是咁的，八月時我在iPhone的音樂應用程式內，看到BOY'Z的〈Ready To Go〉新歌試聽，

心想：「唔係啩？！舊歌乎？」一按之下，新歌是也，重點在於「BOY'Z」，仍是Kenny（關智斌）和Steven（張致恆）。

當不止生命，連緣份基本上也無take two之下，不論拖友、朋友、同事、鄰居，緣盡亦只好say goodbye，去盡啲，還可以生死不相往來。Kenny和Steven，緣起於○三年，以為「緣盡」於○五年，誰知今年還是巧妙地重組合體。

較年長的Kenny說：「我不嬲都好照顧佢，識咗咁多年，我哋都好似兄弟啦！好開心，今次重組，反而有時佢會提番我。」話雖如此，在Steven的「主場」（畫室），他還是對「細佬」相當照顧，Steven腰間的圍巾，是Kenny的私伙，也是由他為巴打繫於腰間。

巴打再上戰場，要準備的，並非重裝，Steven稱：「呢幾年我哋大家都有經歷過唔同嘅嘢，比起八年前乜都唔識，今次好好多！」

Kenny天與地一線間

Kenny稱，有Steven在身邊，他會多了一份信心、安全感，只是八年前的Kenny，還未洞悉同伴威力，「嗰時我哋去到邊都有助手、髮型、化妝，一team人照顧住。而我就好錫佢（Steven），始終我哋係二為一體，我又大過佢四年，初時梗係當佢係細佬啦！（Steven：「依家唔係咩？」）

「畀我講埋先啦！佢嗰時仲細，得嗰十八歲，到後期我就覺得佢太hea，成日掛住瞓，遲到，話佢，佢又賴皮話：『我由細到大都係咁o架啦！』所以到後期，我哋直情係冇偈傾。」

時為○五年，即Kenny口中的「冇偈傾」階段，剛巧他被安排作個人發展，外間反應好得連劉華也點名大讚，偏偏本地市道不景氣，令他轉戰祖國搵人仔，返大陸拍劇，仲要唔係做主角。「初時其實真係有啲唔慣，喺香港有好多嘢都有同事照顧，上到去，我一個人拖住個篋，收工就返賓館，對住四道牆，每日都諗好多嘢。

Kenny與張敬軒（左）的緋聞，傳足五年。

「喺大陸拍劇，好講team work，到嗰時我先發現，自己之前其實唔係好識同人相處，都好自我中心，所以先同Steven冇偈傾。到今年三月，Mani要我哋一齊為日本嘅fashion week表演，我同Steven再合作，一開始嘅時候，我都有test吓佢o架。排舞就交晒畀佢搞，佢真係排好咗先叫我join，交代咗好多！見到呢個細佬大個仔，我都好安慰！」

Steven坐在Kenny旁，同時展露出一個極具滿足感的笑容，並向後者遞上一包檸檬茶，盡顯巴打情。除Steven外，Kenny名字附近最常出現的，非「張敬軒」或「小斌女」莫屬，「以前『小斌女』好唔舒服o架，依家睇開咗嘞，都係一個有娛樂性嘅稱呼啫，唔係寫得太核突，都冇乜所謂啦！

「我哋同佢（張敬軒）不嬲都friend，一開始要搞呢隻碟，我哋就已經搵佢寫歌，佢幫我哋寫咗兩首歌，仲收咗特平友情價添！」

之前傳出許廷鏗「硬搶」軒軒，Kenny稱現已處之泰然。

Steven 化缺失為機會

相比Kenny的「天與地」，Steven的轉折點更多，由Boy'z到Sun Boy'z再返回BOY'Z，他當過咖啡室侍應、攝影師，收入由近七位數字直插到底，廿七歲回望，他仍處之泰然。「搵得多嘅時候，我二十歲都未夠，有錢喺手就攞晒去玩，做嘢又真係當打份工，extra嘢唔做，其實都好任性。

