爆陳山聰背後發功何超雲搞掂三太內幕忽然1周 838期 @ 明星靚相大分享☆

大封面

傳足半年，何超雲和陳山聰終於鳥倦知還，上周六（13日）二人孖住由英國返香港，超雲更發言人上身，將自己和陳山聰拍拖4個月的秘密戀情公開，還高呼：「我超愛山聰！」

超雲年初與陳山聰傳緋聞時，已遭母親三太陳婉珍極力反對，可惜22歲女愛到天昏地暗，即使三太怎樣棒打鴛鴦都無用。陳山聰為食超雲肉，先與老婆Ponny（楊渡萍）離婚，「淨身」力追超雲。為獲得賭王三太接受，陳山聰再訛稱因家事向無綫請假4個月，實情全職陪超雲，更在超雲背後發功，向三太使出苦肉計。

過去4個月，超雲跟三太角力無數次。據知超雲初期施軟功不遂，回港前在電話中與三太吵大鑊，更cut線收場。雖然由年初爆發的爭產戰暫告一段落，但三太心知超雲極得賭王歡心，若然母女反目，只會令三房少隻爭勝棋子，終於在8月初作出讓步。今次超雲攬「聰」勝利回歸，背後全靠陳山聰機關算盡。

入行18年的陳山聰，演過無數配角，一直半紅不黑，直至去年處境劇《女王辦公室》，才令他人氣上升，更獲「潮山聰」之稱號。去年底傳出陳山聰力追何超雲的同時，亦有報道踢爆他已婚，初時打死唔認話：「再搏殺多兩年就結婚。」直到證據確鑿，他才局住承認：「我同Ponny簽咗紙離婚，絕對唔關第三者事。」誠信破產，陳山聰被指不認妻、棄糟糠、大話聰。

陳山聰年初爆離婚，轉頭拍完古裝劇《洪武三十二》，連慶功宴都唔去就漏夜飛往英國陪超雲。為了近水樓台，陳山聰更不理事業前途，辭演已造型的劇集《回到三國》，一心一意留在超雲身邊做跟得男友。

英國好友睇唔過眼

陳山聰4月到埗英國，先陪超雲完成手頭上的功課。據知，急住拍拖的超雲三扒兩撥完成功課後，二人即起行，超雲豪花過百萬向歐洲出發。據一名超雲在英國的好友透露：「Florinda（超雲洋名）叫咗陳山聰嚟英國，成日都孖公仔出現，不過就同我哋介紹係朋友。我哋都有睇香港新聞，知道大約係咩一回事，出嚟食飯幾次都係Florinda俾錢，陳山聰就跟喺後面。我哋見到都覺得唔舒服，勸過Florinda，不過佢依家當局者迷啦！」

好友都睇得出陳山聰黐住超雲嘅用心，身為母親的三太怎會不擔心。由去年尾二人傳緋聞開始，三太每當聽到陳山聰的名字，都會黑面答記者：「唔知呀！」之後更對有關陳山聰的回應全面封嘴。

三太和超雲關係一直良好，加上賭王對超雲寵愛有加，爭產戰期間，超雲更不時打扮到花枝招展，陪實老竇賭王亮相，故三太對超雲各樣任性的要求都統統忍讓。直到超雲與陳山聰搭上，三太才忍無可忍棒打鴛鴦。「初時有報道指陳山聰過咗英國搵超雲，三太已經第一時間打電話問超雲，不過超雲就冇承認。以往超雲每日都會同三太傾電話，但由嗰時開始，超雲就成日話功課忙，打少咗電話返屋企，少到一個星期都未必有一個電話。三太知超雲有古怪，俾着以前會即刻飛過去搵女，不過爭產單嘢未完，賭王又病，佢惟有留喺香港睇住個老公。」知情者說。

每年父親節，超雲幾忙都好，都定必回港探賭王，今年她只顧拍拖，父親節亦寧願選擇與陳山聰過。明知超雲已完成功課仍不願回港，三太在6月底曾對記者說：「佢依家同朋友喺歐洲，應該月中先返。何生都成日問我超雲去咗邊，佢都想超雲快啲返。（超雲同陳山聰一齊？）我唔知，我冇問佢。呢啲要等佢對我坦白囉！」好明顯當時三太對超雲掛住瘟仔非常不滿。

