登機證

京阪神尋找半沢直樹足跡

尋找半沢直樹　京阪神

港產片的取景勝地銅鑼灣新寧大廈年底清拆，曾幾何時唔少影迷著住乾濕褸，特登去到上址搵《英雄本色》的 Mark哥，十年人事幾番新，下一代再睇《英雄本色》，可能已經無人認得喺香港拍。
一套電影或電視劇的成功，不單是演員或劇本的功勞，取景也應記一功。大熱日劇《半沢直樹》，最令人留下深刻印象的，除了「雙倍奉還」等金句以及一班演員的誇張面部表情之外，還有劇集中出現過的場景。《半沢直樹》頭五集，走訪京阪神多處地方取景，氣勢磅礡的「東京中央銀行」，其實係最近重新開幕位於大阪梅田的阪急百貨。劇集大收，連鎖反應下，景點都紅起來，成日去日本的香港煲劇迷，何不去日本尋找半沢直樹的足跡？

在第一集已經出現，半沢直樹工作的東京中央銀行大阪西分行（下圖）睇落好有氣勢，其實係位於大阪梅田東站旁邊的阪急百貨，係日本歷史最悠久的老牌百貨店之一。

（電視圖片）

阪急百貨 2005年進行為期 7年的重建， 2012年尾重開，加建空中花園等設施，是關西地區最受歡迎的百貨店。

阪急百貨連接地鐵車站，交通方便，受到不少太太及遊客歡迎，其中地下二階的食品賣場，更加係水洩不通，人氣甜品是必買之選。

日本 TBS電視台製作的電視劇《半沢直樹》，由實力派男演員堺雅人演活上班族心聲，打破收視紀錄，於日本以至亞洲掀起熱潮。

阪急百貨　梅田總店

地址：大阪市北區角田町 8番 7號
電話：（+81） 6-6361-1381
交通： JR大阪站或市營地鐵梅田站步行兩分鐘
營業時間：（星期日至星期四） 10am-8pm
（星期五及星期六） 10am-9pm
網址： http://www.hankyu-dept.co.jp/honten/

一路 tea　一路傾追債

在第一集，半沢直樹跟死黨同事渡真利於 Café討論如何追債，令觀眾留下深刻印象。 The Grand Café位於梅田站的 Hilton Plaza West。商場於 2010年才正式開幕，名店蒐集，開揚的落地玻璃 7.3米高，讓對面的 JR大阪站盡收眼底，仲可以望到扮銀行的阪急百貨，《半沢直樹》的取景簡直係連晒戲。 Café午市及下午茶主打三文治及甜品，人氣之選有牛油果蝦沙律三文治，蛋糕多達 20多款，並會根據不同季節作出調整，一個 set都只係$76至$96，女仔食一定夠飽，加上環境搭夠，好過成日行完街都係食拉麵咁悶。至於夜市就提供 pasta及 pizza，選擇較少，不過食物係其次，望住窗外的大都會夜景用餐，晚上仲有現場鋼琴演奏，浪漫至極。

《半沢直樹》熱潮下，個個都爭坐窗邊位，一到 lunch time成間 cafe水洩不通，都係下午茶時間去鬆動啲，唔使逼。

Café本來主攻闊太，《半沢直樹》播出之後，成為半沢迷朝聖地，店長表示自從劇集播出後，生意額增加起碼一成。（電視圖片）

Hilton Plaza West座落大阪梅田心臟地帶，商場內的商店主要是國際名牌，加上附近盡是一線企業的辦公大廈，故整個區域被稱為大阪的「鑽石地帶」。

日本人講求健康，三文治餐總會跟一碟沙律，牛油果蝦沙律三文治（左，$96），兩種材料味道絕配；照燒雞肉沙律三文治（右，$76），沙律醬甜而不膩，女士食多兩件都唔怕。

選用十種以上的生果作伴碟，令主角 creme burlee有點被比下去（$128）。

The Grand Café

地址：大阪市北區梅田 2丁目 2番 2号 Hilton Plaza West 6樓
電話：（+81） 6-6342-0022
時間： 11am-11pm
交通：市營地鐵四ツ橋線西梅田駅 4號出口
網址： http://www.the-grandcafe.com/

