個唱超支壓力爆煲楊千嬅拒行房三個月老公找辣妹相陪快週刊 626期－明星靚相大分享☆

面容憔悴全力準備個唱的千嬅，近睇面容憔悴，毫無光采可言。

黑超遮醜一見到記者，平日習慣素顏示人的千嬅，都要摷番副黑超出，遮掩壓力暴殘的面容。

華星一姐不時扭岳少計的千嬅，滿約「A Music」後轉到姊妹公司「東亞華星」做一姐，從此事無大小自己話事。

個唱超支壓力爆煲楊千嬅拒行房三個月

楊千嬅去年在賭城閃電註冊後，等到頸都長，終鐵定「12.20」筵開50席補擺喜酒，待丁母正式飲過新抱茶後，便養好身體生丁B。

不過，一向好勝的千嬅，對於步入倒數階段的十月紅館個唱，睇得比婚宴更加緊，為了做番場好戲，丁太由歌衫到舞台佈置樣樣力盡完美，結果個唱經費嚴重超支，老闆牙痛咁聲。

個唱超支、壓力爆煲，令素來有公主病的她腎上線急升。據知，千嬅為了專心綵排十月紅館騷，傳向老公丁子高下「禁慾令」，暫停行房三個月。上月底，寂寞的丁子高趁千嬅赴日拍攝音樂特輯，即約會妙齡辣妹行街食飯解悶，睇怕今次有排解畫喇。

婚後的楊千嬅，不時與老公丁子高隔空打情罵俏，晒恩愛唔怕肉麻。揚言要做賢妻的丁太，表面上嫁雞隨雞，實情大女人的她不時公主病爆發，老公亦要唱句「小生怕怕」。

據千嬅身邊的密友爆料：「千嬅有時工作唔開心，返到屋企就黑埋塊面，阿Real就硬食晒，仲要幫佢骨。」千嬅亦自知難頂，接受訪問時不止一次揚言：「娶我男人好大勇氣，你估我真係易頂！」

被迫減磅

三十歲過外的女人容易精神緊張，尤其是事業心重的千嬅，一方面要張羅年尾婚禮，另方面又要籌備十月頭的紅館演唱會，千斤重壓力下，令千嬅腎上線急升，同樣令身邊的人緊張。

據知，希望以最佳狀態拍婚照及開個唱的千嬅，今年五月開始要求丁子高與她一起進地獄式減肥，一日三餐跟足營養師餐單，以水果及高纖食品為主，知情人稱：「千嬅猛話阿Real有肚腩，影婚紗相唔好睇，於是日日迫佢跑步，就算自己出埠，都要打住電話俾老公問佢有冇達標。」

特訓兩個月後，千嬅由56公斤減到52公斤，還有2公斤就達標；丁子高為了滿足老婆，減磅速度更加驚人，特訓兩個月已減掉十五磅肥肉，一日三餐冇啖好食。

婉拒要求

迫減肥都未算慘，最慘就係要血氣方剛的丁子高禁慾，傳由七月中開始，他已多次被老婆婉拒，「千嬅要擺完酒先要BB，但佢唔想食藥避孕，怕整壞身體同把聲，其他方法又冇百分之一百，加上佢每晚做完運動都冇晒精神，中醫又勸佢早，兩公婆冇乜行埋，好在佢地新婚感情好，先冇大問題。」

上月尾，千嬅隻身赴日拍攝音樂特輯，與丁子高分隔兩地，但千嬅每次都要求老公定點報到，現在有了微博，兩公婆更會在網上報告行蹤。自以為掌握丁子高一舉一動的千嬅，想法未免太天真。

偷會辣妹

上月28日晚，本刊就發現丁子高趁老婆出埠，火速約會女性密友到中環置地食飯聚舊，順便慶祝壽星仔7月30日的三十一歲牛一。可惜，丁子高在商場地牢被本刊撞到正，發現記者後，身邊的妙齡少女第一時間掩面閃避，更在丁子高的眼神示意下，更火速彈開幾個身位，丁生更主動向記者解畫：「一大班人，我做緊！」然後匆匆竄入電梯避開記者。本刊記者致電到他的手機，電話即接駁到留言信箱，似是此地無銀。