佢鬧完仲想踢我！（真實對白）
我係有鬧過佢！（真實對白）
娛樂頂點
李麗珍鬧完再摑　陳法蓉爆屈辱內幕
2010年01月29日
去年與「油王」朱明分手的陳法蓉，被指誤墮桃色陷阱，導致人財兩失。她日前上《志雲飯局》哭成淚人，自爆因為與朱明結唔成婚而一度諗過自殺。
唔講尤自可，一講就愈爆愈多。陳法蓉還自揭九年前為亞視拍攝《美麗傳說》時，慘被同劇女演員鬧黐脷筋之餘，更遭對方掌摑和起飛腳，陳法蓉說時仍猶有餘悸：「當時我好驚……完全一片空白！」事後陳法蓉難以釋放被辱罵的陰影，一度要尋求心理輔導。
暗藏九年的屈辱突然爆出，當時曾理直氣壯承認鬧過陳法蓉黐脷筋的李麗珍，當然嫌疑最大。舊帳被翻，李麗珍周日（ 24日）被記者問起掌摑事件時，當堂面黑。
日前在無綫電視收費台播映的《志雲飯局》中，陳法蓉竟爆出鮮為人知的娛圈暴力事件。在節目尾聲，陳志雲提及 01年陳法蓉曾為亞視拍《美麗傳說》，在心底裏藏住 9年鬱結的陳法蓉決定為自己出番啖氣。
工作人員抬走暴徒
她停頓數秒，深呼吸一啖氣才開口：「其實呢件事都擺咗喺我心裏面九年喇！我當時拍緊一套電視劇，但呢部係我一生人第一部飛紙仔嘅電視劇。有一日有一個演員，佢好希望放飯前可以放工，而我嗰日就喺我屋企個景裏面，有唔同髮型嘅戲。如是者拍到某個時候有導演嗌：『放食飯喇！』當時有位演員衝咗入嚟，好快走到我面前，就伸手打人，仲講咗句唔知乜嘢『黐脷筋』……我到依家都唔記得，但記得『黐脷筋』！（再深呼吸）跟住我助手好快走到我面前食咗呢一巴掌。喺我完全一片空白嘅時候，我睇到有三定四個男嘅 camera man同工作人員入嚟，將呢個演員抬咗出去，而佢仲繼續想踢我。」


有傳當年李麗珍鬧陳法蓉黐脷筋後掌摑不遂，其後劇情剛巧有幕是講述李選美後怒摑陳。此段戲在《美麗傳說》第 6集出現，有傳拍攝時李麗珍假戲真做，狠狠出手，導致陳法蓉面留五指印。 


鄭姓監製安撫
在陳法蓉繪形繪聲道出自己的受辱經過時，身旁的陳志雲亦大感愕然，露出憐憫之情。此時陳法蓉續說：「我嗰時真係笑唔出聲，我係好驚，跟住我喊到成個妝都甩晒！跟住導演遞個電話俾我，話監製想同我講嘢，問我可唔可以繼續拍落去？我話我好驚呀！唔知發生乜嘢事！跟住我化番好個妝，就再入去拍戲。冇幾耐再上去監製房同呢位姓鄭監製傾偈啦。
「鄭監製同我講：『你可唔可以保守呢個秘密，唔想有呢啲是非！』當時我應承佢，但係我冇諗到第二朝返到公司，所有人都知道。嗰時有好多人問候我，但我到依家都唔知道佢點解會咁激動。我冇諗過呢位演員事後做訪問仲話俾人聽：『我係有話過佢黐脷筋呀！唔使同佢道歉！』咁我應承咗監製唔講，我咪眼淚在心裏流囉，唔出聲，唔解釋！依家我點解講番出嚟？因為我長大咗，唔講出嚟，我心入面仲會有陰影，我應該要放低呢件事。」


01年拍《美》劇，李麗珍正受感情困擾，與許愿離婚不久，又為女兒撫養權一事而煩惱。同年購入了寶翠園單位的她，認識任職髮型師的已婚漢 Jacky Ma（右圖），繼而發展出一連串桃色風波。
 
Jacky Ma

李麗珍唔肯道歉
記者翻查資料，原來 01年拍攝《美》劇期間，已經盛傳陳法蓉和李麗珍交惡。當時有報道指李曾鬧過陳黐脷筋，但就未有提及掌摑事件。李麗珍承認鬧人在先，但事發後竟然理直氣壯對傳媒說：「我係有鬧過佢（指陳）呀！但係點解我要鬧佢，一定係佢做咗啲令人睇唔過眼嘅嘢……我承認係一時衝動，講中咗人哋死穴，咪唔好意思囉。不過我唔係對佢道歉喎，而係對自己嘅言論而道歉咋！」李麗珍的言詞仍相當狠辣。
據知當時陳、李二人為了在套劇入面爭戲份，開拍前已存有心病。一位劇組人員透露：「珍妹又要做衰人，戲份又唔夠陳法蓉集中，條氣當然唔順。當時佢同許愿又離咗婚，搬入新居（寶翠園）後就識咗 Jacky Ma，咁李麗珍要湊住個女，私人嘢又特別煩，所以脾氣都幾暴躁。」
另外，當年亦有另一版本，指陳法蓉在拍攝期間經常遲到兼對工作人員呼喝，才令李麗珍怒不可遏，李才決定出「掌」教訓。更有傳李在化妝間打人不遂，就趁之後一場掌摑陳法蓉的戲份，乘機加多兩錢肉緊，將新仇舊恨一次過發洩，搞到陳法蓉拍罷後臉上留下五指印。
因為鬧出掌摑事件而弄致軒然大波，四年後《美》劇開拍續集，話就話起用原班人馬，但第二輯中李麗珍就被踢走，有指是製作人王晶刻意咁做。至於受害者陳法蓉，據知她拍完《美》劇後，始終擺脫不了被李麗珍掌摑的陰影，曾一度要睇心理醫生，之後經好姊妹開解及引導，更篤信基督教，尋找心靈寄託。


