常嘆搵工難、搵份筍工靚工更是難上難。在邵逸夫姪孫女邵聖瑜的 career path上，卻是份份靚工向着她招手，在 Chanel踏入第 14個年頭的她， Regional Style Advisor這個職銜左看抽象、右看比天高，她謙稱份份靚工都是天賜的禮物，但是接過幸運後她每次都悉力以赴以新穎角度達到自己及公司的要求，對美麗的真義，見解更是透徹：「美麗的日落觀賞價值不比羅浮宮名畫低。」 撰文：梁錦貞
掌紋上的事業線，現在已是另有所指的新詮釋，對於有中國及奧地利血統的邵聖瑜（ Claudia），洋化的她從沒在意研究自己掌紋上事業線的長短直曲。聽 Claudia細數她的事業發展，卻是一段段令人羨慕的「 I Want You」。
天賦時裝觸覺 放大圖片 
06年 Chanel在港搞大騷，六叔邵逸夫借出邵氏影城，姪孫女邵聖瑜親自迎迓。
在大學修讀過 Art History的 Claudia，自小在父母薰陶下，見盡都是美麗有 class的東西，她日前說：「我父母係令我大開眼界嘅人，佢哋帶我四處遊歷、擴闊視野，我冇讀過任何關於時裝嘅課程學位，但係自細已經鍾意靚嘅嘢，時裝觸覺可以話係天生嘅，大學畢業後返香港，父母知我鍾意呢方面嘅發展，就幫我搵到份工，幫名設計師唐書琨手，呢份工冇職銜，大大小小、 from zero to finish乜都要做，日日出入土瓜灣，拆箱執箱、搵布搵客，走勻晒啲 fabrics fair，到批衫做好，唐書琨喺中環畢打行有舖，又要做埋 display，咁辛苦我一啲都冇所謂，有人肯教我已經好開心。」邵聖瑜續說：「累積咗第一份工嘅經驗，就開始有 luxury brands搵我，第一份喺卡地亞做咗 3年公關經理、跟住喺 Celine做 GM（ General Manager），然後就到 Chanel。」第一份工沒有明確職銜，到卡地亞及 Celine時有白紙黑字的工作範疇，再到 Chanel， Claudia又遇到她「沒有特定」的工作範疇，甚至沒有特定工作時間。
邵聖瑜說：「嗰時我生完第二胎唔夠一年， Chanel嚟搵我，佢哋話想搵個 GM（總經理），但係我唔可以負擔到做一個 GM嘅工作時間，我從來唔係一個追求權力同結果嘅人，過程中遇到嘅挑戰同埋學到幾多嘢先至係我最關心同享受嘅，同埋我最需要嘅係尊重，我就同佢哋講：『你哋唔會請一個兼職嘅 GM，係咪？不過如果你真係暫時搵唔到人，我可以做住先，到你搵啱人我咪畀番個位你，到時又睇吓有乜嘢啱我做。』就係咁，到今年我已經喺 Chanel 14年，職銜係 Regional Style Advisor，一年要飛六次，睇住啲 buyers揀亞太區市場啱賣乜嘢貨，又要配合番 Chanel嘅形象同嗰個系列嘅主題。」
做事角度多變
酷愛時裝的邵聖瑜滔滔不絕說：「我鍾意做時裝係因為多變化，珠寶就來來去去都係嗰啲，好似衫，有長有短有闊有窄，靈活好多，同埋只要你真係鍾意嗰樣嘢，訓練未必係最緊要，我雖然做咗咁多年，但係我唔會好公式咁做，人哋畀到我彈性工作時間，我更加要達到成績畀人睇，就算好似手板眼見，好似來來去去都係做住一樣嘢，都可以有唔同角度去 approach，好似上季秋冬 Chanel好多黑色，舖頭嘅 sales覺得有難度，好多亞洲女人覺得買黑色，一兩件就夠，我就同佢哋講：『 Chanel owns black，如果你真係只會揀黑色，呢度有最好嘅選擇。』長短闊窄、 single piece、 total look都係最 perfect嘅，等如衫有變化，顧客都會有變化，要不停有新思維新角度。」
