唔使用手掣就可以玩到嘅Kinect for Xbox 360，將會在後日（7月30日）開鑼嘅動漫電玩節上畀到場人士限量試玩，每日有100個名額。雖然只得兩款遊戲試玩，但無論係跳舞遊戲《Dance Central》定運動遊戲《Kinect Sports》都簡單易玩，而且可以真正體驗到全身體感所帶來嘅樂趣同消脂效果，筆者玩幾鋪已被KO，真係佩服靚女Pinky跳極都冇話攰！
今次全身體感遊戲系統嘅靈魂，係集RGB鏡頭、深度感應器同陣列式咪高峰於一身嘅Kinect感應器，一接上新Xbox 360 250GB主機就玩到，如果係用舊型號Xbox 360主機的話，就要再接駁轉換線先用到。 Kinect感應器將於11月面世，屆時最少會有15款對應遊戲同期推出，目前香港就仲有未定價，但以美國發售價US$149（約HK$1,162）計算，其實都幾合理，照計推出時都會出埋主機Bundle版。要玩Kinect全身體感遊戲，屋企都要有番咁上下大先得，不過隻隻遊戲要求都唔同，例如《Dance Central》可以喺距離Kinect感應器5至6呎距離玩，不過《Kinect Sports》玩跨欄時則要遠到約8至9呎。如果行得太近或者行歪咗，畫面上便會出現如「Move Back」或「Move Left」警告提示。 《Dance Central》來頭都唔細，由打造《Rock Band》系列的Harmonix開發，遊戲內採用真正舞蹈編排方式，跳盡最新流行歌、Hip-hop及R&B樂曲。以往跳舞機主要都係練腳步，但係《Dance Central》就要求玩家全身舞動，可以感應到手部擺動以及拍手等動作外，連扭腰動作都可以感應埋，跳完應該會燃燒唔少卡路里。 就算唔太熟習舞步都好，反正每首歌都會有「Break it Down」練習模式逐個Step咁教你跳，跳熟成首歌嘅舞步先至玩都未遲，玩時記得開大少少音量先至可以跟到Beat跳。《Dance Central》正式版會收錄90首歌曲及舞步，跳得叻仲可以開啟成就、新舞衣同新場地；而試玩版暫時就只得6首，包括有Lady Gaga嘅《Poker Face》同Lipps Inc.經典歌曲《Funkytown》，見Pinky跳到停唔到，就知道有幾吸引。 《Dance Central》 類型：跳舞 開發：Harmonix 推出日期：冬季 遊戲正式版會收錄6種個人或隊制運動項目，包括有足球、沙灘排球、保齡球、乒乓球、田徑同拳擊，但在動漫電玩節可供試玩嘅，只有跨欄同保齡球，另外再加多個歡呼打氣模式。先講保齡球遊戲，玩法同真正落場打保齡球分別不大，特別在於唔用手掣都感應到手腕的旋轉，可以打出弧形球，真實感都幾強，但運動量相對地較少。跨欄項目就好考大家嘅體力，遊戲主要結合原地跑同原地跳兩個動作，跑跑吓見到面前欄杆變黃時就要準備跳起跨爛，撞欄雖未至於會跌低，但會減慢速度；而且跑步加速時真係要做足提膝動作，Hea住跑的話，遊戲角色都會一樣會唔多郁，筆者在冷氣房內跑咗三次，已經流到一身汗，用嚟減肥就最啱。 《Kinect Sports》 類型：運動 開發：Microsoft Game Studios 推出日期：11月 當然Kinect係主角，不過Xbox 360喺動漫節都有其他未曝光新Game可以試玩以及不同嘅買機優惠。 《Naruto終極風暴2》 類型：格鬥／開發：Namco Bandai Games 推出日期：10月 延續自兩年前《Naruto終極風暴》動畫風格的格鬥玩法，今集更收錄超過40個角色，每個角色都具備可透過改變形態去提升能力的「覺醒模式」及更華麗的忍術招式，另外更可隨意破壞對戰場地。 《F1 2010》 類型：賽車／開發：Codemasters／推出日期：待定 F1新賽季鬥得難分難解，由Codemasters開發的新作《F1 2010》就帶大家去到F1賽道，體驗箇中刺激。遊戲收錄咗今年新增嘅韓國Grand Prix賽道，今季復出的車神舒密加亦會在遊戲內現身。 動漫電玩節優惠當中，以$2,969套裝最抵（包括新Xbox 360 250GB主機、Xbox LIVE無線手掣Arcade遊戲組合、《Forza Motorsport 3》或《Crackdown 2》遊戲），兼送HDMI線、環保購物袋、Xbox LIVE金會員卡、雨傘，以及有機會得到限量版17吋轆摺合單車添！
行得太近電視嘅話，畫面就會出Warning提示。
玩時要保持距離
《Dance Central》跳Lady Gaga新歌
除咗感應到腳部移動外，擺動雙手、拍手甚至扭腰等動作都全部感應得到，消脂一流。
可以逐個Step慢慢學，唔識跳舞都唔使怕。
試玩版收錄嘅歌曲唔多，但人氣爆燈嘅《Poker Face》同《Funkytown》，大家都應該幾熟悉。
練好舞步後，就可以正式上場玩「Perform it!」跳晒成首歌。
《Kinect Sports》玩到流晒汗
要原地又跑又跳，分分鐘比真正跨欄更吃力！
試玩版同樣設有單人及雙人田徑（只得跨欄）、保齡球以及同觀眾歡呼呢4個項目。
比起當年《Wii Sports》的保齡球做得更細緻，Pinky一玩都已經上手。
真係好有真正碌Lane嘅感覺，只係差在少咗拿着保齡球的手感。
動漫節新Game
放大圖片
放大圖片
放大圖片
最抵優惠套裝
留言列表
