熱情偷食　 17/9週末
當晚李思捷在山林道溝女鐵竇「味一番」食府，同世界妹李思蓓開房食飯食咗五粒鐘，離開時男的擺個 chok樣，女的含笑步出。

娛頭

開房 8粒鐘　急色李思捷　夜歎世界妹

身為福祿壽一分子，李思捷扮嘢本領高，溝女能力亦唔輸蝕。兩年前以三十五歲高齡，溝掂當時只得十八歲卜卜脆的「春卷」王寶寶。不過喜愛夜蒲的他同樣係偷食專家，縱然有個嫩口又聽話的女友春卷在家侍候，李思捷仍心有不足，頻頻背住女友搵食，代表作有狼溝陳法拉，甚至在夜店借醉鹹啜湯盈盈。上週末，李思捷撇下正印，選擇夜歎陳年「世界妹」李思蓓，二人開房八粒鐘痴纏，臨別依依，借醉李思捷甚至當街為李思蓓掃背調情。
懵然不知的春卷，得悉男友偷食，口震震繼續啞忍：「唔想諗咁多！」

鐵竇溝女

已有正印春卷的李思捷，一直溝女無停手，據了解，早前與高海寧合演電影《勁抽福祿壽》，不時請纓做柴可夫，只是名花有主的高海寧完全唔過電。
失敗再嘗試，每個禮拜夜蒲三四晚的李思捷，上週六（九月十七日）黃昏六點，拍完新劇《換樂無窮》早收工，未有即時返歸，反而坐七人車到旺角洗衣街，原來有約！是夜的獵物，是年屆三十一歲， N屆前的「世界妹」李思蓓。
偷食最緊要不留痕跡，李思捷深明「庄閒」要分清。據了解，同正印春卷出街，地點多是銅鑼灣或尖沙咀的大街大巷，若果只是速食「散餐」，則是蒲慣蒲熟，有定點鐵竇的山林道。偷食日子，更例不揸自己車，改搭的士或由司機搵七人車接載，以便避開傳媒耳目。當日他便帶同「獵物」李思蓓，到山林道私竇「味一番」日本菜館開房五粒鐘。

幫女挽袋
大男人到爆的李思捷，當晚對住獵物李思蓓卻變得非常體貼，幫女方挽袋（粉紅色袋），兼准她當街扶住手臂同行。呢啲情景，未喺春卷身上出現過。

掃背抽水
未夠喉的李思捷要加鐘，再帶女方轉去另一鐵竇酒吧繼續開房相對多三粒鐘，至凌晨兩點先捨得走。沿途他不斷為李思蓓掃背，不愧為「勁抽福祿壽」。

20/9春卷睇相口震：唔想諗咁多！

中午外出的春卷，睇完男友幫女掃背相後無晒心情，之後到 apm Starbucks飲咖啡時顯得心事重重。

冷對正印 18/9週日
翌日李思捷收工陪番正印春卷去尖沙咀食飯，但沿途男的扶都唔扶著住高跟鞋行上路壆的女友，就算春卷主動搭住佢膊頭，佢都無反應。

去行人來人往的商場，李思捷更加避忌，唔俾春卷同佢有身體接觸。共進晚膳只係兩粒鐘就返歸。

加鐘纏綿

李思蓓：佢同我講單身！
年屆三十一歲，身材出眾的李思蓓，一直都 keep得唔錯。

家有嫩口春卷，但李思捷當晚與三張幾，保養得宜的中女李思蓓約會，年紀、經驗接近，明顯醒神啱 key得多。六點半開 VIP房撐枱腳撐到晚上十一點幾，對足五個鐘仲未夠喉，李思捷拉住對方再去對面街另一間上樓酒吧「加鐘」，揀了最暗角的 VIP房間，與李思蓓繼續闢室痴纏三粒鐘，至凌晨兩點幾才玩飽離開。
有幾分醉意的李思捷出時手拖李思蓓，但一行出大廈，二人即刻鬆開手。但等的士期間，李思捷又忍唔住不停在女方的背部上掃下掃，過足手癮。閂埋房門玩足八粒鐘，李思捷「鳥倦知還」，返回與春卷同居的何文田寓所交人。
週六歎完「特餐」世界妹，週日李思捷收工後，回復正常，食番「常餐」春卷，二人到尖沙咀海運大廈搵嘢食，沿途雙手插褲袋一副大男人的他，對正印冷淡，與前一晚跟李思蓓的熱情，兩種態度。

