探熱針
自視過高 扮黃子華狂改對白 李思捷搞㷫萬綺雯
兄弟反目
因為《玩嘢王》收視好，身為主持的李思捷自以為單飛發展一樣掂，加上愛扮大佬性格乞人憎，最終搞到同「福祿壽」其餘兩兄弟阮兆祥、王祖藍不和，各有心病唔肯再合作。
但李思捷唔介意，事關最近佢正式升格做男一，在新劇《牛頭唔搭馬嘴》中同萬綺雯做鬥氣寃家。多得歐陽震華嫌無綫拍劇人工奀辭演，李思捷才成功執二攤。
新劇是喜劇路線，自居搞笑高手的李思捷，看過劇本後，認為對白寫得唔夠精警，於是好學唔學，扮黃子華改對白。
「佢（李思捷）完全冇諗自己咩級數，啱啱先有機會孭飛做男一，就扮晒嘢，以為自己喺片場大晒，一有對白唔啱心水就大大聲鬧，完全唔俾面導演，人哋黃子華係神級，佢要改梗係無問題，仲求之不得，但李思捷算係乜呀？」一名幕後工作人員說。
唔睇劇本臨埋位前，萬綺雯好專心睇劇本，李思捷就懶得望一眼。 
扮導演導演原本想向他們講解劇情，但李思捷爭住嚟講，要大家跟他意思去拍。 
李思捷未出現前，萬綺雯同其他工作人員有講有笑。
導演上身
上週五（十二月六日），李思捷、萬綺雯及蝦頭（楊詩敏）在九龍城拍攝外景。李思捷未埋位前現場氣氛相當愉快，萬綺雯同蝦頭更有講有笑，但當李思捷一出現，萬綺雯即刻收起笑容，再用背脊「得」住對方，男女主角毫無交流。
每逢有休息時間，萬綺雯都會攞住劇本睇完再睇，反而李思捷全程顧住𢱑頭，事關他打算唔跟劇本、對白自由發揮，就算導演上前講解劇情，李思捷根本唔入耳，當正自己先係導演，不斷發表大篇偉論，搞到全組人都十分無癮。
由於萬綺雯都頂唔順李思捷的惡行，放飯時間拒絕再對住「李大導」，寧願自己俾錢同工作人員到另一間餐廳，食番餐耳根清靜的安樂茶飯。
分開食放飯時間，萬綺雯同工作人員到泰國餐廳開餐，避開李思捷。 
補妝時萬綺雯表情多多，伸晒脷又口擘擘，做出挑逗表情。 
自從李思捷主持的《玩嘢王》（左圖）成功後，「福祿壽」三人開始意見出現分歧，甚少再一齊合作，上星期阮兆祥開個唱，都只邀請了王祖藍做嘉賓。 
改劇本
TVB嘅劇集向來都是是但但，眾所周知都係千篇一律，唔係強姦就係綁架，新進演員有劇本當然唔敢逆旨意照讀，但一班資深老手又點會頂得順呀！
黃子華
「棟篤教主」黃子華一向都不會背劇本，鍾意臨場爆肚，確實由佢改過嘅劇本都好似起死回生咁特別風趣幽默，近排熱播嘅《 My盛 Lady》，簡直係無綫嘅救亡劇。
王祖藍
有鋪改劇本癮，拍無綫劇《老表，你好嘢》時因不停改劇本而與其他演員傳不和，但最終劇集大收，祖藍當然功不可沒。
張衞健
張衞健拍劇向來都係邊拍邊改，劇本改到出場前一刻，當年張衞健喺 TVB拍嘅《西遊記》都收視叫好叫座，佢所改嘅對白仲經常成為港式金句。
留言列表
