面對面
男人不壞 吳浩康
從青梅竹馬共度過患難的胡定欣、到紆尊降貴相戀五年的拿督千金莊思敏，然後是剛公開戀情、形象一直乖巧的鍾舒漫，為甚麼好女孩們總是前仆後繼的走到吳浩康身邊？是真的「男人不壞，女人不愛」？還是了解以後，壞男人其實不如我們想像中的那麼壞？
今年剛滿 30歲，吳浩康 02年參加新秀簽約英皇，十一年演藝路，代表作無疑不是甚麼幕前演出，而是 04年身懷 0.42克可卡因被判藏毒罪成。從此以後，行行吓街被中學生圍剿：「呢個咪食白粉嗰個道友？」；與富家女拍拖等於「冇鬼用使女人錢」；等車扯支煙就是「不顧形象自暴自棄」；然後發福長肉就被罵「爛泥扶唔上壁」……走錯了一步，到哪都被看待成罪人，這就是吳浩康口中的懲罰：「當年淨係被判罰款同留案底，好多人話便宜咗我……唔係㗎，做錯事唔係拍拍籮柚就可以走咗去，原來懲罰係會跟你一世。」
說實話，在訪問開始之前，我也把吳浩康看成一個帶罪在身的受訪者，預先制訂了訪問等於給他一個機會懺悔，其實不然：「我冇嘢要證明、冇嘢要懺悔，我錯過、唔檢點過，但係我冇垂頭喪氣、冇頹過，我信我嘅能力，可以做錯，亦一樣可以做好。」一番話、一張臉，堅定、正氣、不服輸，又有說服力。
我也開始動搖，是康莊大道容易走、還是從彎曲泥濘的小道上重回正途更需要勇氣？於是，我也開始有那麼一點點理解到，壞男人的魔力在哪裏。
負負得正
訪問當天，是電影《救火英雄》的香港首映現場。吳浩康在戲裏演謝霆鋒和余文樂的同僚、胡軍與陳偉霆的上司，鏡頭不多，不過穿起制服、開聲訓話威風凜凜、氣概非凡。 30歲的吳浩康自然與十年前那個整天惹事生非上頭版的吳浩康不一樣，個人感覺，那套消防制服事實上亦幫他不少。吳浩康說，幫他的，不是制服，是人。
「我當然知道，角色正氣會幫到我。但係咁多年，一遇着啲警察、消防嘅戲，我同經理人就會避。唔係我哋唔想做，係唔想麻煩人哋製片同導演。喺香港拍戲扮制服團體要入紙申請，我唔知有案底嘅人係唔係會被 rejected，唔想博……不起眼嘅 side cast啫，點解要為咗我去拖累成套戲嘅進度呢？直到去年拍《魔警》想搵我扮警察，導演林超賢話，點都要入紙幫我一次……到警察公共關係科真係批咗， Mani（經理人霍汶希）人喺北京都打長途嚟通知我，我哋開心到想開香檳……」說到這，吳浩康很感慨：「好多人話，由歪路行去正途好難，又有好多人話，呢個社會好冷漠。其實條路就喺面前，最緊要肯去行，其實社會都有溫暖一面，當我願意行呢條路，好多人都肯伸隻手出嚟扶我一把。」
我開始想像 Mani在電話中報喜的畫面，金牌經理人平時現身的總是慶功宴和發布會，原來錦上添花背後，最難的工作是為一個形象低如地底泥的藝人爭取到一個小配角；我常聽到藝人們形容自己在觀眾心目中都有一張成績表，每個演出每次言行都直接影響分數和形象，諸如劉華如陳豪，張 cert.一早爆燈正評到不能，如果是吳浩康這種，藏過毒（ 04年）又傷過人（ 05年）的，要從負分走回正道，該有多難？
「以前我唔係咁諗，我唱歌、做戲之嘛，歌唱得好、戲做得好，私生活做乜，理得我啫？直到拍戲遇到張家輝、任達華，開始見識到咩叫專業。拍《救火英雄》，等埋位時人人喺度飲飲食食，開包薯片遞埋去，係華哥唔食，話要 keep。拍《綫人》我自己煮嘢食唔小心淥親隻手，家輝同我講：『做人唔可以呢度唔小心、嗰度又唔小心，行錯一步，會影響你一生。』係囉……點解華哥五十幾歲都咁 fit，點解家輝會有今日嘅成就？一個藝人紅唔紅係有原因㗎！我嘅重點唔係要幫自己爭取由負分變正分、唔係要證明啲乜嘢，而係我到底點樣經營我呢一個人。我係要相信自己，既然有能力壞，就一樣有能力變好。」
近年主打拍戲，新《救火英雄》和其他作品一樣是小角色：「就算係 side cast，喺片場見識嘅嘢、喺前輩身上學到嘅，想像唔到咁多。」 
去年開始夾 band，以 Closer樂隊主音身份重回樂壇，吳浩康曾經為了樂隊形象更鮮明，推掉不少個人工作。
人生如戲
十年前入行，是因為聲線和外形都像陳奕迅，被稱之為「靚仔版陳奕迅」。十年後，唱片不賣、形象破產，吳浩康的主要工作成了演戲。吳浩康說，人生最難的戲，不是在片場裏導演叫「 action」，而是活生生的現實。
