 明星靚相大分享(6月刊)★ 明星靚相大分享(7月刊)★明星靚相大分享(8月刊)★ 明星靚相大分享(9月刊)★ 過期 週刊 及 雜誌(4-6月刊)★ 過期 週刊 及 雜誌(6月-8月刊)★ 過期 週刊 及 雜誌(4-9月刊)☆

arrow
arrow
    全站熱搜
    創作者介紹
    創作者 stacylife 的頭像
    stacylife

    明星靚相大分享☆

    stacylife 發表在 痞客邦 留言(0) 人氣()

    E-mail轉寄