影海報時，佘詩曼與袁詠儀被安排企在附近，兩人無交流之餘，仲藐嘴藐舌。
娛頭
三招釘死佘詩曼　記仇袁詠儀切斷張智霖嗒女
2009年10月29日
台慶劇《宮心計》同《富貴門》都已經正式推出，兩劇同樣被認為是十二月五日舉行的台慶頒獎禮中兩大熱門，當中最受注目視后一獎，除了在民意上一直領先的鄧萃雯外，仲有《宮》劇佘詩曼、楊怡，以及近期頻頻埋無綫堆的袁詠儀，亦在睇好之列。
雖然已經貴為兩屆香港電影金像獎影后，區區一個視后獎本來毫不志在，但眼見入圍人選有眼中釘佘詩曼，袁詠儀仍然無法忘記九年前佘詩曼與張智霖的緋聞，於是諗計出招，釘死對方，另一方面亦嚴防張智霖有偷食機會。
睥到行
上星期四（十月廿二日）袁詠儀與佘詩曼齊齊出席邵氏賀歲片《 72家租客》開鏡儀式，同場更影埋電影海報，身為女主角的袁詠儀與男主角張學友同樣站在中間最前位置，而佘詩曼就坐在車頭冚上，與袁詠儀只隔開一個身位。現場所見，當日十分風騷，滿場飛的袁詠儀唯獨與佘詩曼未有任何接觸，甚至連招呼都唔打，卻不時擰轉頭，狂睥身後的佘詩曼，令對方十分尷尬，露出無癮表情。
之後記者要求袁詠儀同戲中演員合照，她即時拉住張學友、曾志偉、王祖藍及黃宗澤，完全無理會一直企在附近的佘詩曼，反而擘大喉嚨嗌企在老遠的鍾嘉欣埋位影相，相當擺明車馬。


近年袁詠儀經常傍實張智霖出席朋友飯局，貼身睇實老公。
 
當日袁詠儀經常表現得極不耐煩。
 
影影吓相，袁詠儀擰轉頭睥行佘詩曼。
 
大合照時，袁詠儀同佘詩曼中間需要相隔三個人。
 
袁詠儀堅決唔肯同佘詩曼合照，反而拉住另一個花旦鍾嘉欣與學友及志偉等人影相。

惡女
袁詠儀入行以來，由視圈到影圈，由於性格剛烈兼經常得罪人多，惡女形象鮮明。一個女人在娛樂圈打滾十幾年，為自己的事業利益據理力爭在所難免，之不過袁靚靚吓吓爭到盡，就變相同霸道無分別。

出口術
94年袁靚靚染指剪報業，開設剪報公司 Show-biz Information，以極優惠價錢搶走梁思浩大部分藝人客仔，又放料指對方公司出現財政問題。

數臭男友舊愛
同年張智霖在《勁歌金曲》中贏得一條頸鏈，隨手轉送舊愛許秋怡，女方公告天下， Chilam則唔認又認，靚靚為此事力撐男友兼大數對方曾半夜三更用電話騷擾她。

大哥詐型
95年成龍指《霹靂火》因靚靚同期片約太多，檔期難以遷就，幾乎爛尾收場，靚靚反擊，指是通告經常改期取消累事，又指電影公司超時唔肯補水。

監場
97年張智霖與黎姿合拍電影《豪情蓋天》，由於男方曳曳有前科，靚靚特意前往監拍兩人的床上戲，事後黎姿向傳媒爆料，靚靚則叫對方「用腦諗清楚」，兩人隔空開拖。

筍價搶劇
98年靚靚接拍台灣製作人楊佩佩開拍的《花木蘭》，有指她開出超筍價成功打敗競爭對手劉嘉玲，其後又以同樣方法搶來屬意吳倩蓮做女主角的《笑傲江湖》。

笛子姑娘
08年復出接拍無綫劇《疑情別戀》，為了照顧兒子魔童，一早講明每日只開工 12小時，不過為求達到目的，日日催埋位，催收工，又對遲入廠員工黑面，神憎鬼厭。


數臭男友舊愛
 
大哥詐型
 
監場
 
筍價搶劇
 
笛子姑娘

拒絕同場
據知袁詠儀一直對佘詩曼懷恨在心，仍然記住九年前她與張智霖拍《十月初五的月光》時傳出緋聞。雖然當年她經常公開表示信任男友，但亦透露有好多女人向張智霖投懷送抱，暗寸佘詩曼送上門，之後接受電台訪問，提到有關第三者時，她又忍唔住大鬧，「我想用刀捅死佢！」對佘詩曼充滿敵意。
「件事雖然隔咗咁多年，不過阿靚（袁詠儀）仲係好憎阿佘，就算 Chilam（張智霖）點講佢同阿佘無嘢都好，阿靚都係唔信，所以一直都好防阿佘，好似無綫搵佢拍邵氏部《 72家租客》，佢第一時間唔係了解自己個角色，而係問有乜對手，知道阿佘有份，就即刻唔多滿意，明眼人一睇就知佢唔想同阿佘合作啦！」知情者說。
為了遷就袁詠儀避開佘詩曼，電影公司唯有改劇本，將原本佔戲頗重的佘詩曼戲份大量刪減，最後，佘詩曼扮大胸狄娜包租婆的角色，只有在懷舊情節出現，而袁詠儀則只在現代戲份出現，兩人絕不同場。


