盂蘭節陪鬼王遊街 @ 明星靚相大分享☆

8月23日是農曆七月十四，中國人鬼節無哈囉喂助陣，齋燒街衣似乎只關阿媽嘅事，於是我今年報名參加咗個團，到盂蘭勝會夜探鬼王。以往阿媽教落，呢類勝會係俾孤魂野鬼參加，生人勿近，但實際上一啲都唔覺恐怖，反而開心多過驚，還學到好多傳統特色事物，好過讀書學通識。

我參加的團名為「淺談盂蘭文化講座及戶外考察團」，由聖雅各福群會灣仔民間生活館主辦。主講人張熙明（明哥）於04年起，每年都到各區的盂蘭勝會拍照兼做資料搜集，後來跟聖雅各福群會合作搞咗呢個團，每年只辦1團。
考察團第一部分是講解盂蘭由來及各區勝會的特色，到晚上，全團近30人便跟着明哥夜訪筲箕灣南安街的盂蘭勝會。明哥：「到呢區參觀是因為現時市區的盂蘭勝會中，只有這裏仲有鬼王遊街。鬼王唔係鬼，係觀音化身，職責是在勝會維特秩序，睇住班鬼仔唔准亂嚟，所以有鬼王睇場，根本唔使驚。」

遊盂蘭全程睇
入口處
門口有支巨型招魂幡，據說能招集方圓5公里的孤魂野鬼。初探盂蘭勝會的我見到都有少少驚，但明哥大派定心丸：「我哋嚟係欣賞地區文化活動，唔亂講嘢唔亂搞嘢，根本無事。若真的害怕，可以站近神棚，有神鎮住。」開始時，我不自覺地走近神棚，後來見無事發生，就算走近鬼王或祭祀亡魂的地方，都無撞過鬼。

場內
入場後，明哥開始講必睇位，並強調要以欣賞中國傳統文化特色作出發點。
必睇位1：鬼王
又名「大士王」，觀音大士的其中一個化身，故其身上總放有一尊觀音像（紅圈）。其職責等同警察，鎮守會場維特秩序。鬼王有10多款造型和姿勢，如右圖屬潮州的是藍面，而鶴佬的就頭上有對角。
必睇位2：孤魂棚
用來祭祀「好兄弟」，即不知名的亡者或先人，他們死後沒人拜祭，故在世的同鄉便趁此機會超渡他們。棚內放滿衣服、日用品、白米、酒水和雞鴨等祭祀用品，一般經法師作法後，部分會派給街坊，例如平安米。
必睇位3：戲棚
潮州人和鶴佬人愛看戲，故盂蘭勝會必有戲棚。上演的神功戲都是給神看的，故戲棚通常面對神棚。戲目分別有《十仙賀壽》、《跳加官》、《仙姬送子》等五齣，因連在一起做，故稱為「五福連」，含有吉祥之意。

儀式
這天是勝會舉行的最後一天，儀式有送神歸位、誦經施食及鬼王遊街，最後火化鬼王。
誦經施食
由法師誦經超渡，期間會拋食物到地上，寓意給亡魂施食。明哥話這時最多亡魂齊集，偶爾還會刮起風來。講真我初到會場，還抱怨天氣悶熱，但法師誦經時，真的有風吹來。有團友更指，曾遇過誦經時狂風大作，將場內的旗桿吹斷。
鬼王遊街
最後一個環節，抬着鬼王沿着會場附近巡遊一圈。每到之處，街坊會灑水撒米，大叫：「大士王出巡，小心迴避。」明哥話：「鬼王遊街有辟邪作用，能將污糟嘢趕走，等班街坊平安大吉。」
火化鬼王
寓意鬼王帶理班鬼仔一齊走，個場乾淨晒。未火化前，街坊爭相撕下鬼王身上的金甲，話金甲能帶來好運。

4大特色盂蘭勝會
最大型長沙灣
明哥話：「無話邊區盂蘭勝會最好睇，因18區各有各做，區區都有睇頭。」而他推介以下4大特色盂蘭勝會。長沙灣的盂蘭勝會由潮州人舉辦，是全港最大型的。明哥教最後一天3pm去參觀，因為最多嘢睇。

地點：長沙灣保安道球場
日期：農曆七月廿七至廿九日（9月5至7日）

最創意華富邨
華富邨部分大廈會裝飾不同的紥作祈福，並且擺下水鬼陣作超渡。

地點：香港仔華富邨
日期：農曆七月十五日前的周日（8月22日）

最特色長洲
富水上人特色，外面較少看到。

地點：長洲碼頭亭水務署海邊
日期：農曆七月廿五日至廿六日（9月3至4日）

最動感坪洲龍母廟
搞手跟舉辦長洲太平清醮係同一班人，連坪洲街坊都話好睇。明哥話，最佳參觀時間為農曆七月十五日1pm起。

地點：坪洲龍母廟
日期：農曆七月十二至十五日（8月21至24日）

注意事項
關上閃燈
大部分盂蘭勝會都歡迎外來人士參觀和拍照，但建議最好咪用閃燈，尤其法師在做誦經、施食和超渡的法事時，閃燈可能會影響他們。
勿搶施食
誦經期間，法師會把食物拋到地上給亡魂吃，明哥教千祈唔好搶。「曾見過有人向前衝想搶施食的食物時，突然向後跌倒。故時運低的人更不要搶，話晒啲食物係俾鬼吃的。」
擲錢趕鬼
以往燒街衣都會丟真錢落地，目的係以真錢擲地聲來嚇走亡魂，以防他們跟住返屋企。

邊度有得睇
各區盂蘭勝會的時間表可參考柴娃娃論壇（http://hkcww.org/forum/index.php）及山野樂逍遙網頁（http://www.hkhikers.com）。明哥話時間表以農曆為主，而各區每年都固定在某些日子舉辦，故就算是去年的時間表亦可作為參考。