大少撇 HotCha妹補鑊　法拉搬新屋不設防 face週刊 224期 @ 明星靚相大分享☆

封面

半年前，本刊踢爆Neway大少薛世恆趁住老婆陳法拉赴美登台，在年初三偷會22歲HotCha小花張惠雅（Regen）。密會曝光， Regen唔夠三個月即被唱片公司踢走，放逐澳洲。咪以為一腳伸開小三，大婆就會息怒，據知為氹番老婆大人，薛大少近日遷入何文田半山壹號新居，豪宅攻略箍實老婆兼照起回流等湊孫嘅外母。成為薛太近3年的Madam Jo，搬新居沖喜又成視後大熱，係時候不設防為薛家留後箍實老公啦！

膽敢背住老闆娘，農曆新年期間同Neway大少薛世恆食完糖水意猶未盡再趕下場，事後Regen死口唔認同大少有嘢，但就承認確實撇低隊友獨自上畢架山一號大少豪宅拜年。據知情人士透露，今年7月，法拉背後發功怒炒小三Regen都未夠喉，再詐型畢架山舊居變「狐狸屋」嫌疑，知衰大少惟有另覓愛巢，急急補鑊。

搬竇氹妻

週日（4日）下午，本刊發現薛家名下的中港車牌七人車受命駛至半山壹號，本來窗簾打開的七人車再駛出時，車窗已經全部被遮住，過海停在中環萬宜大廈時，才見遮遮掩掩從半山壹號登上薛家座駕的，正是外傳08年已經下嫁薛世恆的陳法拉。「法拉同薛世恆拍拖之後，一直住喺薛家名下嘅畢架山一號，雖然發火叫大少炒咗Regen，啖氣都一直未落。嚟緊法拉媽咪會喺美國搬返嚟同法拉一齊住，一嚟多啲地方、二嚟想氹番老婆，唔使佢再借題發揮望住舊居就把幾火，大少最近租咗半山壹號1,500呎單位搬入去囉。」知情者說。

外母入主

從初撻着時死口唔認，到屢傳婚訊後懶得否認，撇除「絆腳石仔」Regen不講，陳法拉與相戀四年的薛世恆感情一早浮面，唔只公開好事係遲早嘅事，據悉29歲的法拉仲開始考慮養育下一代，早前佢仲喺公開活動話30歲會考慮生仔。「法拉都係最近先肯講吓生育計劃，話自己係獨生女，最想就係生兩個，冇咁悶。其實法拉真係開始考慮做媽媽呢個問題，尤其佢媽咪嚟緊回流，都係想湊孫安度晚年，拍埋手頭上嘅《東西宮略》，隨時喺新屋造人做媽咪。」法拉身邊人透露。

半山中轉屋

法拉老公Neway大少薛世恆，坐擁市值7億家產，不過一直沒有與現居九肚山皓朗山莊的父母同住，三年前已經與法拉在畢架山一號同居。畢架山一號的1,300呎單位屬薛家名下產業，市值2,300萬，兩口子現居的半山壹號，單位面積由1,400呎至2,000呎，月租由35,000起跳。有樓唔住捱貴租，可見法拉搬離Regen到訪過的舊居心切，亦因為法拉媽回流同住需要更大空間，薛家大少為氹老婆多多錢都要照畀。

麥玲玲：至少生2個

據麥玲玲師傅替1982年出生嘅法拉批言，指法拉唔只本身命格唔錯，自己搵到錢之餘，「夫運靚」屬旺夫，但佢未必會甘心做少奶奶，甚至「唔做嘢會好嘥（浪費才華）」。麥師傅更指法拉將於2013到14年有小朋友，而命中會有2至3個子女。對於今年視後，麥師傅更預測必定係法拉：「佢今年會在事業上有突破同進步，有機會得到獎項同認同，跟住到後年都行緊大運。」

強勢東宮

喺Neway強勢迫走Regen，大婆法拉喺電視台一樣要風得風，《潛行狙擊》嘅Madam Jo已經英姿颯颯網友大讚，新劇《東西宮略》亦擔正做「鍾無艷」。週一（5日）舉行開鏡記招的《東西宮略》，東宮法拉和西宮陳敏之齊齊見記者，本刊卻獲悉監製黃偉聲本來屬意夏迎春一角由徐子珊出演，不過《潛行》已經俾Madam Jo搶曬鏡，夏迎春又係擺明陪襯鍾無艷，心有不忿的徐子珊向監製提出加重夏迎春戲分，甚至與法拉交換角色的要求，統統被監製拒絕，角色才由陳敏之頂上。有觀眾緣又有高層緣，更係甩難總經理陳志雲愛將，志雲回歸，睇怕穀硬法拉做視後！

法拉子珊有你冇我

兩個結局打救Madam Jo

上週《潛行》平均收31點，今週進入結局篇，週五連播兩小時，想唔高收都難！網友最關心法拉飾演嘅Madam Jo會唔會同Laughing有情人終成眷屬，雖然事前傳出ending時，話黑社會大哥跛Co（黃宗澤飾）喺貨倉推Madam Jo落樓，Laughing（謝天華飾）趕到捉緊Madam隻手，但Madam最終跌死，搞到班煲劇網友發起「打救Madam Jo」行動。日前，法拉出席活動時都承認自己拍咗兩個結局：「未必係真（殉職），可能會出人意表。」，連劇照都有張Madam Jo穿婚紗喺教堂嘅相，但直至結局篇呢幕劇情就從未曝光，唔通TVB見反應好，有意效法09年《學警狙擊》結局將「Laughing哥」角色翻生咁令法拉「復活」？ ####

擊敗小三，搬埋大屋，仲被力捧做視後，近日曝光不斷的法拉一臉風騷。

今年2月， Regen被影到獲薛大少專車接送食糖水，回家後10分鐘再相聚，齊齊趕下場。