為隨時迎接新生命，黎姿近月將一頭長髮剪短，養尊處優等生仔。
封面故事
取消結婚周年派對全力安胎　黎姿大肚 2個月
2010年01月29日
今年 39歲的黎姿（ Gigi），去年 1月底下嫁比她年長 14歲的富商馬廷強（ Patrick），二人熱愛小朋友，加上女方已屬高齡，因此兩夫婦對生 BB一事非常心急。之後黎姿屢傳懷孕，可惜次次均屬流料。
去年身為基督徒的黎姿順應老公意思，搵高人改名黎珈而，再搵城中「生仔聖手」何永超醫生幫手，希望一擊即中，結果新名諧音「加兒」功效立見。本刊收到消息，黎姿已懷孕兩個月。而她更不忌諱小生命會小器，開心得致電密友報喜：「終於中咗喇。」
黎姿有喜，全家上下興奮不已，老公極度緊張，更取消一月底舉行的結婚周年派對，讓老婆好好安胎，力保不失。
黎姿去年 1月出嫁時曾承諾會盡快為夫婿馬廷強開枝散葉，因此黎姿婚後即開展生仔大計，聽從老公意見搵中醫李國勝調理身體，再睇婦產科名醫董曉芳，狂食維他命同葉酸，希望在中西合璧之下，盡快懷孕。
結果由上年至今，黎姿四度被傳懷孕。先是上年 2月傳她有喜兩個月，到 3月再傳她有喜三個月。到 4月再傳她有喜時，黎姿更親口闢謠：「我冇懷孕。」雖然她講得斬釘截鐵，但到 6月時，傳媒見她肚凸凸又再指她懷孕，而她亦不厭其煩再講一次：「我依家好忙，我同老公有共識，出年（ 2010年）先會生。」
黎姿屢傳喜訊，可惜次次食詐糊，老公馬廷強決定搵玄學家改名博一博。知情人話：「 Patrick年紀唔細，好想快啲有小朋友，佢請教過高人之後，要黎姿改名。雖然黎姿做咗基督徒，不過都順從老公。之後佢又幫黎姿打尖睇『生仔聖手』何永超，總之玄學科學乜都試。」


黎姿原計劃於本月底在君悅酒店 The Grill餐廳舉行結婚一周年派對，最後得悉有喜，決定取消派對。
 
去年成為馬太的黎姿，為想替老公馬廷強盡快開枝散葉，婚後已不設防，甚至改名黎珈而催運求子。努力了一年，近日終於成功有孕，兩夫婦急不及待向親友報喜。
 
黎母默認
上周六（ 23日），黎姿父母外出購物，記者問黎母關於女兒終懷孕一事，她沒有否認，而黎父則一直用曲奇餅遮擋鏡頭。
 
婚後的黎姿經常陪住老公應酬，原來是應馬廷強要求，而黎姿亦樂做跟得夫人。上年 5月，黎姿就陪老公福臨門食飯。《蘋果日報》圖片
 
老公頻頻送厚禮　 1,500萬遊艇
馬廷強對老婆黎姿痛愛有加，不單照顧她家人生活，不用黎姿粗心，去年更送她千五萬「幸福」遊艇。據知近日馬廷強打算再送黎姿千萬豪宅，作為生 B重賞。《 face》圖片
 
7,000萬蘭心閣
07年底計劃結婚的黎姿已收到老公送給她價值 7千萬的蘭心閣愛巢（上圖）。去年中，又獲老公送價值 120萬寶馬房車（下圖）。
 
去年底黎姿獲老公一擲二千萬，為她細佬的美容院擴充，由原本二千呎擴充至七千呎。而美容院門口仍掛着印有黎嬰名字的招牌，顯出黎姿相信細佬有天可完全康復接回生意。
 
120萬寶馬
 
2,000萬擴充舖頭

致電密友報喜


記者聯絡上無綫製作資源部總監樂易玲，問她可有接獲黎姿喜訊，她說：「我未聽過呢個消息，我哋喺除夕倒數派對見過面之後，都冇再聯絡。」

黎姿改名黎珈而，一聽就知想為馬家「加兒」，最近兩人終於如願以償。約兩星期前，黎姿閨中密友就收到她的報喜電話。知情人說：「黎姿好留意自己身體狀況，成日都會 check住。兩個星期前，佢發覺經期遲遲未嚟，就即刻睇醫生，結果證實有喜，醫生話有咗個幾月。佢同老公都好開心，黎姿仲忍唔住要同好友分享喜悅，親自打電話同人講：『今次終於中咗喇，好開心，老公好緊張，猛叫我小心啲。』朋友見佢喺除夕 party仲有飲酒，因為嗰時佢未知自己有咗。」
黎姿高齡佗住金叵羅，加上又係第一胎，老公馬廷強當然非常緊張，兩人本來計劃本月底在君悅酒店池畔 The Grill餐廳搞結婚周年派對，都因黎姿有喜而取消，改與家人及幾位好友食飯慶祝。知情人士說：「搞 party要勞師動眾， Patrick唔想黎姿辛苦應酬，想佢安心養胎，幫佢生個肥肥白白老虎 BB。加上 Patrick驚 Gigi出街惹到豬流感，所以如冇必要都唔俾佢返工，好鬼緊張。」
再送豪宅獎勵
馬廷強除了緊張黎姿身體，對老婆亦向來大手筆，他早已送了市值 7,000萬的蘭心閣豪宅、 1,500萬遊艇和 120萬寶馬房車俾老婆，早前更注資 2,000萬擴充黎嬰創辦的美容診所。據知今次黎姿肚皮爭氣，馬廷強決定再送大屋獎勵，並待胎兒穩定，就陪老婆睇樓，錫老婆錫到燶。
黎姿有喜，黎家一樣好雀躍，現時黎母不時陪住愛女，親自照顧她的飲食。黎母能夠分身照顧女兒，皆因兒子黎嬰的病情日漸好轉，本來一直要坐輪椅的他，現已可站立。知情者說：「自從黎姿細佬上年同殘障美國傳道人阿 Nick見面後，佢成個人積極咗好多，之後每次阿 Nick嚟香港都會探黎嬰，令佢充滿鬥志。加上佢姐夫用咗幾百萬裝修外母間屋，添設腦神經同其他復康儀器，令黎嬰加快康復。黎姿仲話睇住細佬企番起身嗰一刻，全家人都開心到喊。」
上周六（ 23日）下午 1時半，記者見黎父獨自由寓所步出搭巴士到灣仔會合黎母往吃飯，接着再轉往賣平價食品的「價真棧」買曲奇餅。他倆步出時，記者問黎母黎嬰是否可以企起身，她面帶愕然說：「係呀。」記者再問黎母黎姿是否有喜，她沒有否認便匆匆與黎父上車離去，非常避忌。


