黎姿懷孖胎要留家安胎，最近一次露面已是 2月初。當時已大肚 4個月的黎姿離開銅鑼灣黎嬰創辦的美容診所時，見記者拍照即以外套遮掩，可惜上車時被大風一吹，巨肚即時現形。"
封面故事
30萬做「胚胎植入」 黎姿證實懷孖胎
2010年03月05日
39歲的黎姿，自去年 1月下嫁 53歲富商馬廷強後便積極造人，今年 1月更被本刊率先披露有喜消息。 2月初黎姿到細佬美容診所巡視業務後，便再沒有公開露面。
黎姿足不出戶，原來是懷了孖胎。據知黎姿在生仔聖手何永超主診下，豪花約 30萬接受人工受孕，成功將胚胎植入子宮，現已懷有孖胎 5個月。據知黎姿個肚大得好快，因此脊椎負荷比一般孕婦大，需要留在蘭心閣家中安胎，老公馬廷強亦陪伴在側，貼身照顧。本周一（ 1日）下午，黎父黎柱亦笑笑口親證黎姿懷有孖胎：「係孖嘅！估計喺 6、 7月生啦！」

老竇親證黎姿懷孖胎

黎姿 08年宣布退出娛樂圈， 09年初即與富商馬廷強結婚，婚後積極造人，但經過半年仍沒聲氣，已屆 39歲高齡的黎姿除即搵高人改名黎珈而，取其諧音「加兒」外，更向生仔聖手何永超求診，欲以人工受孕方法盡快懷孕，為馬家開枝散葉。
 
結婚一年終於如願以償，今次仲係一索得孖，黎姿與老公馬廷強真係飲得杯落。

植入兩個胚胎
據知黎姿 09年中開始接受人工受孕療程，試了 3個月便成功。知情人士說：「何永超醫生個期好 full，黎姿都係靠人事幫佢打尖，所以好快就有得見醫生。為咗快啲成功，黎姿聽晒醫生吩咐，做完胚胎植入之後好好休息，又唔多出街，結果佢使咗大約 30萬做咗幾次就成功！為咗增加成功率，醫生一次植入兩個胚胎，結果兩個都成功受孕，令黎姿同老公好開心。不過因為係孖胎，所以個肚大得好快，依家 5個月已經好似 7個月咁。本來黎姿諗住自然分娩，但生孖胎風險大好多，馬生唔想老婆辛苦，所以兩夫婦商量後改咗開刀，馬生仲會搵高人幫佢擇日。不過日子就仲未肯定，大約係 6月尾 7月頭。」
懷孖胎咁辛苦，難怪近月黎姿再沒公開露面，農曆新年期間都足不出戶，留在半山寓所蘭心閣養胎。據知黎姿在家養胎期間，除了老公馬廷強經常陪伴外，黎母亦不時上門照顧女兒。為迎接兩個小生命的來臨，馬廷強更預訂了舊山頂道嘉諾撒醫院唯一一間頂級豪華產房，給黎姿生產之用。知情人士透露：「因為孖胎有機會早產，所以馬生已經訂咗嘉諾撒 6月尾 7月頭一連 10日嘅豪華產房。」
雖然老公馬廷強已預訂嘉諾撒醫院產房，但原來馬生有兩手準備，「馬生喺澳洲悉尼嘅小海灣區有個 10萬呎莊園豪宅，加埋好多親戚喺澳洲，佢哋本來想喺澳洲生。點知依家係孖胎，為咗方便黎姿媽咪照顧個女，黎姿又想細佬黎嬰可以喺 BB一出世就見到 BB，所以依家好大機會留喺香港生。不過馬生喺澳洲醫院都訂定產房，以防萬一。」知情人士說。
記者致電何永超醫生，對於為黎姿進行人工受孕令她成功懷有孖胎一事，他表示：「呢個問題我唔可以透露，如果純醫學問題我可以答你，不過有關某個人嘅事我就唔可以討論。」
黎父破例開腔