春卷做鴕鳥

其實李思捷夜店食女的戰績，早已傳到春卷耳中，甚至試過偷睇男友手機短訊，但她卻不肯面對現實，一直採取啞忍態度。據知，兩年前李思捷溝掂十八歲的春卷後，大男人性格的他怕樣靚身材正的女友會被撬走，於是禁制春卷留在幕前發展，寧願衣食住行全包照顧，將她全面私人化；加上春卷跟母親關係疏離，視男友為靠山，故一直言聽計從。
現年只得二十歲的春卷，甘願為李思捷放棄幕前，投閒置散日日等男友，早前，她終於獲「特赦」，試做翻譯及珠寶展 sales賺取零用。一切以男友為先，卻換來不忠及不尊重。本刊記者去年曾目睹李思捷到銅鑼灣剪髮，居然 order春卷到附近自己兜足兩個多小時，連陪他剪髮都無資格。春卷身邊朋友都睇唔過眼，曾力勸她飛甩大男人李思捷，把握黃金歲月，重返娛圈。
「個男嘅成日以唔鍾意公開感情生活做藉口，出街唔准春卷同佢拖手，仲要前後行保持距離，其實佢係方便自己喺外面溝女，永遠同人講佢係單身，又話同春卷只係緋聞炒作。
「佢溝女好狼，有蒲友爆話見過佢喺山林道帆船酒吧，同條中女幾杯落肚，就齊齊走入 VIP房個廁所成十五分鐘先出番嚟。啲朋友都勸過春卷嗌分手，但佢偏偏要扮鴕鳥，扮乜都唔知。」知情者說。

溝女王李思捷，早前與高海寧一齊拍電影《勁抽福祿壽》時，據聞對她嗒晒糖，但女方唔過電，啅唔成。（《蘋果日報》圖片）

年初舉行《荃家福祿壽》演唱會，王祖藍同李亞男呢啤搭晒膊頭好大方，李思捷扭扭擰擰，死都唔肯攬住春卷影合照。（《蘋果日報》圖片）

曾屬晶女郎的李思蓓，六年前在旺角開泰式按摩店，便請來王晶剪綵。

雖然近年李思蓓的演藝事業無乜起色，但經營的按摩及美容院越做越旺，並在洗衣街連開三間鋪。

波妹 VS天使

唔再信男友

擅長扮嘢搞笑的李思捷，近日與胡杏兒拍攝新劇《換樂無窮》，事業不斷上位。

本週二（二十日）早上十一時，記者致電春卷，問她知否上週六男友與誰約會，她想了一陣說：「我唔知咁多！」對男友與李思蓓夜會親密掃背，不願回應。收線後十分鐘，外出個多小時的李思捷趕返家，半小時後，春卷外出，記者向她展示李思捷夜會「世界妹」相片，春卷口震震，呆足半分鐘才死撐說：「佢成日都有攬吓女仔，鬼仔性格嘛！」問她是否一直忍受男友偷食，春卷一臉無奈，「我唔知點答你，我都係好 go with the flow（順其自然），唔想諗咁多！」至於會否信任李思捷？她想了一陣才勉強回應：「都唔係信唔信嘅問題！」
之後，春卷跳上的士，又第一時間打電話，為避記者，她最後在油麻地轉地鐵到觀塘 apm，一個人坐在 Starbucks飲咖啡，一邊發呆，無晒心機。

自認單身

至於「特餐」李思蓓，對記者在電話中問她是否被李思捷「溝」，她沒有直接否認：「溝嘅定義係咩先？」又補充：「我哋係朋友啫！」至於當街掃背態度親暱，李思蓓口窒窒說：「你……你哋影到啲咩先？佢有風度扶一扶我咋！（佢沿途上掃吓掃吓喎！）唔……」
問她知不知李思捷有女友春卷，李思蓓大有反應，即時反問：「佢唔係單身咩？無聽佢講過咩春卷，我又唔睇八卦雜誌，唔知佢啲嘢，佢話單身我就信！」