揀選我最喜愛，老編話可以完全主觀，我認為一生人點都要擁有一次嘅，肯定係開篷 Roadster。貼近現實，打工供得起，首選 C/P值（性能價格比，簡單講即抵玩值！）超晒班嘅寶馬 Z4，外形流麗，性能激情，毋須 Chok樣已浪子得相當徹底，且總令人回頭望多兩眼呢！記者：徐影龍攝影：黃子偉Model：姚浩政@GME Models
其他副刊影片 貼心設計毋懼寒風 放大圖片 
■前輪軸貼近車頭，令轉彎指向性極佳。
都唔係第一次揸 Z4，每次影完相，總是帶有無限依戀。寶馬今年為 Z4加入 M-Sport套裝，跟 M3、 M5般，簡單一個「 M」章點綴，已流露高性能霸氣。我份人偏向溫文，反而更愛大改款後嘅 Z4原始味道，由軟篷改為硬摺頂最抵讚，閂篷時係架雙門 Coupe，近乎完美曲線嘅車身，鶴立雞群嘅超長車頭，已經係一架型盡全場嘅跑車。興之所至，由寶馬陳列室轉入土瓜灣道停燈位時，已急不及待㩒掣玩開篷。硬摺頂 20秒內順滑開啟，和暖陽光射入車廂，儘管天氣稍凉，幸 Z4擋風玻璃屬前傾式，不單止身邊靚女未覺寒氣入體，連髮型都唔怕吹亂。一邊驅車，一邊享受無限開揚感，風聲及景物高速在身旁擦過，呢種駕駛樂趣，點可能唔令人陶醉其中呢！
扭彎指向性極佳
當然，過百萬靚跑 Roadster大有所在，但對我嚟講，跟揭中「太平山」一樣屬遙不可及之夢。 Z4屬入門級嘅 23iA，車價只 50萬元，月入兩萬已供得起有餘，仲有硬摺篷，一個價錢嘆齊 Roadster同 Coupe，算係「理想」而非「夢想」，並非刻意扮公子玩炫耀，真心覺得揸開篷車到郊外暢遊，嗰種駕駛樂趣確係其他車款所欠缺嘅。當然， Z4亦非脂粉之輩，就算最低引擎配置嘅 23iA，馬力都超過 200匹，推動 1,500kg車身綽綽有餘。最重要係廠方堅持 50/50車重平衡，以及頭轆較貼近車前泵把，令到指向性極佳，攻彎時話扭就扭，呢點就係寶馬被人狂讚操控性好嘅原因之一。
放大圖片 
■雙出式氣喉，令車尾更具動感。
放大圖片 
■硬摺篷設計雖複雜，但不出 20秒已可開閂。
放大圖片 
■雙座位未必要趕絕外母，空間絕對闊落。
放大圖片 
■駕駛艙配襯銀邊裝飾，貴氣得來亦夠 Young。
2010各自精采勾住你心 放大圖片 
Fairlady 370Z Roadster$639,800
日產淑女 370Z大改款後，引擎躍升至 333匹，最具代表性係魚鈎形頭尾燈，今年抵港嘅開篷版，比硬頂版更具魅力。查詢： 2262 1088（合誠汽車）
首款四座 放大圖片 
Maserati GranCabrio$1,938,000
瑪莎拉蒂向有車壇貴族公子形象，今年首度推出四座開篷版，仲要夠闊落而非 Dog Seat，的確係獨樂樂不如眾樂樂。查詢： 3521 0183（快意汽車）
火紅棍王 放大圖片 
MINI JCW Cabrio$432,800
正所謂細有細玩， MINI開篷一樣有睇頭。 JCW版以火辣戰鬥格登場，配上六速棍波，岩晒滿身耍棍技術嘅辣跑車迷。查詢： 3193 6800（ MINI HK）
一線超跑 放大圖片 
Audi R8 Spyder$2,669,000起
連鋼鐵奇俠都搵佢做座駕， R8 Spyder屬一線超跑明星， V10版更達瘋狂 525匹馬力，唔使點改已可以落 Track跑。查詢： 2528 1862（合迪汽車）
BMW Z4 sDrive 23iA
引擎： 2,497cc直六馬力： 204hp/6,400rpm扭力： 250Nm/2,750rpm傳動：七速+/-波箱售價：$508,000查詢： BMW HK（ 2714 5271） 
留言列表
