唔使$250,000就出到部新寶馬（BMW）？冇錯，仲有二千蚊找！最近代理引入嘅116iA，雖然係入門級車型，不過設備依然齊全，皮櫳、記憶電動座椅及Start-Stop功能統統有，只係換咗副細容積嘅1.6直四偈，比同系嘅118iA平咗$31,000，進一步收窄同日本車嘅售價差距，想筍價出寶馬，邊個話一定要去二手場碰運氣？
歐元兌港元匯價，比去年高位已經跌咗一成有多，喺本港出售嘅歐洲車都變得愈嚟愈抵買。寶馬1系就有三款車型，分別係雙門轎跑、開篷及五門揭背，今次測試嘅116iA就係揭背款，亦係最實用、最適合做家庭車嘅款式。雖然1系Hatchback嘅車長只有4.239m，但係內櫳一啲都唔窄，除非前座乘客係七呎昂藏，要將座椅調校到最後位置，否則後座乘客都有合理嘅活動空間。同時，後排椅背可以60：40嘅比例向前摺疊，變身平整大地台，擺兩個高爾夫球袋都綽綽有餘。 116iA嘅1.6公升直四引擎，係廠方現時容積最細嘅級別，不過馬力及扭力分別有115hp及15.3kgm，加上車重只有1.285噸，起步反應都算唔錯，只係唔好期望有很強嘅爆炸力，一切都以平順、慳油為先，0-100km/h需時12.3秒。廠方指出116iA嘅綜合油耗及二氧化碳排放量，分別係7.8L/100km及182g/km，以現時油價$14.25/L計算，每公里油費只需$1.1。 論操控性，1系向來係同級中數一數二，佢嘅後驅（FR）布局賦予靈活嘅彎路表現，加上底盤調校出色，過彎穩定但唔會呆板。另一方面，原廠嘅六速Steptronic波箱都值得一讚，除咗轉波反應快，三波轉二波嘅寬容度都幾高，只要好好利用加減波，將轉速控制喺3,500-4,500rpm，出彎都可以好敏捷。平心而論，以$248,000就可以擁有咁高質素嘅歐洲車，睇嚟日系品牌要加把勁喇！ 車 型：五門五座位揭背車 引 擎：直四 容 積：1,596c.c. 最大馬力：115hp/6,000rpm 最大扭力：15.3kgm/4,300rpm 驅 動：前置引擎、後輪驅動 傳 動：六前速Steptronic自動波 車身體積：4,239×1,748×1,421mm（長×闊×高） 售 價：$248,000 查 詢：3129 9000（BMW HK）
多功能軚環握感良好，仲裝埋音響系統鍵。
波箱反應敏捷，而且寬裕度高。
出車標準已經有無匙系統，按掣就可撻偈。
容積最細 馬力算唔錯
中控台布局簡約，按鈕鋪排就手。
駕駛席設有記憶功能，絕無將貨就價。
1.6直四偈都有115hp馬力，加速線性又平順。
六速Steptronic 寬容度高
若果放平後排座椅，就可騰出大片置物空間。
揭背造型夠動感，車廂間隔又實用。
車檔案
留言列表
