明星靚相大分享☆

林子祥（Lam）同葉蒨文（沙麗）結咗婚十幾年，都已經係老夫老妻，會留番啲私人空間大家。八太前排就見到Lam帶埋「餅印」仔同班親戚去咗銅鑼灣食飯，鬼咁溫馨。另邊廂，沙麗就約咗幾位好友歎日本燒，二人分頭搵「食」，各自精彩！

Lam囝囝林德正同樣留咗執「二撇雞」，與老竇成個餅印。

Lam同沙麗結婚咁多年成日形影不離，舊年Lam開演唱會，沙麗見老公咁辛苦綵排，仲親自炮製咗兩樽愛心蜜糖去探班，認真甜到漏。不過佢兩個老夫老妻有時都會各自各精彩，留番私人空間畀大家。

細心安頓老人家

八太早前去咗銅鑼灣食飯，食到夜晚九點幾，咁啱喺世貿見到又係啱啱喺附近食完嘢嘅Lam，浩浩蕩蕩八、九個人行咗出去上落客區等車，當中有老有嫩。但八太望嚟望去都唔見佢老婆沙麗，望望吓就見到一個同Lam一樣留咗執「二撇雞」嘅後生仔，原來呢位後生仔就係Lam同前妻吳正元所生嘅大仔林德正。

食飽飽嘅沙麗（左）見到有人影相，即刻衝上車走人。

幾位長輩上車嗰陣，Lam逐一送上慰問，盡顯孝心。

等咗一陣，見到Lam平時坐開嗰架七人車嚟到，兩父子好細心咁安頓咗幾位老人家上車後，再喺原地傾咗一陣就分道揚鑣。冇咗司機接送嘅Lam，惟有行多幾步，自己搭幾蚊小巴返回跑馬地屋企。

見鏡頭即閃上車

另一晚，八太就喺跑馬地見到沙麗同數名好友，喺佢平時成日同老友朱玲玲打躉嘅「燒鳥亭」歎日式爐邊燒。食到十一點幾，冇化妝嘅沙麗，原本同朋友邊行邊傾出門口，點知突然見到有人影相，佢就加快速度衝上車，然後由司機接載離開。