英國瘟仔竇

三太曾企硬反對

超雲歐遊返英後，三太再次要求超雲盡快返港，可惜超雲即提出「要帶埋陳山聰返港見家長」的要求。雖然超雲已經對三太坦白，但遭一直對陳山聰印象甚差的三太即時拒絕，並要求超雲馬上與陳山聰絕交。已墮情網的超雲不斷幫陳山聰講好話，更提出「不如先見吓佢再講」，但三太完全不接受，更立即派人往英國全程實超雲。

據知超雲與三太多次在電話中拉鋸亦未能達到共識，直到原定回港的7月中前夕，二人更在電話中為了陳山聰而吵大鑊。超雲多次使出軟功亦無計可施，為保陳山聰，超雲最後使出硬功。雖然三太已揚言會cut信用卡兼停止供應零用錢，但對超雲完全起唔到阻嚇作用，超雲還將回港機票取消。為了避開三太耳目，超雲更與陳山聰向法國和意大利等地私奔一個月，其間更多次冇接聽三太來電，令三太又擔心又痛心。

教超雲與三太修好

超雲與母親角力期間，陳山聰其實擔當重要角色。據知在超雲掛住屋企時，陳山聰即以退為進，知情者透露：「陳山聰成日勸超雲唔好為咗佢同屋企鬧翻，仲話兩母女唔啱講到啱，又話三太咁做可能係想考驗佢哋。陳山聰叫超雲番阿媽，超雲先肯再接三太電話。而三太亦心知同超雲決裂，對於爭產冇着數，反而超雲帶陳山聰返香港見家長，長遠計仲會多半個人幫手。加上賭王幫口，三太最後先肯讓步。佢哋8月初達成共識，本來計劃8號返香港。」

超雲愛得盲目，知道即將回港，便馬上通知相熟傳媒，放風回港後會公告戀情，三太得知後再次與超雲吵大鑊。「超雲心急想公開戀情，三太覺得未係時候。兩母女又嘈咗好多次。為咗同三太講數，超雲又延遲5日先返香港。」最終三太再次將底線拉低，讓超雲「鍾意點就點」。而超雲亦即時打電話回港，命家族公司信德船務為陳山聰購買價值六萬幾的頭等機票回港。

上周五（12日），陳山聰和超雲的黑人保鑣，下午四時十分出現在英國的希斯路機場。肥了不少的陳山聰全程鬼祟到爆，不時用護照遮面，超雲亦交帶保鑣往櫃枱幫男友check in，好讓男友匿在柱邊避開機場內的華人耳目。

過關後，陳山聰即以箭步衝入頭等貴賓候機室會合女友。飛機臨起飛前15分鐘，二人再次前後腳，超雲先離開貴賓候機室，兩分鐘後陳山聰才獨個兒往閘口。

據機上服務員透露，二人乘坐頭等第一和第二行的前後座位，但除了起飛和降落時必須回自己座位外，其餘時間兩人都一齊坐。「佢兩個係分開上機，喺飛機起飛之前佢哋都冇傾過偈，但就見到陳生不時四圍望。待飛機起飛之後，何小姐就即刻走去陳生第一行個位度一齊坐，連兩次用餐都一齊。」

順利回港後，超雲一馬當先回大宅，賭王知道愛女回歸亦馬上到三房大宅食晚飯。超雲借此機會立即與陳山聰聯絡，通知今晚見家長計劃成功，並吩咐司機接陳山聰。

升呢做姑爺

93年出道的陳山聰是家中幼子，做過歌手，經濟不景時又做過sales賣二手衫，後來入無綫做藝員仔，月入約兩萬。自從搭上超雲後，陳山聰即由九龍灣麗晶花園，搬到將軍澳的清水灣半島，去年仲三級跳進駐半山的陽明山莊。座駕亦由日本車bB轉為寶馬三系，依家仲有七人車同司機接送㖭！

