有話兒：杜汶澤畏妻有錢剩
18年後是否又一條好漢，着實沒科學根據，但一切卻印證在杜汶澤身上，機緣巧合，由發霉電視暗星躍身大銀幕當男主角。坐住火箭上位冲昏了阿澤頭腦，變得意氣風發，很快打回原形。一上一落令人到中年的阿澤忽然開竅，食齋信佛，收入全交老婆田蕊妮，由她每月支薪，阿澤笑謂這樣才能收支平衡。撰文：比華利
杜汶澤 18年前當老臨入行，有幸遇上伯樂、已故亞視監製冼志偉提攜參演亞視劇集《我和殭屍有個約會》被觀眾認識，由那時開始，他便不甘於平凡，有見在亞視沒發圍， 99年便離開電視圈跳入大銀幕， 02年參演電影《無間道》儍強一角上位，站穩陣腳。一朝得志的阿澤也開始語無倫次，看到影壇大哥大姐的風光生活，未夠班的他都有樣學樣，加上口不擇言得罪多位影圈中人，令阿澤的電影事業由上變落，事業陷低潮，他開始信佛茹素，對人的態度也 360度轉變，重新出發的阿澤近年的演藝事業得以再起風雲。
放大圖片 
阿澤（左）參演亞視劇集《我和殭屍有個約會》，開始被觀眾認識。
放大圖片 
《無間道》的「儍強」令阿澤（左）在影圈站穩陣腳。
告別年少輕狂 放大圖片 
阿澤表示財政交由老婆田蕊妮掌管後，開始有積蓄。資料圖片
阿澤告別狂妄自大，他說：「當年嘅我好睇其他人眼光，好想炫耀自己，乜嘢都要同人哋睇齊，劉德華住加多利山，我又搬去嗰度；黎明揸乜嘢車，我又買一部；就連吳君如食乜嘢，我都照食，自己好似暴發戶咁。最富貴時我擁有四架車，司機、秘書同助手乜都有齊，可能細個家貧，一旦少少發達就要享盡天下榮華富貴。」發財沒有立品，令阿澤碰得焦頭爛額，負面新聞不絕，事業更插谷底，他語重深長說：「有時八卦新聞未必係事實，但偏偏報道出街，讀者就信以為真，因為我個樣似咁衰，把口又咁冇遮攔，所以明星遇到負面新聞真係唔可以怪人，首要係檢討自己。」阿澤表示不但沒怪責媒體當年沒手下留情，反而要多謝他們令自己醒覺，他說：「家記者唔熱衷追訪我，令我活得輕鬆自在，我奉勸藝人要做好本份，仲要識抗拒唔好成為焦點，做得出位後果要自負。」風光之時，阿澤簽約林建岳旗下，年賺逾 300萬，錢易來也易去，直至離巢時他查看銀行戶口，才立時嚇一跳說：「幾乎係冇錢，我猛問老婆（田蕊妮）到底啲錢去晒邊。」及至阿澤在 09年過檔英皇，老婆田蕊妮便開始掌管老公財政，他說：「老婆管晒盤數，佢每月畀 15,000蚊人工我，我嘅日常生活開支就係呢份糧。衰衰哋當年亞視走都月薪 16,800蚊，人工仲少過以前，直至家為止，三年幾人工都維持不變，就算我片酬有加，老闆（田蕊妮）點都唔肯加畀我，佢好恐怖。」
求老婆加零用
阿澤坦言最初不慣支薪制，他說：「月頭幾日我就使晒啲錢，問老婆借糧又冇偈傾，惟有之後日子都匿埋屋企唔出街，其後學識慳住使，發現都勉強夠用。不過做打工仔梗係望加薪，向老闆提出過訴求㗎啦！」自從田蕊妮接管了阿澤財政，不但收支平衡，分分鐘她成為小富婆，阿澤說：「老婆自己喺無綫工作又多，我嘅錢佢又管晒，佢家最富有，如果有綁匪綁走佢，千祈咪搵我攞贖金，我真係冇錢㗎！」
茹素開支有限
短暫富貴過的阿澤享受現在的生活模式，他形容是明星收入但過平民生活，他說：「我喺元朗有獨立屋住，有環保汽車揸，家冇助手，冇保母兼屋企冇工人，年中慳唔少，我同老婆又食咗齋 6年，買餸錢有限，幾塊豆腐同半斤菜心，成日買餸唔過 50蚊。生活無憂又開心，人哋紅又唔關我事。」領悟到知足常樂，人到中年的阿澤終於開竅了。場地：駿景軒（英皇駿景酒店）
佩服杜琪峯大膽
亞視出身的杜汶澤近年轉戰影圈，他和薛凱琪主演的《爛賭夫鬥爛賭妻》正上映；除了緊守演員崗位，過去幾年他更先後監製過電影《伊莎貝拉》、《破事兒》和《前度》。屈指一算，阿澤已入行 19年，雖然有機會做監製，但始終經驗淺，他自問未夠班：「我越做越覺得自己唔夠資格，我需要再喺演員位置學多好多嘢，先可再去執導或監製電影，過去幾部作品都未夠滿意。」
放大圖片 
阿澤除了演戲，更監製電影。
放大圖片 
杜琪峯對電影的熱誠，令阿澤臣服。資料圖片
「有料又有層次」
問到阿澤心目中最欣賞哪一位大師？他說：「我好欣賞杜琪峯，佢嘅作品有料又夠層次，佢每種題材都夠膽去涉獵，隨着內地巿場開放，好多導演都掛住返去開戲搶錢，拍埋啲唔係自己嘅嘢，但阿杜始終堅持拍自己鍾意嘅嘢，好佩服佢。」阿澤聲聲大讚杜琪峯，是否希望將來可促成合作機會，阿澤說：「呢啲要講緣份，冇得強求。」
拜師倉田保昭學武
今年 6月便 40歲的杜汶澤發覺近年開始出現中年危機，他表示人生路已走了一半，餘下不再強求名利，希望為快樂而活，阿澤近日忙裏偷閒學習攝影和空手道，追尋少年夢，他說：「如果人生有意外都行咗一半，我發現以前掛住搵食，失去咗好多嘢，想學又學唔到，家有時間馬上學番。」
放大圖片 
阿澤近年愛上攝影，有空四出獵影。
放大圖片 
阿澤拜倉田保昭（左）為師，學空手道。
學攝影變龍友
阿澤自爆年少時看《猛龍特警隊》迷上倉田保昭，崇拜他的身手，但杜媽媽知兒子脾氣差，擔心他學了空手道便四出撩是鬥非，向他下禁學令，只能學柔道。近年阿澤收火，加上年底將在電影扮演空手道高手，讓他有藉口拜師學藝，去年機緣巧合，阿澤有幸成為倉田徒弟，他說：「師傅成 65歲人，身手好勁，我後生佢廿年，跟佢學一堂都索晒氣，如果我肯努力學到 60歲，有師傅十分一身手都好好。」除了學空手道，阿澤也愛上攝影，不時向大師級的夏永康討教，對方不但傳授心得，還借出器材，令阿澤的攝影技巧大大改善。 
年中便 40歲的杜汶澤開竅明白做人知足常樂。攝影：陳慧安\n
留言列表
