探熱針
天王女唔使憂 劉華：我劉德華個女仲有咩路要鋪？
有問必答
問必答
下午三時才舉行的歌迷聚會，劉華早上十時便到達會場，跟工作人員開會及彩排。夠鐘開波，劉華先跟在場的一千二百名歌迷逐一合照，繼而展開答問大會。歌迷急不及待問他是否快將再做老豆，一直死口唔認的劉華，對住他口中「家人」的粉絲，即放下戒心說：「個個月寫一次，梗有一次中喎！」全場歌迷立即歡呼鼓掌。在四十五分鐘的問答環節中，話題離不開老婆同囡囡，但身為「民意特首」的劉華，依然有問必答。
歌迷：你係咪就快做第二任
爸爸？
劉：我努力緊，希望快啲有好消息同大家公布，啲雜誌個個月寫一次，梗有一次中㗎喎，好似一個 cycle咁，實中㗎！
歌迷：你算唔算「怪獸家長」？
劉：點先算「怪獸」？
歌迷：即係會好緊張，幫個女鋪好晒路。
劉：吓？我劉德華個女喎，仲有咩路要鋪呀？
歌迷：你係屬於慈父定嚴父？
劉：仲未知，要等佢大個啲先知！如果佢生得靚女就肯定係慈父，不過由出世到而家都係似媽咪，應該都靚女。（冇一度似你咩？）有呀！一樣有兩隻眼，一個鼻，一個口囉！
週二（十七日），朱麗倩隨劉華到廣州送別紅線女，二人一臉傷痛。 
穿上黑色大褸的朱麗倩，難掩臃腫身形。 
離開時，落住毛毛雨，劉華全程攬實老婆，更替對方擔遮。
活動進行了三個小時，劉華在多名保鏢護送下離開。 
當日聚會設問答環節，歌迷的問題離不開老婆同阿女，劉華有問必答。
分享秘密
歌迷：阿女會喺香港讀書定外國？
劉：我個人希望佢留喺香港，最好讀 local school，但要睇吓傳媒會唔會打亂我嘅計劃，如果太亂都冇辦法，要送走佢，但我自己就想佢同平常香港小朋友一樣，過啲正常嘅生活。
歌迷：可唔可以同大家分享一個秘密？
劉：我有一個小小秘密，就係平時會著番對襪瞓覺，因為對腳好凍，怕凍親瞓喺隔籬嗰個。
聚會進行三小時，臨近尾聲，一眾歌迷要求劉華公開女兒相片，他亦爽快答應：「應承大家下一次聚會安排一吓，係時候同大家見吓面啦！」
後來見歌迷唔願走，劉華再搬妻女上枱解圍：「六點啦！俾我返屋企啦，我呢排都忙住好多嘢做，好少時間留喺屋企，俾我返去陪吓佢哋好唔好？」說罷即由工作人員護送離開。
近日，忙做電影《風暴》宣傳的劉華，自稱很少時間返屋企陪老婆。 
上月，劉華在北京舉行巡迴演唱，大住肚的朱麗倩專程飛到當地捧場。 
護女三招
雖然劉華唔認係「怪獸家長」，但自從 2012年榮升做老豆，劉華便出盡法寶，全天候戒備，嚴防囡囡劉向蕙容貌曝光。
搬屋鎖𨋢
由於加多利山新愛巢位置被傳媒披露，劉華於是舉家搬到月租十七萬的尖沙咀服務式住宅聽濤閣暫住；為加強私隱度，大廈更給予劉華特權，出入會有專人負責「鎖𨋢」，不用同其他閒雜人共用升降機。
起堡壘
09年耗資 2億買入的相連加多利山獨立屋，在囡囡劉向蕙出世後，劉華不惜豪花千萬改裝成滴水不入的安全堡壘，把二千呎的地方打造成寶貝女的小天地，令女兒有更闊落的活動空間。
遮陣打針
去年，囡囡到中環打預防針，如臨大敵的劉華，出動四名保鏢護駕，再吩咐大廈保安，以遮陣阻擋記者鏡頭，最終更驚動警方到場。
留言列表
