30歲嘅黃智雯選港姐出身，又是藝訓班畢業。相反黃翠如司儀出身，入無綫前零拍劇經驗，仲要大過黃智雯兩年，難怪黃智雯條氣唔順。
娛樂喧
黃翠如冧監製搶女一 黃智雯慘變陪襯
前有線娛樂台主持黃翠如過檔無綫，因為有高層余詠珊力捧，度身定做兩輯《走過浮華大地》，更連拍五劇，由主持升呢做主角。
在新劇《師奶 MADAM》中，女主角本來意屬黃智雯。不過，後來黃翠如戮力發功勁冧監製李艷芳，成功搶走臥底女警的女主角角色，而黃智雯卻要屈居阿二做師奶。難怪《師》劇開拍以來，兩位女角互當透明，唔妥到出面。而贏家黃翠如，更肆無忌憚出入黐實監製，意氣風發。
黃翠如過檔無綫後劇接劇，而新劇《師奶 MADAM》中，她亦突然騎住資歷、人氣、演技比她好的黃智雯，擔任「女一」，夥拍剛播完的人氣劇《巨輪》男主角蕭正楠。其實黃翠如除了有余詠珊做後台外，她冧監製確有一手。難怪在新劇中可以運轉乾坤，由配角變主角。
「本來監製初時只係安排翠如飾演師奶角色，同曹永廉為一 pair，戲份比依家少好多。不過，黃翠如份人勁識做，好識冧 Sa姐（李艷芳）㗎，平日老遠望見 Sa姐就會走埋去打招呼，傾偈時又會繑晒手咁，好熱情。黃翠如之前私下同 Sa姐講，好鍾意個臥底女警角色，話好有挑戰性。咁佢開到聲， Sa姐咪幫佢同 Mandy（黃智雯）個角色調轉囉。」知情者說。
《 On Call II》搶鏡黃智雯在台慶劇《 On Call 36小時 II》飾演的洪美雪為人嚴謹，甚為搶鏡。想不到她在新劇反要做黃翠如陪襯。 
黃翠如主演的《心路 GPS》（圖）、《舌劍上的公堂》及《師奶 MADAM》都是李艷芳監製，難怪被視為李的御用演員。
俾面珍姐硬食
據知黃智雯收到風自己由女一變配角，條氣好唔順，但鑑於黃翠如有監製撐，加上 Sa姐是曾勵珍的班底，而黃智雯今次又是第一次獲珍姐點名拍劇，黃智雯惟有局住硬食做陪襯。
翠如 BB一直以清純外形迷倒高登宅男，但原來她的冧功亦甚為了得。上月 17日，李艷芳和劇中演員到九龍城打邊爐，其間黃翠如 mark實李艷芳，不時和同劇的蕭正楠及張景淳細聲講大聲笑。黃智雯就明顯搭唔到嘴，心不在焉。
上月 29日該劇試造型，記者發現黃翠如和李艷芳在化妝間有講有笑，李艷芳更落手落腳為翠如 BB整理髮型。相反黃智雯則全程遭冷落，不但與黃翠如互當透明，與監製亦全程零交流，唔妥到出面。
17/10錫晒黃翠如黃翠如一向是李艷芳愛將，試造形期間，監製親自為翠如整理服裝，非常細心。 
監製李艷芳避重就輕咁話：「呢套戲係群戲，無話分邊個係第一女主角。（今次又搵愛將黃翠如？）我冇愛將，只有最愛演員！」明撐黃翠如！
黃翠如認冇偈傾
被問到調換角色，黃翠如一味扮傻，猛叫記者問監製，但就直認同黃智雯冇兩句。
記：原本你喺《師奶 MADAM》個角色係黃智雯嘅，點解轉咗俾你做？
黃：係咩？咁要問番監製，監製係跟番我嘅性格度角色。
記：怕唔怕人將你同黃智雯比較？
黃：唔怕，大家戲入面都係好姊妹。
記：監製又搵你做女主角，怕唔怕俾人話？
黃：係呀，監製今次又係搵番我，好多謝佢。
記：前排一班演員飯局，你黐住監製喎！
黃：你又知？唔會啦，我嗰日唔係同監製坐。
記：同 Mandy（黃智雯）有冇聯絡？
黃：冇㗎！
至於黃智雯，提起角色被換面色一沉，酸溜溜說︰「出街咪知我做乜嘢角色囉。（好多網民都討論你同翠如邊個至係女一喎！）都係做好自己嗰部分！」為了俾面珍姐，黃智雯局住做女二都冇計！
去年攞過「飛躍獎」的黃智雯，無論演技、人氣及樣貌，樣樣冇得輸的情況下，依然俾黃翠如騎住，條氣唔順就擺到明，好彩仲有班網友力撐，幫佢出番啖氣。
29/10冷待黃智雯各演員為新劇試造型，其間監製李艷芳與黃翠如在化妝間有講有笑，相反黃智雯卻被孤立。 
親手執靚
爭戲爭出火
藝員拍劇因為爭戲份及角色，唔妥到出面。近年女星之間爭戲份就多暗戰，拍大合照時多數隔住一兩個人扮冇嘢。
田蕊妮被降呢
今年 5月，田蕊妮與黃翠如拍《舌劍上的公堂》時，黃翠如獲加重戲份，令原本是「女一」的田蕊妮降格為女二。阿田更暗寸：「唔會計較邊個係第一女主角，計都冇用！」杜汶澤更在網上撰文炮轟無綫，為愛妻抱不平。
伍詠薇缺席宣傳
今年拍罷台慶劇《法外風雲》後，有傳伍詠薇因不滿戲份被另一女主角陳法拉騎住，缺席宣傳活動以表不滿。
網民撐智雯
雖然《師奶 MADAM》未上，不過網民一知道卡士，就已經好有意見。在 tvb.com留言區的網上投票，力撐黃智雯做女一的網民，更比黃翠如多一倍。
留言列表
