余詠珊（小圖）下令改制，唔玩全民公投，冇晒優勢的 Cool魔國慶日到深圳做活動嘉賓的他回應：無乜所謂。玩我咩？（設計對白）
探熱針
措手不及 視帝視后又改制 玩謝 Cool魔
台慶月打到嚟！有指無綫屬意今年劇霸《衝上雲霄 2》的吳鎮宇於十二月中舉行的台慶頒獎禮做視帝， Sam哥唔吼打晒鑼話冇期出席，令一人一票 fans多的 Cool魔張智霖再被睇高一線；點知綜藝科總監余詠珊話要改制，認為公投冇專業人士評審欠說服力，決定今年加番專業評判。
玩到謝！但 Cool魔 Chilam睇得好開：「咁必要時我代 Sam哥攞獎囉。」
劇霸睇高一線
至現時為止，劇霸《衝上雲霄 2》仍是今年無綫收視最高劇集，即使兩線台慶劇有陳豪、黎耀祥孭飛的《法外風雲》及馬國明、吳啟華擔正的《 On Call 36小時 2》，但兩劇男主角是否會成為頒獎禮視帝大熱，仍是未知之數，《衝 2》吳鎮宇及張智霖，始終被睇高一線。
據知，由於吳鎮宇講明不出席頒獎禮，令 Cool魔迷多的 Chilam，一人一票勝出機會更高。
貴客騷Chilam是當晚唯一表演嘉賓，唱兩首歌歌酬五十萬，觀眾全是豪宅準客戶，非富則貴。 
暈浪被 Chilam抽中得 iPhone大獎的 fans，上台後暈晒浪，激動傻笑，連 Chilam手上的獎品（黃圈）都唔記得攞。 
總裁送機海航集團旗下有航空、樓盤、飲品及食品等業務，集團總裁親手把海航飛機模型送給 Chilam留念。
有獎一定攞
以為坐定粒六，但在上週五（十月四日）舉行的台慶亮燈儀式上，頒獎禮策劃人余詠珊聲稱今年賽制將有變動。
「上年一人一票會益咗 fans多嘅藝人，但 fans可能純係支持偶像，唔係睇演技，咁會唔夠專業，今年我哋計劃加番專業評審團落去，但佔嘅比例係幾多，而家仲度緊。」余詠珊說。
改制變相對 fans多的 Cool魔不利，上週國慶日到深圳為海航集團晚宴演出的 Chilam卻不以為然。
「如果有獎，我當然歡迎，五強都好，但希望 TVB早啲度期，我一定盡量到。（改制唔玩一人一票喎！）平常心啦，冇乜所謂。（鎮宇話明去唔到頒獎禮攞獎！）咁我代佢攞！其實其他演員好似馬明、卓羲佢哋都好努力，成套劇（《衝 2》）都好有機會（攞獎）。」
十五分鐘五十萬
演出當晚， Chilam唱了《十指緊扣》及《歲月如歌》兩首歌，笑稱事業剛起步的他，出場十五分鐘收五十萬，一線身價。
由《衝 2》播出至今， Chilam登台剪綵做活動，唔夠三個月，密賺超過五百萬。收派彩，比攞獎更實際。
人棄我取為爭取台慶頒獎公信力，無綫最初屬意鎮宇做視帝，可惜早已做咗影帝的 Sam哥根本唔志在， Chilam機會大增。 
女司儀在台上同 Chilam做訪問，又抽晒水拖 Chilam手，搞到台下女 fans瘋狂尖叫。 
邊行邊簽唱完上車走，保安護住被大班 fans簽名影相的 Chilam，有求必應的他，邊行邊簽。 
大陣仗Chilam的休息室外保安𥄫實，又有黑衣人㩒實房門，慎防 fans破門。
爭崩頭
每年台慶頒獎禮，視帝視后均會成為焦點，今年台慶劇《法外風雲》及《 On Call 36小時 2》，男主角方面包括黎耀祥、陳豪、吳啟華及馬國明，加埋劇霸《衝 2》的吳鎮宇同張智霖，肯定難分難解。
老馬
回歸娘家，連行去一廠做亮燈儀式都行錯路，吳啟華無可否認有啲 out咗！
人逢喜事
快做老豆的陳豪同三屆視帝黎耀祥爭女，又有法庭同打鬥戲，加上有豪嫂同 B仔旺住，喜事重重！但對手黎耀祥亦不肯示弱，信心十足話唔會好似《神探高倫布》咁賴嘢。
叫兩飛
去年已做了視后的楊怡隨時憑《 On Call 2》再爭視后，至於因為離巢搞到亮燈儀式要靠邊站的陳法拉，即使有《法外風雲》和《衝 2》叫兩飛，但她一直被評零演技，未必入到五強。
留言列表