「不過，四年前信咗主之後，我開始識得反省，唔會好似佢（一指Kenny）講咁，為咗瞓而遲到，仲可以起到身，九點準時返教會。做waiter我都得o架，哈哈！我面皮夠厚吖嘛！」

Boy'z沒有Sun Boy'z，成員有陳偉霆（左一），Kenny與Steven（左一、二）外，還有鍾舒漫（右二）。

除了Steven的主外，遇上與他合資開畫室的Eric、也為Steven上了寶貴一課，「Eric教咗我好多嘢，畫畫只係其中一樣，最重要係責任感，依家我好多時候都喺度（畫室），開門係我，到半夜鎖門嘅都係我。你可以話我係所謂嘅老闆，咩都要上心，但係就係因為呢個係我嘅責任，我更加唔可以hea做。

「但係咁，有時我留晏啲，都係因為打機啫，近排打緊《Batman》（Xbox遊戲），每日我瞓幾個鐘就OKo架嘞！之前排舞又要做舞台劇，我日日瞓得兩粒鐘添咋！」

Steven稱努力工作，為養家之外，還是為了自己，「以前做人冇乜目標，依家最基本嘅係對得住自己，有時人哋畀咗機會我，都要我識珍惜先得o架！以前未識，依家我未至於做得好好，仲學緊嘅。」

因為緣份，Steven（右）遇上拍檔Eric（左），展開畫室「老闆」新一頁。

重組不失霸氣

八年前Boy'z初組時，Kenny和Steven分別二十二歲及十八歲，現在二人一個已是「三字頭」，一個則「廿到抆」，重組也只是把原有的小楷「oy'z」變成大楷「OY'Z」，字面改變易，難的，是他們再次「有偈傾」。

Kenny在祖國生活中自省，Steven則蒙主指引，各有前因下，重組擦出火花，至少他們這樣想。Kenny睜大雙眼說：「今次喺Mani一開始拍板叫我哋重組之後，全部嘢都放晒畀我哋兩個搞，我哋大個仔，好多嘢都搞得掂嘅。」

訪問當日，Kenny還喜孜孜跟Steven展示剛於H&M購入特別毛衣，盛惠$399，後他穿上同一件毛衣，去看張敬軒演唱會。

Stvene接着說：「唔改名繼續叫BOY'Z，係因為方便登台，呢兩年大陸好多登台請我哋，有時一個有時兩個一齊，都係叫BOY'Z，改大細楷，都係一個小轉變啫。」

變幻才是永恒，不分大小，Kenny吸啜着巴打贈飲的檸檬茶，再補充：「變嘅仲有我哋對對方態度，以前我對佢係閂晒閘o架，依家我會聽佢嘅idea，有交流先有進步。有時我諗，我哋都幾似拍拖o架，都係要溝通同體諒，不過一場兄弟，無計嘅！」

八年前，Boy'z首張大碟《LALA世界》，Kenny與Steven賣的是陽光、青澀。

今年，Boy'z變BOY'Z，經過歷練，內外也man晒。

一人有一點卡乸

在Steven畫室大門側，掛了他一幅「星光燦爛」的畫作，「本來幅畫啲用色好沉，因為我畫嘅時候好唔開心，所以大部分都係黑色。

「之後我覺得幅畫太多負能量，所以用咗教班用剩嘅物資，冚晒之前啲黑色，再黏啲星星、掃唔同嘅顏色上去，colourful啲，似番我多啲。」

自言樂天的他，還以「卡乸」感染巴打，請Kenny上畫室作畫，「我畫咗英國國旗，Steven見到就提議我潑啲金色上去，潑完又真係好得，有啲大師feel添。依家我掛咗幅畫喺屋企。」

「卡乸」可作點綴，真正令人生添上色彩的，還是知心巴打，或絲打。

米字旗乃Kenny心頭好，他稱完成畫作後稍嫌單調，得Steven「提點」，為作品添上色彩。