首輯四旦撐劇
01年亞視開拍《美麗傳說》，以李麗珍、田蕊妮、陳煒、陳法蓉四女做膽，但至 05年開拍《美Ⅱ》，雖然標榜用原班人馬，李麗珍卻冇份（田蕊妮已約滿），有傳王晶因為早年掌摑事件而要李「飛 out」。
 
續集李麗珍飛 out

監製承認有人衝動
周日（ 24日），記者向李麗珍提及此事時，她立即黑面怒啤記者，更開住半邊車門破口大罵：「影夠未呀！你哋班狗仔！」事隔九年，依然躁底。其後，她更死撐話摑陳法蓉係「劇情需要」。
記者致電《美》劇監製鄭偉文，亦即陳法蓉口中的「鄭姓監製」。被問到打人真兇是否李麗珍時，他說：「我諗係啩，可能大家一時衝動，言語上有啲誤會啫！（第二輯冇李麗珍喎？）呢個係晶哥決定嘅！」
雖然事過境遷，但陳法蓉心裏始終有條刺，本周一（ 25日）接受本刊記者訪問時，她連「李麗珍」三個字都講唔出口，她說：「好開心可以同 Stephen（指陳志雲）傾偈，我都係將過往一啲經歷講出嚟，我唔會再回應！多謝大家關心。（李麗珍到依家都理直氣壯喎。）我冇睇過……（你指係李麗珍？）有關佢嘅報道。（以後見到佢會點呀？）我冇再同呢套劇嘅演員合作，總之我冇尷尬。」


李麗珍回應黑面
本周日（ 24日），記者向李麗珍問及早年化妝間掌摑事件，當時坐在座駕打算接女兒的她，隨即黑面，開住半邊車門大罵：「影夠未呀！」情緒躁爆。


陳法蓉避提李麗珍
本周一（ 25日），手持新款紅灰色 Chanel袋的陳法蓉駕車到灣仔君悅酒店，記者趁機上前採訪，對於當年屈辱，她說：「多謝關心。」但刻意避談「李麗珍」之名。
 
去年陳法蓉與商人朱明打得火熱，奈何其後有傳男方經濟有問題兼玩失蹤，此段感情對陳法蓉影響甚深。她在《志雲飯局》中亦喊住說出分手原因：「 Tony（朱明）好好，佢好錫我，但真係性格不合。」她亦指近年的負面報道，令二人經常嗌交。《蘋果日報》圖片

向志雲訴苦
早前播出的《志雲飯局》中，陳法蓉除了喊住大談去年她與未婚夫朱明的一段情外，更爆出 9年前拍《美麗傳說》的屈辱事件，其間她講到繪形繪聲，言談間以「呢位演員」代替李麗珍。記者亦曾聯絡與陳法蓉面對面做訪問的陳志雲，但至截稿前仍未獲回覆。


拭淚
在一個小時的訪問中，陳法蓉多次表現激動，提到自己被傳誤墮桃色陷阱和搶陸詩韻男友時，她突然流淚說：「屈得好慘好辛苦……我當時諗過寫封遺書。」
 
淚湧
 
激動

網民戥陳法蓉慘
自從《志雲飯局》播出後，不少網友紛紛談論掌摑事件，大多認為是李麗珍出手，亦有人以為是劇中與陳爭佬的江美儀所為，不過全都戥陳法蓉慘。


監製演員睇法
田蕊妮
有份演《美》劇的田蕊妮說：「嘩！你問我 9年前嘅嘢，我上個月嘅嘢都唔記得呀……我係有聽過呢件事，但我嗰時唔喺現場，件事都過咗咁耐，無謂再講去影響人哋。不過珍妹脾氣其實都 ok，之後仲請我去佢間美容院做 facial！」

鄭偉文
《美》劇監製之一鄭偉文則承認陳、李二人的確有衝突。他說：「可能大家對劇本有自己嘅執着，言語上有啲誤會啦！我作為監製，一定要照顧大家，要控制拍攝進度，所以我嗰時有叫陳法蓉幫幫手繼續拍。我覺得佢黐脷筋問題一啲都唔嚴重。幾年前我都同珍妹喺國內合作過一部戲，大家都係大人，都冇再提番件事。」

任達華
《美》劇男主角任達華則希望將事件淡化，他說：「件事其實都過咗咁耐啦，由得佢丟淡啦，我唔想再有任何是非發生。」

王晶
負責籌拍該劇嘅王晶，對當年陳法蓉和李麗珍的不和傳聞，採取不回應態度，他說：「我依家開緊工，答唔到你！唔該！」 







arrow
arrow
    全站熱搜
    創作者介紹
    創作者 stacylife 的頭像
    stacylife

    明星靚相大分享☆

    stacylife 發表在 痞客邦 留言(0) 人氣()

    E-mail轉寄