舒淇雖然已經 34歲兼日拍夜拍，但當日佢在助手陪同下素顏睇樓，見佢個樣依然幾索，難怪黃秋生形容佢係「圈中第一美人」。"
渴到出面
34歲中女呻 dry 舒淇北京買 1400萬剩女屋
2010年09月29日
自從 04年同黎明分手，一直冇拖拍的舒淇煲極都係冇米粥，就算主動出擊向張震示愛可惜都係爛尾收場。
34歲剩女舒淇 dry爆，一方面上微博狂呻「我在寂寞的空間裏」，一方面為自己鋪定後路，月中趁新戲《精武風雲》在北京宣傳時，秘密到北京豪宅區睇市值 1,400萬獨立屋，更睇足成個鐘先肯走。買定「剩女屋」，將來冇男人都有樓揸手，醒目！
恨拍拖恨到出面的舒淇，曾經講過「女仔梗係渴望拍拖，每個人都好想搵到一個愛自己嘅人，不過唔係話搵就搵到嘛！」冇拖拍，惟有寄情工作分散注意。
豪宅磨爛蓆
現正在北京拍馮小剛執導的《非誠勿擾 2》的舒淇，本月 15日出席完《精武風雲》北京宣傳後，撇甩下一站飛上海宣傳的大隊，獨自留守當地繼續拍攝。
本刊發現未有戲分的舒淇， 15日下午由酒店出發到北京出入境管理處，當日舒淇身穿白色跌膊 tee同鬆身牛仔褲、戴住灰色膠框眼鏡同彩色 cap帽，由於冇化妝，未有引起途人注意。
逗留 10小時後，舒淇便跟助手坐車去到位於北京國際機場附近的順義區，英式設計的新落成獨立屋「藍岸麗舍」。舒淇一落車即刻走去售樓處，其間參觀了多個示範單位，而且對職員講解非常留心，足足逗留個多小時才上車離開，似乎對每幢叫價 1400萬人民幣的別墅非常有興趣。
北京 1,400萬屋
以豪華英式別墅做賣點嘅「藍岸麗舍」，距離北京機場只需 10分鐘車程，面積由 4千多呎至最大的一萬多呎，啱晒經常周圍飛嘅舒淇。
香港租樓住
舒淇現時以月租 5萬 5租住中半山竹林苑過千呎單位。
一身便服打扮嘅舒淇（左一），由兩名助手陪同下睇樓。
華誼兄弟狂撬
睇完千萬豪宅，舒淇立即飛車到一間私人美術館趕拍《非誠勿擾 2》。導演馮小剛及內地演員姚晨一早到場等舒淇埋位，原來舒淇要拍攝一場試婚紗戲，換上白色斜膊婚紗的舒淇，化妝整頭後耐心聽馮導教路，拍至深夜才收工離開片場。
據知自《非誠勿擾》在國內大收後，內地娛樂公司華誼兄弟希望將舒淇收歸旗下，力捧舒淇頂替周迅同李冰冰成為國內電影一姐。舒淇睇樓睇得咁投入，似乎真係想留喺大陸長搵「人仔」，如果識埋個國產富豪就錦上添花啦！
舒淇同葛優做情侶的《非誠勿擾》大收，令馮小剛即刻扑鎚拍續集。
《非誠勿擾 2》講舒淇同男主角葛優以試婚測試大家係咪適合對方，不過拍攝當日未見葛優，只見舒淇着住件露肩婚紗，似足希臘女神。
在國內屬一線，舒淇未埋位前有多名工作人員圍住服侍。
導演馮小剛
喺現場不斷向舒淇教路嘅名導馮小剛，大讚舒淇「隨和、隨性、隨俗；知情、知理、知趣，所有劇組人員都喜歡她！」
舒淇與黎明拍拖 6年，兩人 04年分手，舒淇更被發現於黎明與樂基兒被爆婚訊當晚，在華表獎慶功宴同馮小剛等人劈酒麻醉自己。
微博狂呻
感情生活 dry爆的舒淇，經常上微博呻中女之苦，除咗話自己好寂寞，中秋節時又話「無法人月兩團圓」，好在舒淇悶爆之餘都識玩自嘲，自稱「宅女」更將敷面膜師奶樣（左圖）公開示眾！ 34歲人都咁可愛，好快有人追 o架喇！
年賺過 2千萬
被福布斯列出去年收入高達 2,360萬的舒淇，由於《非誠勿擾》在國內狂收 3億，直接令女主角舒淇片酬暴升至 400萬，成為國內最高片酬的港台女星，直迫一姐周迅的 450萬人民幣。
電影一部接一部，先有《全城戒備》同亞洲暫時收過億的《精武風雲•陳真》，排住隊上畫有劉偉強執導的《美麗人生》、馮小剛的《非誠勿擾 2》及侯孝賢的《聶隱娘》，單計片酬，舒淇已穩袋 2千萬，加上剛成為 Emporio Armani亞洲區代言人，舒淇今年肯定唔只賺 2300萬咁少啦！
《美麗人生》
《精武風雲．陳真》
留言列表
