「我唔想個仔黐工人多過黐我。」去年四月中為混血牙醫丈夫剖腹誕下兒子的黃婉君（Rosanne）說。因此，自一○年三月嫁作人妻後，她便專心展開造人大計，由培養心情、胎教、安胎，至產子後的各種照料工作，也落足心機。

訪問當天，Rosanne便抱着熟睡中的兒子前來，傭人隨後，她緩緩地坐在梳化上，壓低聲線、溫婉地細說着育兒的點滴，「我二十四小時陪住個仔，除非去做運動時，先畀工人抱一抱；將來個仔讀書，我都會跟進佢嘅功課，陪住佢成長！我諗生兩個就啱啱好，同老公一人拖實一個，50%嘅愛易分啲！」滿足的笑容，比起站在舞台上迎接粉絲的掌聲，更幸福！

Rosanne與兒子Dylan母子裝接受訪問，小小年紀的他，經常對着鏡頭面露笑容，甚討人喜愛。

頭文字D

Rosanne兒子名叫白迅，配合社會發展迅速之意，希望他轉數快、做事效率高；英文名Dylan，跟父親Derek一樣用D字頭，結果，兒子真的人如其名，兩個月便懂說「Hello」；更遺傳了父母的DNA，樣貌標致愛笑，鏡頭一對準，便會眼仔碌碌咧嘴而笑，Rosanne說：「由BB開始，佢每朝早第一眼見到我就會笑到好似太陽咁耀眼，跟住同佢講『Good Morning』，佢笑得仲甜仲開心呀！我好幸運，佢唔難湊，喊都一定有原因嘅。」

一○年三月，Rosanne與任職牙醫、拍拖八年的Derek在港舉行婚禮，結束八年的愛情長跑。

Rosanne為了做個賢妻良母，不斷在網上尋求知識，雖然只當了人母九個月，但是已有一套心得跟大家分享，「我覺得胎教真係好重要，我佗住BB嗰陣，同老公會成日唱〈ABCD〉同〈Twinkle Twinkle Little Star〉畀佢聽，佢出咗世之後，聽親呢兩首歌都會好乖咁靜落嚟，然後慢慢瞓着覺，因為佢覺得啲歌聲有安全感同好溫暖；有時我揸車，擺佢喺後座，佢會有少少扭計，但我一唱呢兩首歌，佢又會笑番，所以胎教真係好有用o架！」

對兒子讚不絕口，大概都是為人母親的習慣，不過，Rosanne明言，Dylan也曾經為她帶來尷尬的時刻，「同佢換片嗰陣，佢試過便便或者尿尿喺我度，呢啲都好正常啦；有時去街，BB會放屁屁，因為啲味都幾大陣o架，啲人會以為係我哋大人放，係咁望住我，都幾尷尬o架，但唔緊要啦！」然後摟實懷中寶寶，一副赴湯蹈火的模樣。