早前郭可盈與林文龍去迪士尼樂園，郭可盈已經穿着鬆身衫。
娛頭
懷孕 3個月　箝實爛滾林文龍　郭可盈生仔退出
2009年09月17日
郭可盈與林文龍捲入「桃色勒索案」，在今年五月三十日兩公婆在一號銀海寓所 Club house手拖手舉行澄清記者會後，兩人便銷聲匿跡，沒有再出現公開場合。
據知，在這段時間郭可盈因受到桃色事件影響，情緒一直未能平復，終日提心吊膽，加上她有咗，至今已三個月，在雙重影響下，郭可盈自閉唔願見人。
其實，為了箝實林文龍，以免他再出動四圍偷食，郭可盈除了生仔搏老公修心養性，更決定退出娛樂圈唔再拍戲，全天候住老公；因此早前拍罷將在十月中播出的《富貴門》，會是她的告別作。為了減輕負擔，郭可盈更將月供十幾萬的一號銀海單位，極速售出。
大肚三個月
林文龍雖然接二連三發生偷食事件，但郭可盈對他依然死心塌地，堅持死忍，更次次出面力撐。為了箝實老公，一向事業放首位，結婚四年都堅持唔生仔的她，最終都要向現實低頭，使出大肚撒手鐧。
據知，郭可盈已經懷孕成功，目前有三個月身孕。「文龍一直都好希望有小朋友，但係可盈事業心太重，成日掛住做嘢，勸極都唔肯生，不過發生咗嗰單嘢（桃色勒索案）之後，佢哋反而溝通多咗，好似患難見真情咁，可盈終於答應生，佢希望有咗 BB之後，文龍個責任感會重啲，唔再好似以前咁成日掛住玩。不過估唔到佢兩公婆話有就有，啱啱有三個月。」郭可盈身邊人說。


玩咖啡杯時，林文龍與友人都緊張扶實郭可盈上落。
 
今年七月已經懷孕的郭可盈與林文龍出街，其間郭可盈戴帽戴口罩，只露出極小眼睛部分，行為古怪。
 
家中度步
返到外家，郭可盈在家中行來行去，穿着鬆身衫的她，身形明顯肥咗。
 
阿媽開解
臨走前，郭母捉住郭可盈傾了幾分鐘，林文龍就站在門口等老婆。
 
離家戴罩
離開時，郭可盈突然戴晒口罩又帶帽。

賺多蝕少
郭可盈深明娛樂圈花無百日紅，藝人唔可以撈一世之道，投資物業，做好退休準備。


一號銀海

情緒受影響
因為孕婦荷爾蒙出現變化，加上郭可盈之前又遭前國內中介人汪子琦恐嚇，還聲稱會向她報復，令她提心吊膽怕被人尋仇，雙重壓力下，情緒亦大受影響。以往喜歡熱鬧，鍾意約朋友 shopping的情況近乎零，就算外出，都會戴帽、戴口罩又戴黑超，唔願人認出，一旦見到途人眼望望，她就會即時走避，唔願面對公眾。
對於郭可盈目前心理狀況，她的外家表現擔心，除了健康問題，更擔心她生 BB是一時之氣，未有考慮清楚，加上郭可盈的胞姐亦試過生完 BB後與丈夫離婚，郭母怕今次又重蹈覆轍，非常不放心。
上星期五（九月十一日）郭可盈與林文龍返到外家位於禮頓山屋企食飯，從窗外所見，身穿紅色鬆身衫的郭可盈經常在屋內行來行去，郭母則不時行埋她身邊傾偈開解，林文龍則甚少在屋內走動，二人逗留了大約兩小時，在晚上八點半離開。
離開前，郭可盈走到鏡前，以全副武裝戒備，戴帽又戴口罩，逐一同屋企人道別後，由郭母護送兩公婆離開。


今年五月，郭可盈拖着林文龍為「桃色勒索事件」舉行記者會，話就事件報警，但對於林偷食一事不置可否。
 
周身名牌的郭可盈以往經常逛名店買名牌，出身富裕家庭的她享受慣。（《忽然 1周》圖片）
 
郭可盈家人對她身體狀況及今次懷孕都甚為緊張。（《蘋果日報》圖片）
 
早前不喜歡小朋友，郭可盈近年對「細路」改觀，終肯大肚生仔。（《蘋果日報》圖片）

退出電視圈
以生仔箝實林文龍外，事業心重的郭可盈，眼見同輩花旦個個做晒視后，對自己則未攞過獎耿耿於懷，雖然一直想拍番部可以奪獎代表作，但為了維繫婚姻，郭可盈決定自我犧牲，退出娛圈唔再拍劇，一方面全心照顧 BB，另一方面有更多時間實老公。
與羅嘉良、呂良偉、袁詠儀、戚美珍等合作的劇集《富貴門》，將會是郭可盈的告別作，該劇已安排在十月十九日播出，以台慶重頭劇做賣點，無綫已開始安排於十月初進行連串宣傳活動，但郭可盈仍未落實會否出席宣傳，據了解，她亦有考慮過效法黎姿當日在《珠光寶氣》首播宣布退出，但暫時仍未有最終定案。