雖然袁詠儀曾口口聲聲講過：「我哋連仔都生埋，使驚佢（佘詩曼）！」但事實依然忌佘幾分。（《忽然 1周》圖片）
 
十月十九日佘詩曼與袁詠儀亦有同場出現台慶亮燈，兩人同樣未有任何交流。

減價接戲
電影公司成功將袁詠儀同佘詩曼楚河漢界，但考慮到今次部戲卡士多，製作費又有限，加上請了片酬重秤的張學友同曾志偉坐鎮，電影公司方面唯有想辦法壓袁詠儀價。
「部戲嘅女主角原本想搵劉嘉玲，因為方逸華鍾意，但因為嘉玲開價太貴，而且佢又唔係咁鍾意個劇本，於是擱置咗，之後有諗過吳君如，但近呢一年君如都貴咗好多，同埋佢幾部戲喺身都無期拍，之後樂小姐（樂易玲）先提議搵近期頻頻同無綫合作嘅阿靚，其實阿靚原本都唔平 o架，不過樂小姐拍晒膊頭叫佢幫手，佢先肯減價，但就暗示想過吓視后癮。」
已經攞過兩屆影后的袁詠儀，理應對視后毫不志在，但因為得知眼中釘佘詩曼在今年視后之爭中呼聲甚高，而且自己又有份角逐，在不能敗給對方的情況下，於是傾拍戲的同時，亦順勢傾埋做視后，令佘詩曼多個競爭對手。


因為近年張智霖經常與苗僑偉等人一齊玩鬥地主，所以袁詠儀馬住苗僑偉及戚美珍夫婦，等他們幫手實老公。
 
拍《富貴門》時，向來鍾意催收工的袁詠儀，曾經試過催姿整呂良偉入廠，卒之搞到面左左。

嚴防靚女
袁詠儀要趕絕佘詩曼外，亦嚴防其他年輕貌美花旦埋老公張智霖身。張智霖重返無綫拍劇，原本無綫打算安排他與有收視保證的佘詩曼再合作，但因為袁詠儀一句唔准，令無綫如意算盤打唔響。
張智霖正為無綫拍新劇《魚躍在花見之朝》，但有關劇中有感情戲的對手，事前都要經過袁詠儀批准。當知道女主角是胡囧囧胡杏兒，袁詠儀即時放心晒，一方面覺得她無殺傷力，另一方面又有男友黃宗澤，所以就算套劇要去日本北海道拍三星期外景，兩人朝夕相對，袁詠儀都相當放心，深信可以斷絕老公偷食米路。


週二阿佘為新劇《天與地》到寶福山拍攝外景。
 
趁拍攝空檔阿佘龍友上身，攞住監製戚其義部相機四圍影。
 
得袁靚靚御准，張智霖將與胡杏兒合作新劇。

緋聞情侶
青靚白淨的張智霖異性緣旺，一出道就與拍檔許秋怡拍拖，之後與袁詠儀合作電影《邊城浪子》撻着，許秋怡敗陣，其間 Chilam亦與朱茵、郭可盈等女藝人傳過緋聞，但當中以佘詩曼傳得最激烈。

00年，張智霖與佘詩曼合作拍攝劇集《十月初五的月光》，有傳二人因朝夕相對而撻着，阿佘更公然睡在張智霖的大髀上。其後二人合作拍攝電影《跑馬地的月光》，拍攝親熱戲時，袁詠儀親自監場。在慶功宴上，阿佘又公然搣張智霖面珠，二人毫不忌諱打情罵俏，令袁詠儀極度不滿。

03年，張智霖與佘詩曼再度合作電視劇《西關大少》，有傳阿佘用口水為張智霖抹蚊癱，未埋位時，二人又在大樹底談心。 


出事
冇貓不愛偷腥，張智霖都唔例外，雖然唔算頻密，不過次次斷正，偷食的污名從此一世跟身！

99年，張智霖被拍下與三位友人到尖沙咀桑拿浴室揼骨，據悉該桑拿浴室有另類服務，張智霖亦經常找不同的女服務員。事後，袁詠儀公開力撐男友，表示事前已得知對方去揼骨。

04年，張智霖與曾志偉等到泰國曼谷拍新戲《戰虎》，其間一班演員抽空到酒店附近的色情場所「凱撒大浴室」召妓，張智霖更挑選了一個貌似靚靚、身材激凸的浴花上房「沖涼」，該名浴花更向記者大爆張智霖床上表現。事後，袁詠儀更立即飛往泰國為男友護航，表示百分百信任對方。


○四年偷食，據報導張智霖在金魚缸揀中泰版袁詠儀。（《忽然 1周》圖片）
 
開心過後張智霖同志偉、林家棟在色情場所門外大談獵艷經過，眉飛色舞。（《忽然 1周》圖片）
 
繼《宮心計》後，阿佘同陳豪在《天與地》再有感情線，兩人有不少對手戲。







娛樂八掛大放送★ 為食譜識飲識食街★ 任逍遙旅行萬里路 ★
科技電玩一線通 ★ 寵物地帶 ★ 潮流男女打扮★ 健康之道★ 財經投資★ 五行玄學八卦風水★ 娛樂猛片放送站★ 伴我奔馳 賽馬貼士 提供★
明星靚相大分享(4月刊)★ 明星靚相大分享(5月刊)★ 明星靚相大分享(6月刊)★ 明星靚相大分享(7月刊)★明星靚相大分享(8月刊)★ 明星靚相大分享(9月刊)★ 明星靚相大分享(10月刊)★ 過期 週刊 及 雜誌(4-10月刊)☆

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