連《Fami通》都能夠打得出40分滿分，足證Konami王牌PSP新作《Metal Gear Solid Peace Walker》幾有來頭。今集《MGS PW》除咗有《MGS》系列一貫以來嘅出色動作以及幽默感外，仲追加育成玩法兼多人連線合作模式，單機開打或者同朋友一齊組隊行動都好有新鮮感，「芒亨」後冇再點用過嘅PSP，都係時候出土迎接蛇叔啦！
今集加入育成元素，可在Mother Base內訓練出強大軍隊。
遊戲內可運用到多款武器。
雖然有些任務可以單打獨鬥，但互相幫助先至係王道。
合作環增強力量
說到遊戲畫面跟操作，PSP版《MGS PW》比不上另一隻《Fami通》滿分作─PS3《MGS4》，但勝在開發小組肯動腦筋，加入系列未曾有過嘅連線合作玩法，最多可6人Ad Hoc連線完成任務。當進行合作任務時，玩家只要走進隊員間嘅黃色「合作環」，就可以發動合作狀態，分享到大家嘅體力同武器；人數愈多，合作環就愈大，威力自然愈強。
遊戲不乏《MGS》系列嘅幽默場面，可以匿在紙箱中避開敵人耳目。
身處合作環範圍內，仲可以為瀕死嘅同伴急救。
多人任務時會出現黃色嘅合作環，環內嘅隊友可以共享體力、氣力及各款武器。
接任務搞旺基地
《MGS PW》另一新玩法係加入育成元素，畀玩家經營大蛇叔設在海上嘅Mother Base基地。遊戲中打低敵人後，唔使殺死對方，而係爆笑地利用氫氣球將俘虜嘅士兵送返自己基地，成為僱傭兵，之後可以派遣佢哋參與不同任務賺取金錢及經驗值，用作開發強大火力武器，提升戰鬥力。除咗可將被俘士兵送返基地外，亦可以將裝甲車、戰車、武裝直升機等敵方兵器，以同樣方法傳送返基地研發新技術。不過講到底要支付Mother Base嘅運作都唔容易，要接多啲Job先可以壯大無國界部隊。
機檔案
類型：動作
開發：Konami
平台：PSP
推出日期：4月29日
售價：$299（UMD）、$298（PS Store下載版）
PSP限定版 迷彩套裝現身
《MGS PW》係近來少有嘅PSP大作，今次SCEH都拍住Konami推出《Metal Gear Solid Peace Walker》PSP限定套裝，當中包括骷髏迷彩設計嘅PSP-3006主機連《MGS PW》遊戲軟件，再加送兩個限定版軍事襟章及特製襟章鋁盒，就算係現行PSP機主都幾難忍到手。
$1,688（4月29日推出）
用上骷髏迷彩設計的《MGS PW》限定版PSP-3006主機。
放大圖片
《MGS》之父 再臨香港
《MGS》之父小島秀夫將會再次嚟香港，更會同埋另一遊戲製作人新川洋司聯袂到港。首200名參加者仲可以得到小島秀夫親筆簽名海報及限定軍牌，母親節當日同媽咪飲完早茶就好去排隊啦。
小島秀夫
新川洋司
首200名參加者就可得到《MGS》限定軍牌。
地點：奧海城2期地下主題中庭
日期：5月9日
時間：下午2時
查詢：2341 2356
Brian
留言列表
