探熱針
君如碌爆咭 《金雞 sss》偷襲賀歲檔
事前毫無動靜開拍第三集《金雞》的吳君如和陳可辛，九月突然埋班開機，過去兩集揀正聖誕檔期上畫，今年轉攻賀歲檔，全因陳可辛睇準賀歲片只有周潤發打周潤發的《大鬧天宮》和《澳門風雲》，以及硬銷人多勢眾的黃百鳴《六福報喜》。
三套對手，《大鬧天宮》雖然有紅星拱照，但香港觀眾一向唔 buy合拍片，至於《澳門風雲》，賭片在港亦早已式微，而《六福報喜》的所謂群星陣容，知名度點都唔及老婆吳君如碌咭打人情牌。計過度過無得輸，極速開工有着數。除了有吳君如前度男友杜德偉俾面以六嚿腹肌客串，上週四（十二月十二日），曾揚言不再拍喜劇的張家輝，七情上面在尖沙咀拔「老牛」扮過氣大佬，十五年無出山的化骨龍重見天日，大戰谷 G奶的金雞吳君如，好殺食！
隨時跑出
今年賀歲檔期，強大卡士屬近年罕見，當中以《大鬧天宮》最人才鼎盛，有宇宙最好打的甄子丹，加埋發哥同郭富城，跑出理所當然。只可惜合拍片加入唔少國內演員，香港觀眾未必受落，中港票房分分鐘一個天、一個地。至於《澳門風雲》有周潤發拍謝霆鋒，配搭雖然新鮮，無奈賭片早已式微，要跑出，有難度。而近年例開賀歲片的黃百鳴，新作《六福報喜》主角重複欠驚喜，加上強敵當前，未上畫已輸人兼輸陣。
眼見邵氏過去幾年以紅星藝人堆砌出來的賀歲片都大收旺場，一直無聲氣開第三集《金雞》的陳可辛，睇準賀歲檔缺口，八月突然表示準備開拍《金雞 3》賀太太君如四十八歲生日。
「《金雞 sss》真係（埋班）好急，不過 Peter（陳可辛）數口咁精，開得實無死錯人！況且老婆（君如）實碌到咭搵啲紅人客串，套戲未上已經 call晒 sponsor cover（成本），以小欺大賺到笑！」一名電影人說。
陳可辛睇準今年賀歲片行情薄弱，臨時臨急開拍《金雞 sss》分一杯羮。 
曾經在《金雞》扮演小鋼炮的陳奕迅，第三集將會客串做張家輝手下。
《澳門風雲》
雖然話今年賀歲檔，周潤發要自己打自己，其實吳君如都有份拍《六福報喜》。
《大鬧天宮》
發哥在《大鬧天宮》演玉帝，本應好有睇頭，可惜電影是合拍片，口味未必討好香港觀眾。
測試水溫
吳君如親自出馬，昔日客串過《金雞》一、二集的梁家輝、陳奕迅、鄭中基繼續俾面亮相，新加入的還有舊情人杜德偉、新鮮出爐視帝黃子華，而最難得仲有「六料影帝」、講過唔再拍喜劇的張家輝破禁登場。
上週四（十二日），扮演過氣大佬的張家輝，以一身極八十年代打扮、腰插「老牛」在尖沙咀開工，劇情指他同一班南亞裔排隊黨發生爭執準備開拖。「化骨龍」再現江湖，正當他準備拔出「老牛」大開殺戒，著到好似聖誕樹的 G奶吳君如突然彈出阻止，場面搞笑，連圍觀的市民都笑埋一份。
據了解，拍了《綫人》、《激戰》、《掃毒》等大片成功洗底的張家輝，今次肯再扮化骨龍，除了因為吳君如，其實六料影帝已落實接拍由卓韻芝執導的愛情小品，對手仲要係未合作過的鄭秀文，先以賀歲檔的《金雞 sss》試水溫，張家輝其實計過度過。
四十有八的吳君如夾出四吋 G奶，為新片搏到盡。 
在《金雞 sss》飾演媽媽生的薛凱琪，早前在西貢著低 V裙搬竇晒長腿。 
曾經拍過拖的杜德偉，在老婆 Ice的陪同下為《金雞 sss》客串做鴨。 
君如旗下囡囡如雲，其中飾演頭馬的王菀之，造型夠搶鏡。 
撰文、攝影：娛樂組
留言列表
