張根碩同文瑾瑩同屬 23歲，亦是細細個已出道，所以特別投契。據稱上年拍此劇期間，碩仔每晚收工返家後，都會同文瑾瑩通電話，不過唔係談情，只係互相提點演技。
妖妖哋嘅韓國萬人迷張根碩，唔係淨係得套《原來是美男》代表作，其實碩仔之後拍過嘅韓劇《瑪麗外宿中》一樣 hit爆韓國同日本。
《瑪麗外宿中》由碩仔孭飛已經大把 fans爭住睇，加埋玉女文瑾瑩（曾被誤譯為文根英）再搭同 Janice Man拍過日本網劇的型模金材昱大搞三角戀，浪漫得嚟又帶點悲情。套劇上年於韓國收視唔錯，下月終於殺入無綫 J2台播映。雖然遲咗成年，但碩仔迷點會唔捧場？
播出日期：
12月 28日起
逢星期一至星期四
晚上 10時半 J2台播放
上年 11月於韓國開播的《瑪麗外宿中》，曾於台灣、日本、中國、新加坡輪住播，等到頸都長，下月尾聖誕節期間， TVB的 J2台終於有得睇。
搵碩仔 過橋
《瑪麗外宿中》一劇主 sell紅爆成個亞洲的張根碩，講文瑾瑩飾演嘅瑪麗，因被老豆迫佢同三唔識七嘅鄭仁（金材昱飾）結婚，為令老豆心死，於是搵咗碩仔飾演嘅 band仔姜無缺扮結婚，點知 2人搞到戲假情真，而同時金材昱亦唔死心繼續狂追文瑾瑩，一段三角戀搞到 3個人頭痕。
咀出火碩仔飾演嘅 band友，原本只係為錢而同文瑾瑩扮夫妻，最後竟日久生情，仲咀出真愛，聽落劇情係老土啲，但觀眾好受喎！
夠誇張碩仔深情戲冧死女，搞笑一樣掂，一場碩仔同外父醉酒後打交場面，睇佢被打到擘大口嗌痛個樣，誇張過星爺。
情敵箍金材昱飾演嘅富二代，被父母安排同文瑾瑩結婚，原本好花弗，但愛上文瑾瑩就修心養性，仲攬到佢鬼咁實。
碩仔同「少時」嘅允兒合演嘅新劇《愛情雨》，暫定下年上半年先出街，而日本富士電視台更已買下版權播放。
停工 犯眾憎
上年拍完《瑪麗外宿中》後，碩仔即跳出韓國轉戰日本，難得最近再拍韓劇《愛情雨》，今次仲夥拍少時的女神允兒，原本套劇計劃於明年初開播，但因最近碩仔忙於飛去日本同 fans聚會，搞到新劇要停工兩星期，令拍攝進度嚴重受阻，原本要拍 5集，最後只拍到 1集，據稱該劇嘅導演嬲到爆，於是罕有地吹雞約齊所有導演的經理人，要求對方三口六面度期。唔只導演，有傳劇組工作人員亦不滿碩仔自備攝製隊，到現場拍攝幕後花絮阻住開工累街坊。
碩仔男人老狗
碩仔唔只拍劇，月頭他孭飛的新電影《寵物情人》亦已上畫，故事講一對以主人及寵物身份一齊生活的男女愛情故事。不過曾有韓國人認為套戲以女性為「主人」，男性是「狗」的方式反映兩性關係絕對侮辱男性，於是向首爾法院入稟禁止該片上映，最後雖然敗訴，但起碼幫套戲宣傳。
電影海報中，女主角金荷娜摸碩仔下巴就好似摸狗一樣（右），而碩仔藏身於紙皮箱扮 cute嘅形態，的確似足寵物狗，難怪被人鬧侮辱男性。
留言列表
