我夠知學華 Dee揸烈火戰車，肯定會型到爆燈，不過孖轆揸法同四個轆完全兩回事，學不得其法會相當危險。偏偏 Kary吳雨霏信心十足，考電單車牌就係為咗跑車級 Ducati烈火戰車。咁大膽？原來得鍾 Sir親授口訣：「 Brake不太緊！」記者：徐影龍攝影：陳陶鈞鳴謝：香港駕駛學院
其他副刊影片 煞車充滿學問 放大圖片 
■見 Kary圍住場地走一圈，令人感受到電單車真係幾 Free。
揸電單車同私家車當然有別，要學嘅嘢同樣多如繁星，不過經香港駕駛學院鍾 Sir講解後，突然又唔覺孖轆難學，嗰種逍遙自在感，連我幾廿歲人都忽然雄心萬丈想扮劉華，難怪 Kary又要驚又要學喇。千祈咪將踩單車嗰套用落電單車度，事關煞車力度可以引伸好大影響，聽鍾 Sir講控制 Brake嘅 Timing同力度，都比四個轆更嚴謹，而且仲分頭 Brake同尾 Brake嘅交替用法，「通常都係前後 Brake一齊用，斜路打 8字先會齋用尾 Brake，又或玩雜技先齋用頭 Brake。好多人揸私家車鍾意 Late Brake，但電單車好易會擺尾，絕對唔啱急煞。以 50km/h慢車計，應該前後 Brake一齊慢慢收緊，控制好速度先入彎，切忌彎中拖 Brake，若入彎時發覺速度仲係好快，大可『企』直番架車再收 Brake，唔好 Keep住側身入彎又踩 Brake，否則好易『派牌』。咪以為綿羊仔慢揸就無事，家陣天氣潮濕又落雨，失驚無神急煞，跣胎、擺尾風險將大大增加。」
放大圖片 
■香港駕駛學院首席發展主鍾錦雄
放大圖片 
■自動波定棍波，煞車都不宜太急。
放大圖片 
■入彎前想減速，要趁車身「打直」時調校。
放大圖片 
■嚟緊係雨季，揸電單車更應小心謹慎。
夢想買孖轆法拉利 放大圖片 
■學電單車可以戴私人護具， Kary就猛讚個頭盔又靚又舒服。
Kary同好多美少女一樣，又係細細個睇戲見人揸車好型，就立志大個咗要考齊私家車同電單車牌：「我好鍾意車 o架！所以一夠 18歲即刻考牌，私家車牌已經有喇，家就努力考埋電單車牌。起初都幾驚 o架，個引擎咁近身，又震又嘈，心入面都好戰戰兢兢，更試過斜路打 8字「掃低咗」。不過學咗 10堂之後，已經揸得好暢順，而且好 Enjoy電單車嘅刺激感㖭。」「考到牌之後，好大機會買 Clubman，我鍾意纖纖瘦瘦嘅車身，而終極夢想，梗係電單車界法拉利嘅 Ducati啦，就算唔揸，有得坐吓已經好開心。」
揀車對腳要掂地 放大圖片 
■女仔唔好揀太高嘅車，雙腳可以掂地為之合格。
要學好電單車，當然唔係齋識用 Brake就得，鍾 Sir繼續滔滔不絕：「首先最好有私家訓練場地同斜坡，對磨練高難度技巧好有幫助。有機會上快速公路，要留意盡量避開『打困龍』，即前後左右都近距離有車。同前車保持嘅距離都要注意，遇着密斗之類嘅大車，你起碼要望到佢兩邊側鏡先算安全距離。另外離開快速公路準備分流時，好多人對速度都會麻木，收慢速度時要多啲望咪錶，千祈唔好靠估。」香港地越嚟越多女仔揸兩個轆，鍾 Sir有乜好建議？「其實女仔都好啱揸電單車，揀車反而要留意，如車身唔好太高，收起大架同側架後，雙腳都要掂到地，車身唔好重過自己三倍，假設你 100磅多啲，最多揸架 400cc車，否則倒後、斜路泊車會好論盡。」
放大圖片 
■駕駛學院有私家訓練場地同斜坡，大可安心慢慢練。
放大圖片 
■場內仲提供頭盔、護踭、反光衣等，失魂拎漏嘢都唔怕。
吳雨霏 孖轆 學車 學神 Brake 不太緊 投身 鐵騎士 又驚 又要學
留言列表