黎父開腔：係孖嘅， 6、 7月生。
本周一（ 1日）下午一時許，黎姿父親黎柱離開大坑慧景園寓所準備外出時，直認黎姿懷孖胎，「佢係有咗！（係孖胎？）係孖嘅！ 6、 7月生！」

醫生唔肯講，但黎姿父親黎柱就喜出望外，本周一（ 1日）下午他步出大坑慧景園寓所時就破例開腔，直認乖女懷孕胎。
記：記者　黎：黎父
記：世伯，恭喜你抱孫呀。
黎：係！佢（黎姿）係有咗。
記：黎姿最近身體好唔好呀？
黎：我唔知咁多 o架！我唔係成日見到佢嘛！佢好少返屋企，好少出街，喺屋企多。
記：有消息話佢懷有孖胎？
黎：係呀！係呀！
記：孖胎係男仔定女仔呀？
黎：（黎父冇答，卻突然自爆）……估計係 6、 7月生啦！
每月食 30萬補品
黎姿證實懷有孖胎後，黎家馬家上下都興奮不已。馬廷強更極度緊張，先是取消了 1月底舉行的結婚周年派對，讓老婆好好安胎，然後又迅速安排黎姿入住香港舊山頂道嘉諾撒醫院做詳細檢查。知情人士透露：「你知懷孖胎比普通孕婦辛苦雙倍，嘔又嘔勁啲，個肚籮咁大，所以馬生即刻叫工人煮啲好嘢俾老婆補身，依家黎姿日日食頂級血燕、特大冬蟲草、花膠王等，每月淨係食材已經超過 30萬。就算依家未生，馬生已經搵定最 top嘅陪月阿姐，等黎姿生完有專人服侍。」


黎母緊張
1月中，黎姿父母外出，本刊記者上前問黎姿懷孕一事。可能當時黎姿的狀況仍未穩定，故兩老未肯回應，黎父更用曲奇餅盒遮樣。據知現時黎母經常到黎姿蘭心閣家照顧乖女，非常緊張。
 
全家雀躍
05年黎姿打本俾細佬黎嬰在銅鑼灣開醫學美容診所，黎嬰在交通意外中受重創後，診所的工作就由黎姿接手。自去年成功懷孕後，黎姿已把業務交由女助手全權負責。黎家上下對黎姿懷孖胎非常興奮，黎嬰仲話要第一時間見 BB。
 
細佬學行
去年年尾，黎嬰出席黎姿夫婦在君悅 The Grill餐廳搞的除夕派對，當時見他的康復進度理想，近日黎嬰已經學行，令懷孕的黎姿喜上加喜。

送樓獎勵老婆
馬廷強除了緊張黎姿身體狀況外，對辛苦懷胎的老婆亦非常闊綽。他早已送了市值 7,000萬半山梅道蘭心閣豪宅、 1,500萬遊艇和 120萬寶馬房車俾黎姿，早前更注資 2,000萬擴充黎嬰創辦的美容診所。據知馬生更決定加碼，等老婆產後養好身體，買多層豪宅俾佢揸手。黎姿懷孖胎咁爭氣，老公梗係錫到燶！


馬廷強對黎姿非常愛錫，除了把 7,000萬的梅道蘭心閣送給老婆外，早前仲注資 2,000萬擴充黎嬰創辦的美容診所（右圖）。 


預訂嘉諾撒頂級產房
據知黎姿今次預訂嘉諾撒醫院最頂級產房，曾於 05年裝修，每日房租接近 5千元。豪華產房內有一個房和一個大廳，內有電動牀、浴室、微波爐、雪櫃、保險箱、免費上網服務及衛星電視等，設備齊全。不少名人如陳慧琳、郭可盈、楊黛思、周蕙蕙和陳慧珊等，都在這醫院生 BB。 


黎姿老公馬廷強在悉尼的小海灣區有一個 10萬呎莊園豪宅，因此馬生除了預訂嘉諾撒醫院給黎姿待產外，亦預訂鄰近悉尼馬宅的皇家阿弗雷德王子醫院（ Royal Prince Alfred Hospital）作後備。
人工受孕分體內體外