與呂良偉、薛家燕合演的《富貴門》，將會是郭可盈在電視圈的告別作。（《蘋果日報》圖片）
 
05年郭可盈與林文龍結束 10年愛情長跑，拉埋天窗。
 
去年 10月黎姿在主演的《珠光寶氣》首播當日，公告天下退出娛樂圈，郭可盈曾考慮照辦煮碗在《富貴門》首播當日宣布退出。（《蘋果日報》圖片）
 
同無綫約滿後，林文龍改簽大陸經理人，主力發展內地市場搵人仔。

賣樓減負擔
早前林文龍接受國內傳媒訪問時，亦漏口風講到老婆會退出，「可盈拍了十幾年戲，其實女人拍戲比男人辛苦，拍完《富貴門》之後，佢都產生了息影想法，因為佢都拍得攰，希望有唔同嘅生活。」
郭可盈退出唔撈，以往是家庭經濟支柱的她，日後有出冇入，養家責任，就全部落在林文龍身上；雖然林文龍剛簽了大陸經理人，未來會主力在大陸拍劇賺人仔，但因為知名度有限，叫價能力一般，要養老婆仔女，再加一號銀海月供十幾萬，恐怕有心無力。
為了減輕負擔，二人將一號銀海高層相連單位放盤，結果在短短放盤幾星期內，快速成交，以三千零十萬賣出，賬面賺二百八十萬，但由於他們之前將屋內豪裝，單是裝修費都近二百萬，加埋律師費雜費，頂多平手離場。
留種又留人
十個男人九個嫖、一個在動搖，做女人，要鎖得住男人個心，唔少人選擇生 BB挽救危機婚姻。

王菲


樂壇事業正直巔峰時期，王菲選擇大肚下嫁竇唯，同居殘舊四合院，天后更每日紆尊降貴倒痰罐，以為自我犧牲可以留得住男人個心，可惜竇唯人窮也風流，背住老婆搭上女攝影師高原，高調公開戀情同時，反指王菲同佢結婚生仔係「陰謀論」。
張栢芝


因合作電影《無極》，謝霆鋒與張栢芝愛火重燃，拍拖唔夠半年，便到菲律賓秘密結婚，翌年誕下人見人愛乖仔 Lucas謝振軒，原本幸福滿瀉，突然爆出淫照事件，主角之一的張栢芝多次傳出婚姻危機，傳她努力懷孕留住老公個心，但不幸流產，最近張栢芝終於再造人成功，傳聞於加拿大待產。

莫可欣


與莫可欣拍拖十二年，其間方中信耐不耐就有緋聞傳出，莫可欣睇落愛理不理，其實早有準備，瞞住對方成功懷孕，雖然準老豆方中信一時間措手不及，仍快手快腳安排註冊結婚，莫可欣何止攞正牌做符太（方中信真名符力），囡囡符迦晴更得爸爸痛錫，成功截斷方中信所有風流賬。
偷食聲帶
今年五月，雜誌社收到匿名光碟，碟內錄有林文龍自爆背妻偷食，搭上內地奀星董維嘉，林文龍更以死威脅，要求大陸經理人汪子琦取回偷食證據，之後有傳郭可盈的國內中介人汪子琦，多次向兩公婆進行勒索，金額高達百多萬，要求以錢封嘴，否則將林文龍偷食照片大公開。
卒之郭可盈忍無可忍，分別向香港警察及大陸公安求助，汪子琦被大陸公安扣留調查，目前案件仍在調查中。


傳林文龍偷嗒的國內奀星董維嘉。
 
郭可盈國內中介人汪子琦涉嫌勒索郭可盈夫婦。

還是覺得你最好
背妻偷食唔抹嘴，唔想賠上婚姻兼身敗名裂，唔少圈中賤男扮成「鳥倦知還」，返番老婆身邊！
馬德鐘


郭羨妮、佘詩曼、宣萱，食盡無綫當家花旦的馬德鐘，慣性偷食本色難移，直到兩年前，同圈外「二廠」 Katherine手拖手遊泰斷正，何止被公司放逐返大陸洗底，太太張筱蘭佛都有火，決定帶仔仔離家出走到歐洲避世，唔想賠了夫人又折兵，馬德鐘決定修心養性，更經常同太太仔仔一家三口行街晒幸福。
陶大宇 


拍《學警出更》期間，與「狐妮」郭羨妮撻着，陶大宇為了新歡拋棄同眠共枕十七年的糟糠之妻黃慧寶（阿寶）。三角戀獲最後勝利，郭羨妮居然縮沙唔玩，情人變仇人，兩頭唔到岸的陶大宇，好在阿寶念在舊情，願意跟他重修舊好。
龐維仁


05年與李嘉欣到酒店爆房，龐維仁偷食斷正，幸獲太太黃美儀支持破鏡重圓，但 08年依然離婚收場，龐維仁之後與胡敏珊相戀。
撰文、攝影：娛樂組








娛樂八掛大放送★ 為食譜識飲識食街★ 任逍遙旅行萬里路 ★
科技電玩一線通 ★ 寵物地帶 ★ 潮流男女打扮★ 健康之道★ 財經投資★ 五行玄學八卦風水★ 娛樂猛片放送站★
明星靚相大分享(4月刊)★ 明星靚相大分享(5月刊)★ 明星靚相大分享(6月刊)★ 明星靚相大分享(7月刊)★明星靚相大分享(8月刊)★ 明星靚相大分享(9月刊)★ 過期 週刊 及 雜誌(4-6月刊)★ 過期 週刊 及 雜誌(6月-8月刊)★ 過期 週刊 及 雜誌(4-9月刊)☆


 

arrow
arrow
    全站熱搜
    創作者介紹
    創作者 stacylife 的頭像
    stacylife

    明星靚相大分享☆

    stacylife 發表在 痞客邦 留言(0) 人氣()

    E-mail轉寄