何家成員點睇？

超雲戀上陳山聰，成為城中熱話，雖然三太同賭王都做曬大龍鳳，配合超雲進行唱好男朋友大計，但何家其他成員又點睇呢？

超儀：出道已識山聰

阿妹超雲拍拖，何超儀周三（17日）出席新城電台活動時唔想多講：「總之冇意見啦！」對於陳山聰被指行陳子聰舊路，外界拿雙「聰」來比較，超儀大方話：「冇所謂！」記者再問識唔識陳山聰，超儀說：「我識佢好耐，十幾年前出道已經識。」雖然識得，但超儀始終唔肯俾意見。

四太：唔回應

周二（16日），四太梁安琪出席保良局活動，被問及超雲公開戀情一事，她強調不關自己的事，或其他家族成員的事，一概都不作回應。對於會不會戥超雲高興，她只拋下一句：「我戥所有人開心。」

前妻收錢避世

離婚時被指一毫子都唔肯俾的陳山聰，據知在返港前已與前妻講數，除了叫她搬離葵湧公屋，月前更已支付200萬給Ponny，當封口費又好，日後生活費都好，希望Ponny在他與超雲回港這段時間暫避鋒頭，以免再被翻棄糟糠舊賬。上周六陳山聰凱旋回歸，本刊即到訪其前妻寓所，可惜連日來都未見Ponny出入，鄰居亦表示由上星期開始都不見Ponny返來，其電話亦多天冇人接聽。

超雲返港後與陳山聰高調拍拖，本周三晚（17日），她出席公開活動時繼續維護愛郎，對於有傳陳山聰給Ponny的贍養費，是由超雲支付，她說：「我同山聰冇錢銀上瓜葛。（咁歐遊佢有冇出過錢？）呢啲嘢我同佢知就得，唔使同外人交代。（山聰係咪教你番三太，同埋獻計令三太接受佢？）媽咪都冇唔開心，唔使人。（會唔會結婚？）唔想講，我太細個，結婚太荒謬。」睇嚟山聰要向何家姑爺進發，仲要努力喇！

歐遊豪使100萬

超雲今年四月初返英國著名時裝學府St. Martins繼續學業，陳山聰亦同時以家事為由向無綫請假一個月，點知被踢爆身在英國瘟女。兩人自情人節後，不時四圍旅行，超雲把英國、法國、意大利等地的歐遊照放上微博。據知兩人於4個月內，已豪花超過100萬。

4月27日—5月1日　英國倫敦

陳山聰被揭請假拍拖，陪超雲到倫敦遊玩shopping，更被途人拍下在當地一間百貨公司的food court嘆茶的照片。

5月2日—5月11日　法國巴黎

超雲於微博上載與好友Baba雲遊法國嘅合照，而負責揸機影相嘅人正是陳山聰。

5月16日—5月24日　意大利

5月17日，超雲於微博上大呻唔見行李，連眼鏡都冇咩都睇唔到，不過唔緊要，陳山聰一定仆到去做盲公竹帶路。

6月7日—6月13日　西班牙

童心未泯嘅超雲同山聰雲遊到西班牙扮到靚靚去坐迴旋木馬，又大嘆白酒煮青口。

6月21日—7月3日　葡萄牙

食龍蝦生蠔嘆香檳，仲入住六星級酒店，超雲同山聰真係食好住好。

7月15日　法國

超雲在酒店泳池遊水非常梳乎，仲大嗌「好舒服呀！」戴住魔鬼角扮cute嘅超雲自爆身在法國出席嘉年華會。

7月28日—8月7日　意大利

遊意大利期間，超雲不時曬與黑人保鑣的合照。

圈中好友跟紅頂白

年初傳陳山聰與超雲拍拖，圈中冇人敢表態。依家戀情公開了，眾人即送上祝福，邊個跟紅頂白，一睇就知。 ####

8月12日英國機場獨家直擊戴定情金鈪

上周五（12日）下午四時，超雲與山聰前後腳現身英國希斯路機場，而其黑人保鑣則跟在陳山聰身邊，何家小姐連保鑣都俾埋男友用，其右手戴了與陳山聰同是錶帶款的定情金鈪。

最新自拍照

周一（15日），超雲帶埋陳山聰往澳門與三太和超蓮晚飯，於周三淩晨，超雲在微博上載與陳山聰在直升機上的合照，證明已返港。