探熱針
頒獎禮前高層照肺 鍾嘉欣被要脅雪藏
被唱成視后大熱，但鍾嘉欣在星期一(十二月十六日）舉行的無綫頒獎禮中慘吞白果，「最佳女主角」及「最受歡迎電視女角色」通通敗於田蕊妮。
據了解，在頒獎禮前，鍾嘉欣曾被高層傳召入房照肺，直指不滿她企圖推劇唔聽話，在席的無綫總經理李寶安更講到明：「你（鍾嘉欣）仲有五年合約，要雪你好容易！」
要殺一儆百，無綫高層團最終決定讓鍾嘉欣食白果，受到「作反」應有懲罰。高壓政策，人人自危，被點名批評的還有幫公司賺大錢的鄭嘉穎。有指無綫要嘉穎回歸拍劇，否則的話，會截斷他在內地的財路。
剛開場時，鍾嘉欣與田蕊妮還扮鬼臉，諗住每人有一獎。 
當宣布田蕊妮係視后時，鍾嘉欣仍要交足戲恭喜對手。 
亞視出身的田蕊妮，竟然連奪兩大獎，事後竟自爆與余詠珊有密切關係。 
要雪你好容易！
推劇惹禍
無綫三大高層曾勵珍、李寶安及區偉林（左起），為了要令藝員拍劇，經常召見藝員返公司照肺。
被捧為「視后」頂頭大熱的鍾嘉欣，賽前表現信心十足，點知到頒獎禮當晚，居然坐足成晚冷板，失落「視后」大獎之餘，連豬肉獎「最受歡迎電視女角色」，都落在對手田蕊妮手中。
由大熱變大輸家，鍾嘉欣的「死因」，早有跡可尋。
「十月頭嗰陣嘉欣諗住拍完《飛虎 2》就同公司請假，返加拿大探屋企人順便休息吓，因為拍呢部劇拍到好辛苦又受傷，點知公司唔批，要佢緊接開新劇《大藥坊》。最初嘉欣企硬唔接，連樂小姐都勸佢唔掂，件事嘈到上高層，總經理李寶安、助理總經理區偉林同珍姐（曾勵珍）等人就召咗嘉欣返十樓（無綫高層辦公室）照肺，問佢點解唔聽話，請假推劇，期間李寶安仲話：『你知唔知你同公司仲有成五年合約，要雪你好容易！』佢哋完全唔聽嘉欣解釋，總之要逼到佢肯拍為止。」知情人士說。
失寵失分
出動到雪藏做要脅，加上當時臨近頒獎禮敏感日子，鍾嘉欣為息事寧人，最終頂硬上，答應拍《大藥坊》，可惜為時已晚，在高層有份操控的「最佳女主角獎」專業評審投票中，鍾嘉欣分數只有 8.06分，比起田蕊妮的 43.56分，輸足 35分，足以證明高層要鍾嘉欣受到教訓。
長約纏身，鍾嘉欣根本無力反抗，只能怪她去年答應樂易玲加簽三年合約，點知合約搞不清楚，年期三年變六年，鍾嘉欣自己無睇清楚就簽名，錯在太易信人。
獨裁主義
自陳志雲離巢後，李寶安便集大權於一身，睇錢大過天的他，揸乾揸淨藝人騷錢，連余永珊樂易玲都要睇佢頭。
封殺壹傳媒
趕絕雯女
去年 TVB重頭劇《金枝慾孽貳》收視跌唔停，加上主角鄧萃雯唱反調，投訴拍攝時冇劇本要「飛紙仔」，終辣㷫無綫，李寶安立即出「封殺令」，謝絕同鄧萃雯再合作。
禁接 job
今年熱播的《星夢傳奇》，為四線藝人唱出生路，人紅自然多 job，但一班「星夢幫」卻身不由己，有總經理李寶安撐腰的余永珊，下令「星夢幫」在比賽期間不可接 TVB以外的工作，令他們見財化水。
禁粵語受訪
無綫一向禁止藝人亮相其他電視台時使用廣東話接受訪問，雖然被判違反通訊事務管理局的廣播條例，罰款 90萬，但無綫卻不滿裁決，揚言會提出司法覆核。
要人唔要錢
除了鍾嘉欣被高層照肺，連金蛋鄭嘉穎亦中招。近年積極在大陸發展的他，北上收五十萬人民幣一集拍劇，比起過去拍無綫劇集萬鬆蚊一集，收入幾何級跳，過去兩年，他多次拒返娘家開工。鄭嘉穎外闖，雖然令經理人部門受惠，連續兩年錄得過千萬佣金，但李寶安強調無綫着重製作，根本唔志在經理人部門佣金收入，即使鄭嘉穎識生金蛋，都要他返香港埋位。
由於鄭嘉穎與無綫的合約到二○一六年，李寶安於是下令，若鄭嘉穎拒絕合作，公司有權在合約期內，禁止他北上掘金，一拍兩散。
為保財路，鄭嘉穎只有就範，答應明年三月拍無綫劇，最近幾次台慶活動，他亦罕有蒲頭出席，免得再觸動高層神經。
無綫一方面向外宣稱會努力洗底，又口口聲聲會加薪分紅與藝人共享成果，但實情講一套做一套，不斷施以高壓手段擺布藝員，霸道作風，變本加厲。
鍾嘉欣怕被雪，最終接拍《大藥坊》，繼續同陳展鵬做對手戲。 
近年鄭嘉穎密密在大陸接拍劇集賺錢，短短兩年分別在香港及海外買了三個物業。 
同鄭嘉穎關係密切的樂易玲，盡晒力向高層求情，保住愛將飯碗。
近年已甚少出席無綫活動的鄭嘉穎，突然轉死性連續在無綫節目中亮相。 
拍《飛虎 2》時，鍾嘉欣被馬德鐘抱住失足跣低，手臂同大髀都受傷。 
撰文、攝影：娛樂組
留言列表