《半沢》熱潮吹遍大阪

作為《半沢直樹》頭 5集的根據地，大阪到處被染上《半沢直樹》的色彩，走在市中心，不難看到有關劇集的東西。書店內有專櫃介紹劇集的兩本原著小說，池井戶潤的《我們是泡沫入行組》及《我們是花樣泡沫組》，其實小說早喺 2004及 2008年推出，而家挾着劇集威勢，累計發行量高達 230萬本，系列第三本《迷失世代之逆襲》更加係賣斷市。至於劇中相關產品亦大受歡迎，於大阪播放《半沢直樹》的 MBS電視台，紀念品特賣場被一掃而空，其中最有人氣的「雙倍奉還饅頭」，更加於網上被炒至近$400一盒，連男主角堺雅人都話買唔到，認真巴閉。

書店內設有電視播放《半沢直樹》片段谷銷量，唔少人被吸引打書釘。

電視台紀念品專櫃空空如也，仲貼出告示，指「雙倍奉還饅頭」好賣到唔知幾時返貨，有錢都買唔到。

京都納涼床　食腐皮料理

《半沢直樹》中的銀行風雲固然引人入勝，男主角與兩位同事的友誼亦觸動唔少電視迷的心。三個男人經常約埋一齊講公司是非，第一集就去到京都河原町的傳統和式餐廳，環境非常有風味，可以一邊摸酒杯底一邊欣賞鴨川河畔的景色。呢種架空於河邊的露台名為「納涼席」，係鴨川河畔料亭於夏天的避暑奇招，炎炎夏日中感受微微涼風，京都人真識歎。想學戲中主角坐「納涼席」？唔好意思，明年請早，因為「納涼席」只在 5月至 9月開放。
鴨川河畔大大話話有幾十間餐廳有「納涼席」，不過今年最好生意當然係《半沢直樹》的取景地點山とみ。山とみ專提供京都出名的腐皮料理，香港人一聽到腐皮，多數只係諗起糖水或打邊爐，其實喺京都料理入面，腐皮的煮法層出不窮，蒸、炸、煮，甚至醃成漬物，健康又好味，深受日本女仔歡迎。山とみ另一道招牌菜，係自炸天婦羅，提供食材及炸漿，放入桌上的小型油鍋中炸至黃金色。偶爾試吓自己炸天婦羅真係幾好玩，不過千萬要注意安全，同埋唔好炸過龍。咁多好嘢食，無得坐「納涼席」，都值得去幫襯。

山とみ於京都鴨川河畔已經有 50多年歷史，因為《半沢直樹》令老鋪再受注目，連當地人都紛紛慕名而來。

鴨川料理（$138），一個 set食齊咁多款腐皮料理，味道唔會偏淡而無味，特別喜歡菜式賣相一流，吸引食慾。

9月到訪，未夠 6點，納涼席已經坐滿 7成，最受歡迎當然係半沢直樹坐過的角落位。

河原町鴨川河畔係當地人散步熱點，沿住河邊踩單車，同時欣賞兩岸的霓虹燈光。

鐵壺炸物（一人分量，$224），有成 15串，非常抵食，更加會因為不同季節而提供當造食材，食得新鮮最緊要。

京都

（電視圖片）

山とみ識做生意，貼埋張劇照喺門口做生招牌，立刻客似雲來。（電視圖片）

山とみ
地址：京都市中京區先斗町四条上ル鍋屋町 226
電話：（+81） 7-5221-3268
時間：星期一至星期四 12nn-2pm、 4pm-11pm
星期五至星期日 12nn-11pm
逢星期二休息
交通：乘京阪電鐵線至祗園四條站或乘阪急京都線至河原町站，徒步 4分鐘
網址： http://kyoto-yamatomi.com/