最想回饋社會
邵聖瑜說：「好多人問我份份工都咁靚，下一份呢？世事冇絕對，不過呢一刻我相信我唔會再跳槽諗揀下一份係做啲乜嘢，而係除咗時裝之外我仲有乜嘢想試，我想為自己、為社會做番少少嘢，好似出食譜，雖然見盡咁多奢華靚嘢，不過父母成日教我唔好成日提住錢，唔係所有嘢都係用錢計嘅，舉個例，靚嘅嘢、來自大自然嘅嘢，一朵花、一個日落景色，對我嘅價值唔會低得過一幅擺喺羅浮宮嘅名畫。」
人物誌：邵逸夫姪孫女 時裝圈打拼
邵聖瑜，曾祖父邵行銀是錦泰昌顏料號創辦人，有 8名子女，祖父邵仁棣排第二、邵逸夫排行第六，邵聖瑜稱六叔為叔公。邵聖瑜和法籍丈夫現時育有兩子一女。
放大圖片 
不介意當一陣子「 part time GM」的邵聖瑜，強調心目中家庭永遠排首位。
放大圖片 
邵聖瑜和法籍老公育有三名子女，兩夫妻不時結伴睇騷聽歌劇。 資料圖片
執掌名牌多年
畢業於美國 Bryn Mawr College的邵聖瑜，返港後在名設計師唐書琨處打工，大小事務均要落場，沒有正式 title。然後她開始投身 luxury brands工作，先後在卡地亞任公關經理及 Celine總經理。今年是邵聖瑜任職 Chanel的第 14個年頭，職銜是 Regional Style Advisor，近年與楊鐵樑媳婦余夏卿合著食譜《 Too Delicious》，為慈善出一分力。
話你知：食譜滿載溫馨回憶
邵聖瑜（ Claudia） 08年開始與楊鐵樑媳婦余夏卿（ Dominica）開始合著食譜《 Too Delicious》，至今已推出兩本，第一本印數 3,000本經已售罄，第二本加印至 5,000本都接近售罄，市場包括香港及北美等地，售得款項作慈善捐往支持女童教育，共籌得 16萬元。
放大圖片 
邵聖瑜與余夏卿（左）齊分享烹飪樂趣，人生樂事之一。
放大圖片 
邵聖瑜與好友余夏卿（右）合著食譜《 Too Delicious》，收益全數撥捐慈善。
食譜內容全是邵聖瑜及余夏卿心愛的家庭風味食物，由早餐、 brunch、午餐、晚餐至甜品均備。邵聖瑜日前說：「 Baking係一門精確嘅藝術，你必須跟隨次序方向， Cooking就係一門自由嘅藝術，你只須跟隨你嘅心！」
放大圖片 
《 Too Delicious》介紹的食譜全面多樣化、正餐甜點一應俱全。
放大圖片 
家庭排第一 放大圖片 
訪問期間，邵聖瑜不時強調：「我並唔係追求 sky high權力嗰種人，我只係鍾意有挑戰、有嘢學，同埋 keep住自己要不停 roll，我成日都想試一啲時裝以外自己鍾意做嘅嘢，家庭始終係我嘅首位，一個美滿家庭有嘅就係熱鬧人氣、歡笑聲同美食，我好細個已經跟媽咪喺廚房出出入入，煮幾複雜嘅菜式都難唔倒我，但係我嘅食譜唔係要傳授嗰啲超級名貴複雜嘅菜式，而係要好溫馨家庭嘅，因為呢啲係我嘅回憶，出面嘅 6星級餐廳都食唔到。」 
恒常優雅的邵聖瑜，在 Chanel工作 14年雖熟能生巧，但仍會悉力探求新角度面對工作上的挑戰。 攝影：黃文偉
留言列表