婚後心廣體胖
黎姿婚後心廣體胖，加上肚凸令傳媒誤會懷孕，不過今次經她親口向朋友報喜，不再是美麗的誤會。《壹周刊》圖片
 
黎姿父母雖有女婿照顧生活無憂，但上周六（ 23日）中午黎父外出，竟然有保母車同的士唔坐，慳家到迫巴士到灣仔會合黎母。
 
之後黎父與黎母在灣仔一間泰國菜館醫肚。數日來，黎父都是一支公外出，據知原來因黎母近日到女兒家中暫住，方便照顧黎姿，出入亦小心翼翼戴上口罩，免感染流感。
 
黎姿父母慳家
醫完肚，黎姿父母去到「價真棧」買平嘢，年貨睇唔啱。最後黎父跟黎母說，要買一盒曲奇餅做下午茶。之後黎姿父母分道揚鑣，黎父坐巴士返家，黎母則坐保母車。之後保母車成功擺脫記者採訪車。

生仔聖手何永超


年逾 50的何永超，是香港生殖醫學會前會長，其診所位於中環太子大廈，名人客仔有吳君如、劉嘉玲、李嘉欣等。何永超有「生仔聖手」及「不育救星」之稱，其中一個威水史是成功幫一名近 50歲的女士懷孕，誕下孖胎，故向他求診個案要排至明年底。專研究不育個案的何醫生，近年選擇透過一些藥物注射法，控制女士荷爾蒙釋放的時間同分量，為客人增加懷孕機會。


吳君如
向來喜歡小朋友的君如， 05年向何永超求診，經半年診治，她終在 06年以 41歲高齡，為陳可辛誕下女兒陳是知。
 
劉嘉玲
43歲的劉嘉玲 08年與梁朝偉結婚後，便搏命造人，可惜經過一年努力還是未有喜訊，去年在老友吳君如介紹下向何永超求診。
 
李嘉欣
08年下嫁許晉亨後，眼見已踏入高齡產婦階段，生仔刻不容緩。去年中她被傳媒撞破與老公到何永超診所求診。

蘇民峰：今年容易有 BB
「黎姿本身個命格係屬土，加上佢秋天出世，要有火去生旺佢條命。而佢個原名黎姿在畫數方面幾好，不過因為國語發音近金，所以都唔係太利佢。而新名黎珈而，「黎」畫數 15屬火，「珈」畫數 9屬木，「而」畫數係 6屬木，個名各自分開睇都係吉數。不過加起嚟就係 30，雖然呢個唔係個大吉嘅數，但以五行去睇，有火有木好旺佢，因為佢條命『火多仔女多，火少仔女少』。而 2010至 2015年因為屬火，呢幾年內佢會容易有 BB，不過可能係一個起兩個止。佢可以考慮用五行風水方面去搭夠，例如牀頭向東南，或用有青綠紅橙紫嘅嘢都會有利佢。」


去年黎姿為催運生仔，改名為黎珈而，取其諧音「加兒」，她的朋友甚至將新名掉轉讀，笑稱她做「依家嚟」！

姐夫揼數百萬裝修
黎嬰住所變復康院
去年黎姿老公馬廷強為想盡快令黎嬰康復，一擲數百萬重新裝修他與父母同住的大坑慧景園千五呎居所，將室內模擬成復康院一樣，內置百萬腦神經及復康儀器、物理治療設施，又聘請私家看護及一位外籍傭工全天候照顧黎嬰，方便黎嬰在家接受密集式治療。近月黎嬰的康復終有大突破，不單四肢比以前有力，頭部能輕微郁動，離開輪椅站起來，並開始透過物理治療學行。

去年除夕夜，黎姿夫婦在君悅酒店十一樓 The Grill餐廳開派對，康復進度理想的黎嬰亦有出席與親友一同倒數慶祝。近日黎嬰更實現企番起身學行的新年願望。


黎姿為胞弟百萬改裝家居圖


馬廷強為黎嬰在大廳間了一個大房，放置百萬腦神經康復儀器及物理治療設備。為方便坐輪椅的黎嬰出入，房間的走廊、廚房及黎嬰的睡房門一律擴闊並改為趟門。至於黎嬰的睡房與客廁之間的部分牆亦打通，讓他可從睡房直往洗手間，並在洗手間加設很多扶手，照顧他需要。








arrow
arrow
    全站熱搜
    創作者介紹
    創作者 stacylife 的頭像
    stacylife

    明星靚相大分享☆

    stacylife 發表在 痞客邦 留言(0) 人氣()

    E-mail轉寄