公路上欣賞　關西美景

好多上班族都好羨慕半沢直樹，除了因為佢有鬧上司的勇氣之外，仲有一位靚老婆。於第四集，半沢直樹向太太阿花剖白老豆自殺的秘密，喺一望無際的夜景下，更添浪漫氣氛。呢度係神戶著名的東六甲展望台，位處連結芦屋市及有馬溫泉之間的芦有公路中段，海拔高 645米，可以遠眺大阪、大阪灣及神戶港一帶。其實神戶夜景是日本三大夜景之一，與北海道的函館山以及長崎的稻佐山齊名，芦有公路一向係情侶遊車河的拍拖聖地，《半沢直樹》播出之後，據說多咗好多西裝友揸車上嚟沉思，令泊車位供不應求。至於無揸車的旅客，可以由芦屋搭 20分鐘巴士上展望台，留意，一個鐘得一班車，記得要校啱時間唔好送車尾。
展望台有一間 Café，以為係一般 drive-in take away餐廳？其實 Café係神戶市內一間人氣餐廳「 Villabli Garden」的姊妹店，雖然因為環境所限，只係供應 20幾款食品，不過味道甚有水準，咖喱飯及 pizza同「 Villabli Garden」如出一轍。喺展望台睇靚景食飯，別有一番風味。

由東六甲展望台望出來，見到燈光璀璨的並非住宅或商場，而是大阪灣及神戶港一帶的工廠區，有別於大都會的夜景。

（電視圖片）

645 Paradise Café麻雀雖小，內部裝潢十分講究，黑板上有當日主菜的英文食譜，覺得好食可以偷師。

是日推介 Pizza（$64）係百里香辣肉腸 Pizza，配一碗熱辣辣的粟米湯（$21），水準一般，不過展望台上幾大風，食完暖笠笠舒服晒。

神戶

展望台設有座位，企到攰同情人坐低依偎一番，不過如果另一半畏高就大煞風景。

展望台放埋個牌，溫馨提示拍攝位置，唔好以為遊客先會上嚟吹風，真係有西裝上班族嚟沉思㗎。

東六甲展望台

地址：兵庫県芦屋市奥山芦有公路
交通：乘搭阪急電車於芦屋川駅下車，轉乘阪急巴士有馬線 80號往山口營業所前方向約 20分鐘於展望台站下車
網址： http://www.royu.co.jp/

645 Paradise Café

時間：星期一至星期五 11:30am-7:30pm
星期六及星期日 11am-10pm
逢星期三休息
電話：（+81） 90-8231-6162

《半沢直樹》遊遍大阪

《半沢直樹》頭 5集於關西取景，對於成日去大阪掃貨的香港人嚟講，好多景點都熟口熟面，不過受劇集帶挈，再次成為人氣 photo spot，大家有無興趣去湊吓熱鬧？

天王寺通天閣及附近工場

同半沢直樹合力追債的竹下，佢間金屬工場，位於天王寺附近，可以見到地標通天閣聳立於後方，原址其實係一間生產麵包模具的工廠，不過地方較龍蛇混雜，睇完快啲行過通天閣商店街，嗰邊先係遊客區。
地址：大阪市浪速區惠美須西 3-14-11
交通： JR關西本線新今宮站西口，徒步 5分。

由工場望去通天閣，行 5分鐘就到，如果驚抄小路危險，可以行返出車站再沿大街行過去。

電視圖片

梅田空中庭園展望台

半沢直樹與同事經常蛇王上天台飲咖啡透氣，銀行天台可以一覽整個大阪市中心景色，其實係位於梅田的空中庭園展望台，特色係全露天設計，可以 360度俯瞰大阪。本來展望台以外國遊客到訪居多，不過自從《半沢直樹》播出之後，日本人都嚟到朝聖。
地址：大阪市北區大淀中 1-1-88梅田藍天大廈
時間： 10am-10:30pm
收費：$56
交通：地下鐵各線梅田站或 JR大阪站北口，徒步 8分鐘
網址： http://www.kuchu-teien.com

網民搵極都搵唔到，半沢直樹飲嘅罐裝咖啡究竟係咩牌子，原來係道具手足做手腳，遮咗牌子，話唔定遲啲會出「半沢咖啡」。

電視圖片