何永超醫生

曾為吳君如、陳慧琳睇症的生殖醫學專科權威何永超醫生表示，現時人工受孕方法主要有『體內受孕』及『體外受孕』（即黎姿做的胚胎植入）兩種。『體內受孕』是指將精液抽出，放於不同的培養液，然後利用離心及游離方式，剔除活動力不佳的精蟲，再將活動力良好的精蟲濃縮，利用特殊導管，送進子宮腔內，藉此協助受孕。
至於『體外受孕』，醫生會為婦女注射「超排卵針」，以刺激多個卵子同時成熟，接着將卵子取出，與精子結合培育成胚胎，最後將質素佳之胚胎移植到母體內，達至成孕，因此孕婦懷有多胞胎比例較正常高。
人工受孕通常以一個月為一次療程。現時『體內受孕』每次療程收費約幾千至 1萬，而『體外受精』每次療程收費約 6至 7萬，住院費另計。『體內受孕』成功率一般約有 15%，而『體外受孕』成功率則達 30%或以上。不過亦會因女性年齡及身體質素而有所改變，婦女於 43歲時懷孕機會只有 5%至 10%， 45歲過後就不宜再試。
麥玲玲：生女機會大
麥玲玲表示，從黎姿與老公馬廷強的面相來看，他們約有 3名兒女，有仔有女，不過頭一胎生女的機會較大。


眼肚位置代表子女宮，黎姿兩邊眼肚都好靚好飽滿，即係佢會有仔有女，而且仔女都會係靚仔靚女。今年虎年佢最易有 BB，虎 B同兔 B（ 2011年農曆年後出世）都夾黎姿。如果係孖胎，生女嘅機會會大啲，佢會生 3個左右。
 
馬生耳珠就生得好靚，夠厚同貼向嘴，生女會好旺佢。不過佢個相都係仔女都會有。

樂易玲恭喜黎姿


樂易玲與黎姿情同姊妹，本周三（ 3日）晚記者致電樂小姐，佢話：「人地嘅嘢可唔可以唔答？不過如果黎父都咁講，我當然恭喜佢。最緊要係佢幸福快樂，我會約佢食飯見面，睇吓佢咩情況。」
不育成因男女各佔三成


靳嘉仁醫生

根據世界衞生組織數據顯示，每 6對夫婦就有一對不育，但只有 6%會接受人工受孕。夫婦經歷一年正常性生活及沒有避孕的情況下仍沒有懷孕已屬不育。
導致不育原因很多，男女各佔三成。男士常見原因包括弱精、精子質素差、煙酒過多、睪丸異常、精囊靜脈曲張、生殖器官因手術或發炎而受損等，而染色體問題及遺傳也有影響。女方常見原因包括年齡較大、患上盆腔炎及子宮內膜異位等婦科病，餘下個案則是男女綜合因素或成因不明。
根據荃灣港安醫院婦產科專科醫生靳嘉仁表示，在香港接受人工受孕的夫婦中，女方常見問題多是輸卵管阻塞，而男方主要是精子不夠活躍和數量不足，而香港不育男女有三之一是原因不明。








明星靚相大分享☆復活板娛樂八掛週刊雜誌★娛樂八掛大放送★ 為食譜識飲識食街★ 任逍遙旅行萬里路 ★ 科技電玩一線通 ★ 寵物地帶 ★ 潮流男女打扮★ 健康之道★ 財經投資★ 五行玄學八卦風水★ 娛樂猛片放送站★ 伴我奔馳 賽馬貼士 提供★
明星靚相大分享(4月刊)★ 明星靚相大分享(5月刊)★ 明星靚相大分享(6月刊)★ 明星靚相大分享(7月刊)★明星靚相大分享(8月刊)★ 明星靚相大分享(9月刊)★ 明星靚相大分享(10月刊)★ 明星靚相大分享(11月刊)★ 明星靚相大分享(12月刊)★ 明星靚相大分享(01月刊)★ 明星靚相大分享(02月刊)★ 明星靚相大分享(03月刊)★ 週刊 及 雜誌(4-11月刊)☆ 週刊 及 雜誌(10-3月刊)☆


 

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