「你有冇試過跑跑吓步，成班𡃁仔圍住你笑：『呢個咪食白粉嗰個死道友囉？』冇㗎，咪扮聽唔到繼續跑囉；你有冇試過考保險牌時，啲同學問我：『點解你毅然放下歌手身份嘅？』點解釋呢？唔通話畀佢哋聽，係呀、我啲碟賣唔去、冇路行咩；你有冇試過同女朋友分手情緒崩潰，喺 office返返吓工擰歪面偷偷喊？你又有冇試過喺尖沙咀返工，過海去灣仔見客，全程坐船抱頭痛哭，但係一落到船見到客，就要扮乜事都冇講番份保單？拍戲有劇本、有導演教戲，原來有時做人最難嘅時候，冇預備、冇人教，真係到嗰一刻殺到埋身，就自然要識。」
我在網上搜尋器見到有人開 post問：「點解吳浩康咁多女、又得英皇力捧，要淪落到去賣保險？」點解要賣保險呢？你話呢？點解陳奕迅唔去賣保險？
最壞的時候轉行賣保險、每天限使 40蚊度日：「雞翼都買唔起，成日蝦米粉絲椰菜餸飯，老豆問做乜咁清淡，我就話減肥。」《壹週刊》圖片 
04年因為藏毒被罰款五千及留案底，吳浩康說雖然不用踎監，不過懲罰其實如影隨形一世跟身。《蘋果日報》圖片
「積蓄本來都有，但係 07年媽咪先患乳癌再因為肝癌去世，殮葬、醫病使咗一大筆，兩年前又輪到阿爸鼻咽癌，再問公司借錢醫阿爸。我係屋企細仔、對上三個家姐，對住成屋女人、我最怕就係俾人話我似女仔，性格一直大男人。加上三個家姐都嫁咗，一講錢就牽涉到三個姐夫、牽涉到幾個家庭，唔好煩……不如我一個人搞掂。本來接騷可以賺到基本生活費，但係我兩年前夾 band搞 Closer，又唔想掉低隊 band自己接 job，為收入迫於無耐去做保險。
「所以，你可以話我壞，但係頹……我打死都唔認。我有案底，要考個保險牌唔容易，要搵人擔保要寫求情信：我係歌手，要返學對住班同學，佢哋有時啲問題，難答過出嚟見記者啲回應十倍。好難，但係我都有去做，絕對冇頹過。錯過，唔代表從此以後要垂頭喪氣，最低潮嘅時候，三叔講咗個故事鼓勵我：從前有一個賊，一次偷嘢被村民捉到，喺佢額頭刻咗個標誌，代表『賊』。佢帶住呢個標誌去搵工做，唔再偷嘢，仲因為唔想人哋窮去偷嘢，盡力幫人做好事……從此以後，人哋都以為佢額頭個標誌代表好人，冇人知原來係『賊』。」
07年母親因癌去世，兩年前父親再患上鼻咽癌：「有啲嘢要殺到埋身至識面對，避無可避，但係我學識，呢一刻，冇嘢重要得過即將離開嘅人。」
舊愛新歡
藝人對觀眾就是娛樂版上的一個名字。有時候，我們都會忘記，藝人也是人，有血有肉有感情。出道十年的吳浩康，每隔幾年，身邊就會換一任女友，兩年前與莊思敏分手，對觀眾而言又是一則無關痛癢的分手新聞，對他來說，正是讓他邊賣保險邊掉眼淚的致命傷。
「我要感激每一個喺我身邊出現過嘅女仔，佢哋每一個都好好……同 Jacquelin五年，相等於我三十歲人六分一人生，曾經以為我哋好努力去經營，以為呢個女仔會永遠陪喺我身邊，當有一日連佢都離我以去，個人真係會崩潰……以前一齊，我大意到連佢生日都幾乎唔記得……點解分開，去到邊都會有回憶？嗰日喺嗰度，坐喺邊、講咗咩、食過咩，一概記得好清楚。第一次覺得好錯、見到自己喺感情中違背過好多承諾、第一次覺得無力挽回、覺得做咩都太遲。」
兩年過去，生命中再出現鍾舒漫，我看到吳浩康的電話熒屏換上了鍾舒漫的三格拼圖、微博上發布的是愛的宣言「希望拖着呢隻手到永遠」，會不會太倉促？會不會太輕言永遠？
「唔理得人哋點講、唔理得人哋點諗，因為你哋永遠唔係我、唔係瞓喺我隔籬嗰個人。同佢一齊，我經常會有一個諗法『就係佢喇！』，佢亦都成日令我覺得：『好彩……有你喺我身邊。』呢一刻，有呢個諗法咪夠囉。第時，我相信只要坦白、只要守承諾，呢段感情就一定經營到落去。」
05年與胡定欣分手、再戀上富家女莊思敏，五年之後一樣難逃分手下場。今年 3月與同公司藝人鍾舒漫相戀，吳浩康說僅僅九個月戀情，就在思考成家立業、生兒育女。《蘋果日報》圖片 
爸爸，請給我多一點時間
又一個浪子回頭的故事。你和我信不信不重要，重要的是身邊人相信、有人願意伸手扶他一把。
家住藍田，母親去世、三個姐姐相繼出嫁後，吳浩康繼續住在藍田，守在剛剛癌症康復的爸爸身邊：「阿爸雖然好番，但係都成日講晦氣說話，話自己唔擺得幾耐。前排喺房翻睇霆鋒攞影帝、講畀謝賢聽嘅一段說話，我出廳跪低攬住阿爸話：『老豆，無論如何，留番條命等我，睇住我好一次。』佢拍吓我話：『好……我等你。』」
這句話，對一個壞孩子的父親有何等意義，你和我，又能懂多少？
撰文：朱小博
攝影：范仲良
化妝： Kei Kei Ng
髮型： Moe@MM il colpo
形象： Bryan@the Flaming
服裝： MUSIUM、 5cm
留言列表
